ପୁରୀ : ବିଶ୍ୱପ୍ରସିଦ୍ଧ ଶ୍ରୀଜଗନ୍ନାଥଙ୍କ ରଥଯାତ୍ରା ୨୦୨୬ ଆଉ ହାତଗଣତି ଦିନ ଦୂରରେ ଥିବାବେଳେ, ଏହି ମହାଆୟୋଜନକୁ ସୁଚାରୁ ଓ ଶୃଙ୍ଖଳିତ ଭାବେ ସମ୍ପନ୍ନ କରିବା ପାଇଁ ରାଜ୍ୟ ସରକାର, ପୁରୀ ଜିଲ୍ଲା ପ୍ରଶାସନ ଏବଂ ଶ୍ରୀମନ୍ଦିର ପ୍ରଶାସନ ପକ୍ଷରୁ ଜୋରଦାର ପ୍ରସ୍ତୁତି ଚାଲିଛି। ଚଳିତ ବର୍ଷ ରଥଯାତ୍ରାରେ ଭକ୍ତମାନଙ୍କ ସୁବିଧା, ସୁରକ୍ଷା ଏବଂ ଦର୍ଶନ ବ୍ୟବସ୍ଥାକୁ ନେଇ ଅନେକ ନୂଆ ପଦକ୍ଷେପ ନିଆଯାଉଛି।
ରଥଯାତ୍ରା ୨୦୨୬ର ଦ୍ୱିତୀୟ ସମନ୍ୱୟ ବୈଠକରେ ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ସୂଚନା ଦେଇଛନ୍ତି ଯେ, ମହାପ୍ରଭୁଙ୍କ ଦର୍ଶନ ପାଇଁ ପୁରୀବାସୀଙ୍କ ନିମନ୍ତେ ସ୍ୱତନ୍ତ୍ର ବ୍ୟବସ୍ଥା କରାଯିବ। ଏଥିପାଇଁ Odisha Computer Application Centreର ସହଯୋଗରେ ଏକ ସ୍ୱତନ୍ତ୍ର ସଫ୍ଟୱେର ପ୍ରସ୍ତୁତ ହେଉଛି। ଆଧାର କାର୍ଡ ସ୍କାନ ମାଧ୍ୟମରେ ପୁରୀବାସୀ ଓ ଶ୍ରଦ୍ଧାଳୁମାନେ ସହଜରେ ଦର୍ଶନ କରିପାରିବେ। ଏହି ବ୍ୟବସ୍ଥା ଖୁବଶୀଘ୍ର ଲାଗୁ ହେବ ବୋଲି କୁହାଯାଇଛି।
ସମନ୍ୱୟ ବୈଠକରେ ରଥଯାତ୍ରା ସମୟରେ ଭିଡ଼ ନିୟନ୍ତ୍ରଣ, ଟ୍ରାଫିକ ପରିଚାଳନା, ସ୍ୱାସ୍ଥ୍ୟ ସେବା, ପରିବହନ ଓ ଜରୁରୀକାଳୀନ ବ୍ୟବସ୍ଥାକୁ ନେଇ ବିସ୍ତୃତ ସମୀକ୍ଷା କରାଯାଇଛି। ଲକ୍ଷାଧିକ ଶ୍ରଦ୍ଧାଳୁଙ୍କ ସମାଗମକୁ ଦୃଷ୍ଟିରେ ରଖି ସମସ୍ତ ବିଭାଗ ନିଜ ନିଜ କାର୍ଯ୍ୟଯୋଜନା ପ୍ରସ୍ତୁତ କରିଛନ୍ତି।
ଚଳିତ ବର୍ଷ ରଥଯାତ୍ରାରେ ସୁରକ୍ଷା ବ୍ୟବସ୍ଥାକୁ ଅଧିକ ମଜବୁତ କରାଯାଉଛି। ପୁରୀ ସହର ଏବଂ ବଡ଼ଦାଣ୍ଡ ସମେତ ସମସ୍ତ ଗୁରୁତ୍ୱପୂର୍ଣ୍ଣ ସ୍ଥାନରେ ୪୭୩ଟି ସିସିଟିଭି କ୍ୟାମେରା ଲଗାଯିବ। ଏଥିମଧ୍ୟରୁ ପ୍ରାୟ ୨୦୦ଟି କ୍ୟାମେରାର ପରୀକ୍ଷଣ ଶେଷ ହୋଇସାରିଛି। ବ୍ୟାପକ ପୁଲିସ ମୁତୟନ ସହ ଅତ୍ୟାଧୁନିକ ନଜରଦାରୀ ବ୍ୟବସ୍ଥା ମାଧ୍ୟମରେ ସମଗ୍ର ରଥଯାତ୍ରା ଉପରେ କଡ଼ା ନଜର ରଖାଯିବ।
ରଥଯାତ୍ରା ଅବସରରେ ଦେଶର ବିଭିନ୍ନ ପ୍ରାନ୍ତରୁ ଆସୁଥିବା ଶ୍ରଦ୍ଧାଳୁଙ୍କ ସୁବିଧା ପାଇଁ ଭାରତୀୟ ରେଳବାଇ ପକ୍ଷରୁ ୩୭୦ଟି ସ୍ୱତନ୍ତ୍ର ଟ୍ରେନ୍ ଚଳାଚଳ କରାଯିବ। ଏହା ଦ୍ୱାରା ପୁରୀ ଅଭିମୁଖେ ଯାତ୍ରୀଙ୍କ ଚାପ କମାଇବା ସହ ଯାତାୟାତକୁ ସୁଗମ କରାଯିବ।
ଶ୍ରଦ୍ଧାଳୁଙ୍କ ସ୍ୱାସ୍ଥ୍ୟ ସୁରକ୍ଷାକୁ ଗୁରୁତ୍ୱ ଦେଇ ବଡ଼ଦାଣ୍ଡର ଉଭୟ ପାର୍ଶ୍ୱରେ ଅସ୍ଥାୟୀ ଚିକିତ୍ସା ଶିବିର ପ୍ରତିଷ୍ଠା କରାଯିବ। ଆପାତକାଳୀନ ଚିକିତ୍ସା ସେବା, ଆମ୍ବୁଲାନ୍ସ ଓ ଡାକ୍ତରୀ ଟିମ୍ ସବୁବେଳେ ପ୍ରସ୍ତୁତ ରହିବେ।
ସେହିପରି ସମୁଦ୍ରକୂଳଠାରୁ ପଞ୍ଚତୀର୍ଥ ପୁଷ୍କରିଣୀ ପର୍ଯ୍ୟନ୍ତ ସମ୍ବେଦନଶୀଳ ସ୍ଥାନଗୁଡ଼ିକରେ ସ୍ୱତନ୍ତ୍ର ପୁଲିସ ଦଳ ସହ ଉଦ୍ଧାରକାରୀ (ରେସ୍କ୍ୟୁ) ଟିମ୍ ମୁତୟନ ହେବେ।
ରଥଯାତ୍ରା ସମନ୍ୱୟ ବୈଠକରେ ଆଇନ ମନ୍ତ୍ରୀ ପୃଥ୍ବୀରାଜ ହରିଚନ୍ଦନଙ୍କ ସହ ସ୍ୱାସ୍ଥ୍ୟ ମନ୍ତ୍ରୀ ମୁକେଶ ମହାଲିଙ୍ଗ, ସଂସ୍କୃତି ମନ୍ତ୍ରୀ ସୂର୍ଯ୍ୟବଂଶୀ ସୂରଜ, ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢୀ ଓ ସୌମେନ୍ଦ୍ର ପ୍ରିୟଦର୍ଶୀଉପସ୍ଥିତ ରହି ପ୍ରସ୍ତୁତିର ସମୀକ୍ଷା କରିଥିଲେ।
ରଥଯାତ୍ରା ୨୦୨୬ରେ ପ୍ରଥମଥର ପାଇଁ ଡିଜିଟାଲ୍ ଦର୍ଶନ ବ୍ୟବସ୍ଥା, ଅତ୍ୟାଧୁନିକ ନଜରଦାରୀ ପ୍ରଣାଳୀ, ବ୍ୟାପକ ସୁରକ୍ଷା ଏବଂ ଉନ୍ନତ ଯାତ୍ରୀ ସୁବିଧା ମାଧ୍ୟମରେ ଭକ୍ତି, ପରମ୍ପରା ଓ ପ୍ରଯୁକ୍ତିର ଏକ ଅଭିନବ ସମନ୍ୱୟ ଦେଖିବାକୁ ମିଳିବ। ବିଶ୍ୱର କୋଣ ଅନୁକୋଣରୁ ଆସୁଥିବା ଲକ୍ଷାଧିକ ଭକ୍ତଙ୍କ ପାଇଁ ଏଥରର ରଥଯାତ୍ରାକୁ ସୁରକ୍ଷିତ, ସୁବ୍ୟବସ୍ଥିତ ଓ ସ୍ମରଣୀୟ କରିବାକୁ ସମସ୍ତ ପ୍ରସ୍ତୁତି ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚିଛି।
