ନୂଆ ଟିମ୍ ସହ ମୋଦୀଙ୍କ ମାରାଥନ୍ ବୈଠକ; ଯୁବପିଢ଼ି ସହ ଯୋଗାଯୋଗ ବଢ଼ାଇବାକୁ ଗୁରୁତ୍ୱ
ନୂଆଦିଲ୍ଲୀ: ବିଜେପିର ନୂଆ ଜାତୀୟ ଟିମ୍ ସହ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ପ୍ରଥମ ସାକ୍ଷାତ୍କାର ଶନିବାର ନୂଆଦିଲ୍ଲୀସ୍ଥିତ ଦଳୀୟ ମୁଖ୍ୟାଳୟରେ ଅନୁଷ୍ଠିତ ହୋଇଛି। ନବନିଯୁକ୍ତ ଜାତୀୟ ପଦାଧିକାରୀଙ୍କ ସହ ହୋଇଥିବା ଏହି ବୈଠକରେ ଦଳୀୟ ସଂଗଠନକୁ ଆହୁରି ସୁଦୃଢ଼ କରିବା ସହ ଜନସାଧାରଣ, ବିଶେଷକରି ଯୁବପିଢ଼ିଙ୍କ ସହ ଯୋଗାଯୋଗ ବଢ଼ାଇବା ଉପରେ ଗୁରୁତ୍ୱ ଦିଆଯାଇଛି।
ଅଗଷ୍ଟ ୧୭ରେ ବିଜେପି ସଭାପତି ନୀତିନ ନବୀନଙ୍କ ନୂଆ ଜାତୀୟ ଟିମ୍ ଘୋଷଣା ପରେ ଏହା ମୋଦୀଙ୍କ ସହ ପ୍ରଥମ ବୈଠକ। ୬୫ ଜଣିଆ ନୂଆ ଟିମ୍ରେ ୫୧ ଜଣ ନୂଆ ମୁହଁ ସାମିଲ ହୋଇଥିବା ଜଣାପଡ଼ିଛି।
ବୈଠକ ପରେ ମୋଦୀ ସୋସିଆଲ ମିଡିଆ ‘ଏକ୍ସ’ରେ ଏହାକୁ ନୂଆ ଚିନ୍ତାଧାରା ଓ ନୂଆ ଦୃଷ୍ଟିକୋଣ ଉପରେ ଆଲୋଚନାର ଏକ ସୁଯୋଗ ବୋଲି ଉଲ୍ଲେଖ କରିଥିଲେ। ଏଭଳି ସାଂଗଠନିକ ଆଲୋଚନା ଦଳକୁ ମଜବୁତ କରିବା ସହ ଲୋକଙ୍କ ସହ ଅଧିକ ପ୍ରଭାବଶାଳୀ ଯୋଗାଯୋଗ ସ୍ଥାପନରେ ସହାୟକ ହେବ ବୋଲି ସେ କହିଥିଲେ।
ଏହା ପୂର୍ବରୁ ନୀତିନ ନବୀନ ମଧ୍ୟ ନୂଆ ଜାତୀୟ ପଦାଧିକାରୀମାନଙ୍କ ସହ ବୈଠକ କରିଥିଲେ। ଯୁବପିଢ଼ି ସହ ନିରନ୍ତର ସଂଳାପ ଏବଂ ସେମାନଙ୍କ ସମସ୍ୟା ଓ ଆକାଂକ୍ଷା ସହ ଯୋଡ଼ିହେବା ଉପରେ ଦଳ ପକ୍ଷରୁ ଗୁରୁତ୍ୱ ଦିଆଯାଉଥିବା ସୂଚନା ମିଳିଛି।
ନୂଆ ଟିମ୍ରେ ରାମ ମାଧବ ଓ ସ୍ମୃତି ଇରାନୀଙ୍କ ଭଳି ବରିଷ୍ଠ ନେତାଙ୍କୁ ଗୁରୁତ୍ୱପୂର୍ଣ୍ଣ ସାଂଗଠନିକ ଦାୟିତ୍ୱ ଦିଆଯାଇଛି। ନୂଆ ମୁହଁ ଓ ଅଭିଜ୍ଞ ନେତୃତ୍ୱର ସମନ୍ୱୟରେ ବିଜେପି ନିଜ ସାଂଗଠନିକ ଭିତ୍ତିକୁ ଆହୁରି ମଜବୁତ କରିବା ଦିଗରେ ଆଗକୁ ବଢ଼ୁଛି।
ବିଶେଷକରି ଯୁବପିଢ଼ିଙ୍କ ସହ ସିଧାସଳଖ ସଂଳାପ, ନୂଆ ପିଢ଼ିର ଚିନ୍ତାଧାରା ବୁଝିବା ଏବଂ ଦଳର ସଂଗଠନକୁ ତୃଣମୂଳ ସ୍ତରରେ ଅଧିକ ସକ୍ରିୟ କରିବା ଆଗାମୀ ଦିନରେ ବିଜେପିର ପ୍ରମୁଖ ଫୋକସ୍ ରହିପାରେ।
