ବିଶ୍ୱ ଦୌଡ଼କୁଦରେ ଜ୍ୟାକବ ଓ ଡୁପ୍ଲାଣ୍ଟିସଙ୍କ ସ୍ୱର୍ଣ୍ଣିମ ସଫଳତା
ଅସ୍ତ୍ରୋପଚାର ପରେ ଟ୍ରାକ୍କୁ ଫେରିଥିବା ନରୱେର ତାରକା ଧାବକ ଜ୍ୟାକବ ଇଞ୍ଜିବ୍ରିଗ୍ଟସେନ୍ ବିଶ୍ୱ ଦୌଡ଼କୁଦ ପ୍ରତିଯୋଗିତାରେ ଚମକପ୍ରଦ ପ୍ରତ୍ୟାବର୍ତ୍ତନ କରିଛନ୍ତି। ପୁରୁଷ ୫,୦୦୦ ମିଟର ଦୌଡ଼ରେ ସ୍ୱର୍ଣ୍ଣ ପଦକ ଜିତିବା ସହ ୧୫୦,୦୦୦ ଡଲାରର ପୁରସ୍କାର ହାସଲ କରିଛନ୍ତି।
ଇଞ୍ଜିବ୍ରିଗ୍ଟସେନ୍ ୧୨ ମିନିଟ୍ ୫୯.୨୪ ସେକେଣ୍ଡରେ ଦୌଡ଼ ଶେଷ କରି ଚଳିତ ଋତୁର ନିଜର ଶ୍ରେଷ୍ଠ ସମୟ ହାସଲ କରିଥିଲେ। ଆମେରିକାର କୋଲ୍ ହକର୍ ୧୩ ମିନିଟ୍ ୦୦.୦୫ ସେକେଣ୍ଡ ସହ ରୌପ୍ୟ ଏବଂ ପାର୍କର୍ ଓଲ୍ଫ୍ ୧୩ ମିନିଟ୍ ୦୦.୧୩ ସେକେଣ୍ଡ ସହ କାଂସ୍ୟ ପଦକ ଜିତିଥିଲେ।
ଡୁପ୍ଲାଣ୍ଟିସଙ୍କ ଆଉ ଏକ ବିଶ୍ୱବିଜୟ
ସ୍ୱିଡେନ୍ର ପୋଲ୍ ଭଲ୍ଟ ତାରକା ଆର୍ମାଣ୍ଡ ‘ମୋଣ୍ଡୋ’ ଡୁପ୍ଲାଣ୍ଟିସ୍ ମଧ୍ୟ ପ୍ରତିଯୋଗିତାରେ ନିଜ ଦବଦବା ଜାରି ରଖିଛନ୍ତି। ୬.୨୦ ମିଟର ଉଚ୍ଚତା ଅତିକ୍ରମ କରି ସେ ପୁରୁଷ ପୋଲ୍ ଭଲ୍ଟରେ ସ୍ୱର୍ଣ୍ଣ ପଦକ ଜିତିଛନ୍ତି।
ତେବେ ୬.୩୨ ମିଟର ଉଚ୍ଚତା ଅତିକ୍ରମ କରି ବିଶ୍ୱରେକର୍ଡ ଭାଙ୍ଗିବାର ସୁଯୋଗ ତାଙ୍କ ହାତଛଡ଼ା ହୋଇଛି। ତିନିଥର ଚେଷ୍ଟା କରିଥିଲେ ମଧ୍ୟ ସେ ସଫଳ ହୋଇପାରିନଥିଲେ। ଗ୍ରୀସ୍ର ଇମାନୁଏଲ୍ କାରାଲିସ୍ ୬.୧୫ ମିଟର ଉଚ୍ଚତା ଅତିକ୍ରମ କରି ରୌପ୍ୟ ପଦକ ହାସଲ କରିଥିଲେ। ଚଳିତ ବର୍ଷ କାରାଲିସ୍ଙ୍କ ଉନ୍ନତ ପ୍ରଦର୍ଶନ ଡୁପ୍ଲାଣ୍ଟିସଙ୍କ ପାଇଁ ପୋଲ୍ ଭଲ୍ଟରେ ଏକ ମଜଭୁତ ପ୍ରତିଦ୍ୱନ୍ଦ୍ୱିତା ସୃଷ୍ଟି କରିଛି।
ମହିଳା ହାଇଜମ୍ପ୍ରେ ମାହୁଚିଖ୍ଙ୍କ ସ୍ୱର୍ଣ୍ଣ
ମହିଳା ହାଇଜମ୍ପ୍ରେ ୟୁକ୍ରେନ୍ର ଅଲିମ୍ପିକ୍ ବିଜେତା ୟାରୋସ୍ଲାଭା ମାହୁଚିଖ୍ ୧.୯୯ ମିଟର ଉଚ୍ଚତା ଅତିକ୍ରମ କରି ସ୍ୱର୍ଣ୍ଣ ପଦକ ଜିତିଛନ୍ତି। ଅନ୍ୟପକ୍ଷରେ, ପୁରୁଷ ହାମର୍ ଥ୍ରୋରେ ଜର୍ମାନୀର ମର୍ଲିନ୍ ହୁମେଲ୍ ୮୧.୪୬ ମିଟର ଦୂରତାକୁ ହାମର୍ ଫିଙ୍ଗି ବିଜେତା ହୋଇଛନ୍ତି।
