୭ ବର୍ଷ ପରେ ଭାରତ ମାଟିରେ ସି ଜିନପିଙ୍ଗ, ମୋଦୀଙ୍କ ସହ ଆଲୋଚନା ଉପରେ ବିଶ୍ୱର ନଜର

ନୂଆଦିଲ୍ଲୀ: ୧୮ତମ ବ୍ରିକ୍ସ ଶିଖର ସମ୍ମିଳନୀରେ ଯୋଗଦେବା ପାଇଁ ନୂଆଦିଲ୍ଲୀରେ ପହଞ୍ଚିଛନ୍ତି ଚୀନ ରାଷ୍ଟ୍ରପତି ସି ଜିନପିଙ୍ଗ। ଶନିବାର ପାଲମ ବିମାନବନ୍ଦରରେ ତାଙ୍କ ସ୍ୱତନ୍ତ୍ର ବିମାନ ଅବତରଣ କରିବା ପରେ ଭାରତ ଗସ୍ତର ଔପଚାରିକ କାର୍ଯ୍ୟକ୍ରମ ଆରମ୍ଭ ହୋଇଛି। ଦୀର୍ଘ ସାତ ବର୍ଷର ବ୍ୟବଧାନ ପରେ ଚୀନ ରାଷ୍ଟ୍ରପତି ଭାରତ ମାଟିରେ ପାଦ ରଖିଛନ୍ତି।

ସି ଜିନପିଙ୍ଗଙ୍କ ସହ ଚୀନର ଶୀର୍ଷ କୂଟନୀତିଜ୍ଞ ଓ ବରିଷ୍ଠ ନେତାଙ୍କୁ ନେଇ ଏକ ଉଚ୍ଚସ୍ତରୀୟ ପ୍ରତିନିଧିମଣ୍ଡଳ ମଧ୍ୟ ଭାରତ ଆସିଛି। ଏହି ଗସ୍ତ ଅବସରରେ ଭାରତ-ଚୀନ ସମ୍ପର୍କରେ ନୂଆ ଅଧ୍ୟାୟ ଆରମ୍ଭ ହେବ କି ନାହିଁ, ତାହା ଉପରେ ଅନ୍ତର୍ଜାତୀୟ ସମୁଦାୟର ନଜର ରହିଛି।

ମୋଦୀ-ଜିନପିଙ୍ଗ ଆଲୋଚନା ଉପରେ ନଜର

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ସି ଜିନପିଙ୍ଗଙ୍କ ମଧ୍ୟରେ ଶନିବାର ସନ୍ଧ୍ୟା ୫ଟା ୪୫ରେ ଆଲୋଚନା ହେବାକୁ ଥିବା ସୂଚନା ମିଳିଛି। ୨୦୨୦ର ଗଲୱାନ ଉପତ୍ୟକା ସଂଘର୍ଷ ପରେ ଦୁଇ ଦେଶର ସମ୍ପର୍କରେ ତିକ୍ତତା ବୃଦ୍ଧି ପାଇଥିଲା। ସେହି ପରିପ୍ରେକ୍ଷୀରେ ଦୁଇ ନେତାଙ୍କ ସାକ୍ଷାତକୁ ଗୁରୁତ୍ୱପୂର୍ଣ୍ଣ ମନେ କରାଯାଉଛି।

ଗଲୱାନ ସଂଘର୍ଷରେ ଭାରତର ୨୦ ଜଣ ସୈନ୍ୟ ସହିଦ ହୋଇଥିଲେ। ଏହାପରଠାରୁ ସୀମା ବିବାଦକୁ ନେଇ ଦୁଇ ଦେଶ ମଧ୍ୟରେ ସମ୍ପର୍କ ପ୍ରଭାବିତ ହୋଇଥିଲା।

ଭାରତ ମଣ୍ଡପମରେ ବ୍ରିକ୍ସ ସମ୍ମିଳନୀ

ନୂଆଦିଲ୍ଲୀର ଭାରତ ମଣ୍ଡପମରେ ଶନିବାରଠାରୁ ୧୮ତମ ବ୍ରିକ୍ସ ଶିଖର ସମ୍ମିଳନୀ ଆୟୋଜିତ ହେଉଛି। ଏଥିରେ ବିଶ୍ୱର ବିଭିନ୍ନ ଦେଶର ନେତାମାନେ ଯୋଗଦେବେ। ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ ମଧ୍ୟ ଭାରତରେ ପହଞ୍ଚିଛନ୍ତି।

ସମ୍ମିଳନୀ ଅବସରରେ ବିଭିନ୍ନ ରାଜ୍ୟର ମୁଖ୍ୟମନ୍ତ୍ରୀ ଓ କେନ୍ଦ୍ରମନ୍ତ୍ରୀଙ୍କୁ ନିମନ୍ତ୍ରଣ କରାଯାଇଛି। ସୁରକ୍ଷା ଓ ଟ୍ରାଫିକ୍ ବ୍ୟବସ୍ଥାକୁ ଦୃଷ୍ଟିରେ ରଖି ମୁଖ୍ୟମନ୍ତ୍ରୀମାନେ ଏକାଠି ବସ୍ ଯୋଗେ ଭାରତ ମଣ୍ଡପମରେ ପହଞ୍ଚିବେ। ସନ୍ଧ୍ୟାରେ ବ୍ରିକ୍ସ ରାଷ୍ଟ୍ରାଧ୍ୟକ୍ଷମାନଙ୍କ ପାଇଁ ଡିନର ପାର୍ଟିର ଆୟୋଜନ କରାଯାଇଛି।

ଚୀନ-ଭାରତ ବିମାନ ସେବା ପୁଣି ଆରମ୍ଭ

ଅନ୍ୟପକ୍ଷରେ, ଚୀନ ଦକ୍ଷିଣ ଏୟାରଲାଇନ୍ସ ସେପ୍ଟେମ୍ବର ୨୧ରୁ ଗ୍ୱାଙ୍ଗଜୋ ଓ ନୂଆଦିଲ୍ଲୀ ମଧ୍ୟରେ ସିଧାସଳଖ ବିମାନ ସେବା ପୁନଃ ଆରମ୍ଭ କରିବାକୁ ଘୋଷଣା କରିଛି। ଗତ ଛଅ ବର୍ଷ ଧରି ସ୍ଥଗିତ ଥିବା ଏହି ସେବା ପୁଣି ଚାଲୁ ହେବା ଦୁଇ ଦେଶ ମଧ୍ୟରେ ଯୋଗାଯୋଗ ଓ ଯାତାୟାତ ବୃଦ୍ଧିର ସଙ୍କେତ ଦେଉଛି। କମ୍ପାନୀର ସୂଚନା ଅନୁଯାୟୀ, ସେବା ଆରମ୍ଭ ପରେ ଦକ୍ଷିଣ ଏସିଆର ଆଠଟି ରୁଟରେ ପ୍ରତି ସପ୍ତାହରେ ୧୦୦ରୁ ଅଧିକ ବିମାନ ଚଳାଚଳ କରିବ।