ଅଶାନ୍ତ ବେଲପାହାଡ଼ .. ହତ୍ୟାକାଣ୍ଡ, ପୋଲିସ ଏନକାଉଣ୍ଟରରେ ୨ ଦୁର୍ଦ୍ଦାନ୍ତ ଅପରାଧୀ ଆହତ
ଝାରସୁଗୁଡା ଜିଲ୍ଲା(ଜାଗ୍ରତ ଭାରତ ନ୍ୟୁଜ) ଝାରସୁଗୁଡ଼ା ପୋଲିସକୁ ମିଳିଛି ଏକ ବଡ଼ ସଫଳତା । ଜିଲ୍ଲାର ବେଲପାହାଡ଼ ଅଞ୍ଚଳରେ ଘଟିଥିବା ଚାଞ୍ଚଲ୍ୟକର ହତ୍ୟାକାଣ୍ଡର ଦୁଇ ଜଣ ପ୍ରମୁଖ ଅଭିଯୁକ୍ତ ପୋଲିସ ଏନକାଉଣ୍ଟରରେ ଆହତ ହୋଇଛନ୍ତି । ସେମାନେ ହେଲେ ସମ୍ବଲପୁର ବୁର୍ଲା ଥାନା ଅନ୍ତର୍ଗତ ଗୌରପାଲି ଓସିବି କଲୋନୀର ସୁନୀଲ ମହାନନ୍ଦ ଓରଫ ଟାବୁ (୨୨) ଏବଂ ଚାନ୍ଦ ବନଛୋର (୨୫) ।ବେଲପାହାଡ଼ ଥାନା ଅଞ୍ଚଳର କର୍ଲାଖମନ ନିକଟରେ ଏହି ଏନକାଉଣ୍ଟର ଘଟିଛି । ଖବର ପାଇ ପୋଲିସ ଅଭିଯୁକ୍ତଙ୍କ ପାଖରେ ପହଞ୍ଚିବା ବେଳକୁ ସେମାନେ ଖସିଯିବା ପାଇଁ ଉଦ୍ୟମ କରିବା ସହ ପୋଲିସ ଉପରକୁ ୪ ରାଉଣ୍ଡ ଫାୟାର କରିଥିଲେ । ପୋଲିସ ପାଲଟା ଜବାବ ଦେଇ ଗୁଳି ଚାଳନା କରିବାରୁ ଦୁଇ ଅଭିଯୁକ୍ତଙ୍କ ଜଙ୍ଘରେ ଗୁଳି ବାଜିଥିବା ନେଇ ବେଲପାହାଡ଼ ଆଇ.ଆଇ.ସି. ସୂଚନା ଦେଇଛନ୍ତି । ଉଭୟଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ ଝାରସୁଗୁଡ଼ା ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି।ବେଲପାହାଡ଼ ଫାଟକ ନିକଟରେ ଘଟିଥିବା ହତ୍ୟାକାଣ୍ଡରେ (କେସ୍ ନଂ ୮୮/୨୫୬) ଏହି ଦୁଇ ଜଣ ସିଧାସଳଖ ସମ୍ପୃକ୍ତ ଥିବା ନେଇ ପୋଲିସ ସ୍ପଷ୍ଟ କରିଛି । ସେମାନଙ୍କ ନାମରେ ସମ୍ବଲପୁର ଓ ବୁର୍ଲା ଥାନାରେ ପୂର୍ବରୁ ମଧ୍ୟ ଏକାଧିକ ସଙ୍ଗୀନ ଅପରାଧିକ ମାମଲା ରହିଛି । ଅଞ୍ଚଳରେ ଶାନ୍ତି ଓ ଆଇନ ଶୃଙ୍ଖଳା ରକ୍ଷା ପାଇଁ ପୋଲିସ ଅପରାଧୀଙ୍କ ବିରୋଧରେ ଏଭଳି କଠୋର ଆଭିମୁଖ୍ୟ ଗ୍ରହଣ କରିଥିବା ବେଳେ ଅଞ୍ଚଳବାସୀଙ୍କ ଜନଜୀବନ ପ୍ରତି ଉଚିତ ସୁରକ୍ଷା ଦେଇ ପାରିବ କି ନାହିଁ ତାହା ଏବେ ଅଶାନ୍ତ ବେଲପାହାଡବାସୀଙ୍କ ମଧ୍ୟରେ ପ୍ରଶ୍ନବାଚୀ ସୃଷ୍ଟି କରିଛି l
