ବର୍ଷାଜଳକୁ ସମ୍ପଦରେ ପରିଣତ କରୁଛି ଅନୁଗୋଳ ବନଖଣ୍ଡ; ମୃତ୍ତିକା ଓ ଆର୍ଦ୍ରତା ସଂରକ୍ଷଣକୁ ଗୁରୁତ୍ୱ
ଅନୁଗୋଳ, ୭/୮: ବର୍ଷା ଋତୁକୁ ସଠିକ୍ ଭାବେ ସଦୁପଯୋଗ କରି ବନ ପରିବେଶକୁ ଅଧିକ ସୁଦୃଢ଼ କରିବା ଦିଗରେ ଅନୁଗୋଳ ବନଖଣ୍ଡ ପକ୍ଷରୁ ବ୍ୟାପକ ଭାବେ ମୃତ୍ତିକା ଓ ଆର୍ଦ୍ରତା ସଂରକ୍ଷଣ (SMC) କାର୍ଯ୍ୟକ୍ରମ ଚାଲିଛି। ବିଭିନ୍ନ ବନାଞ୍ଚଳରେ ଏହି କାର୍ଯ୍ୟ ମାଧ୍ୟମରେ ବର୍ଷାଜଳର ସଠିକ୍ ସଂରକ୍ଷଣ ସହ ପ୍ରାକୃତିକ ସମ୍ପଦର ସୁରକ୍ଷାକୁ ପ୍ରାଥମିକତା ଦିଆଯାଉଛି।
ବନ ବିଭାଗର ସୂଚନା ଅନୁସାରେ, SMC କାର୍ଯ୍ୟକ୍ରମ ଯୋଗୁଁ ବର୍ଷାଜଳ ମାଟି ମଧ୍ୟରେ ଅଧିକ ପରିମାଣରେ ସଂରକ୍ଷିତ ହେଉଥିବାବେଳେ ମୃତ୍ତିକା କ୍ଷୟ ମଧ୍ୟ ଉଲ୍ଲେଖନୀୟ ଭାବେ ହ୍ରାସ ପାଉଛି। ଏହା ଭୂତଳ ଜଳସ୍ତରର ପୁନଃଭରଣରେ ସହାୟକ ହେବା ସହ ବନାଞ୍ଚଳରେ ଆର୍ଦ୍ରତା ବଜାୟ ରଖିବାରେ ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକା ନେଉଛି।
ଏହାର ପ୍ରଭାବରେ ବନସ୍ପତିର ସ୍ୱାଭାବିକ ବୃଦ୍ଧି, ନୂତନ ଚାରାର ବିକାଶ ଓ ପ୍ରାକୃତିକ ବନ ପୁନର୍ଜନନ ପ୍ରକ୍ରିୟା ଅଧିକ ସୁଦୃଢ଼ ହେଉଛି। ଜଳଛାୟା ପରିଚାଳନା ସହ ବନର ସ୍ୱାସ୍ଥ୍ୟ ଏବଂ ପରିବେଶୀୟ ସନ୍ତୁଳନ ରକ୍ଷାରେ ମଧ୍ୟ ଏହି ପଦକ୍ଷେପ ସକାରାତ୍ମକ ଫଳ ଦେଉଛି।
ମୃତ୍ତିକା ଓ ଜଳ ସମ୍ପଦର ସଂରକ୍ଷଣକୁ ଦୀର୍ଘମିଆଦି ପରିବେଶ ସୁରକ୍ଷାର ମୂଳ ଆଧାର ଭାବେ ଗ୍ରହଣ କରି ଅନୁଗୋଳ ବନଖଣ୍ଡ ଏକ ସବୁଜ, ସୁସ୍ଥ ଓ ସ୍ଥାୟୀ ବନ ପରିବେଶ ଗଢ଼ି ତୋଳିବା ପାଇଁ ନିରନ୍ତର ପ୍ରୟାସ ଜାରି ରଖିଛି।
