ନୂଆଦିଲ୍ଲୀ, ୨୦/୭: ପରୀକ୍ଷା ପ୍ରଶ୍ନପତ୍ର ଲିକ୍ ମାମଲାକୁ ନେଇ ରାଜଧାନୀ ଦିଲ୍ଲୀରେ ଆନ୍ଦୋଳନ ତୀବ୍ର ହୋଇଛି। ସଂସଦ ମାର୍ଚ୍ଚ କରୁଥିବା ହଜାର ହଜାର ଯୁବକଙ୍କୁ ରୋକିବାକୁ ଯାଇ ପୋଲିସ ଅଶ୍ରୁଗ୍ୟାସ ପ୍ରୟୋଗ କରିବା ସହ ଲାଠିଚାର୍ଜ କରିଥିବା ଅଭିଯୋଗ ହୋଇଛି। ଆନ୍ଦୋଳନକାରୀଙ୍କ ଭିଡ଼ ଓ ପୋଲିସ କାର୍ଯ୍ୟାନୁଷ୍ଠାନ ଯୋଗୁଁ କେନ୍ଦ୍ରୀୟ ଦିଲ୍ଲୀର ଅନେକ ଅଞ୍ଚଳରେ ଯାତାୟାତ ବ୍ୟାହତ ହୋଇଥିଲା।
ଏହି ତୀବ୍ର ଆନ୍ଦୋଳନ ମଧ୍ୟରେ ସରକାର ଓ ପ୍ରଦର୍ଶନକାରୀଙ୍କ ମଧ୍ୟରେ ଆଲୋଚନାର ରାସ୍ତା ଖୋଲିଛି। ସିଜେପିର ମୁଖପାତ୍ର ସୌରଭ ଦାସ ଓ ଆଶୁତୋଷ ରାଙ୍କା କେନ୍ଦ୍ରମନ୍ତ୍ରୀ ଜେପି ନଡ୍ଡାଙ୍କୁ ଭେଟି ନିଜ ଦାବି ଉପସ୍ଥାପନ କରିଛନ୍ତି।
ବୈଠକ ପରେ ଜେପି ନଡ୍ଡା କହିଛନ୍ତି ଯେ, ପ୍ରଦର୍ଶନକାରୀଙ୍କ ପକ୍ଷରୁ ପ୍ରଥମ ଥର ପାଇଁ ସରକାରଙ୍କ ସହ ଆଲୋଚନା ପାଇଁ ପ୍ରସ୍ତାବ ଆସିଥିଲା। ଏହା ପରେ ପ୍ରତିନିଧିମଣ୍ଡଳ ସହ ବିସ୍ତୃତ ଆଲୋଚନା ହୋଇଥିବା ସହ ସେମାନେ ଏକ ଲିଖିତ ଜ୍ଞାପନପତ୍ର ଦେଇଥିବା ସେ ସୂଚନା ଦେଇଛନ୍ତି। ପ୍ରଦର୍ଶନ ଶେଷ କରି ପରିସ୍ଥିତି ସ୍ୱାଭାବିକ କରିବାରେ ସହଯୋଗ କରିବାକୁ ମଧ୍ୟ ସେ ଆନ୍ଦୋଳନକାରୀଙ୍କୁ ଅନୁରୋଧ କରିଛନ୍ତି।
ଅନ୍ୟପଟେ, ସିଜେପି ମୁଖପାତ୍ର ସୌରଭ ଦାସଙ୍କ ଦାବି ଅନୁସାରେ, କେନ୍ଦ୍ରମନ୍ତ୍ରୀ ଏହି ପ୍ରସଙ୍ଗରେ ଉଚିତ ସ୍ତରରେ ଆଲୋଚନା କରିବାକୁ ଆଶ୍ୱାସନ ଦେଇଛନ୍ତି। ଆନ୍ଦୋଳନକାରୀଙ୍କ ମୁଖ୍ୟ ଦାବି ମଧ୍ୟରେ କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା କିମ୍ବା ତାଙ୍କୁ ପଦରୁ ହଟାଇବା ଦାବି ରହିଥିବା ସେ କହିଛନ୍ତି।
ଏବେ ଆନ୍ଦୋଳନ ଓ ସରକାରୀ ଆଲୋଚନା ମଧ୍ୟରେ ଏହି ବିବାଦର ସମାଧାନ କେଉଁ ଦିଗକୁ ଯାଉଛି, ତାହା ଉପରେ ସମସ୍ତଙ୍କ ନଜର ରହିଛି।
