ମାଛ ଧରୁଥିବା ବେଳେ ମହିଳାଙ୍କୁ ଟାଣିନେଲା କୁମ୍ଭୀର
ଖରିନାସି-ରାମନଗର ନଦୀରେ ଆତଙ୍କ, ସ୍ଥାନୀୟଙ୍କ ଉଦ୍ୟମରେ ଉଦ୍ଧାର
କେନ୍ଦ୍ରାପଡ଼ା: ନଦୀରେ ମାଛ ଧରୁଥିବା ବେଳେ ଜଣେ ମହିଳାଙ୍କୁ କୁମ୍ଭୀର ଆକ୍ରମଣ କରି ପାଣି ଭିତରକୁ ଟାଣିନେବା ଘଟଣାକୁ ନେଇ କେନ୍ଦ୍ରାପଡ଼ା ଜିଲ୍ଲା ମହାକାଳପଡ଼ା ବ୍ଲକ ଅନ୍ତର୍ଗତ ଖରିନାସି ଅଞ୍ଚଳରେ ଆତଙ୍କ ସୃଷ୍ଟି ହୋଇଛି।
ସୂଚନା ଅନୁସାରେ, ଖରିନାସି ଗାଁର ଜଣେ ମହିଳା ଖରିନାସି-ରାମନଗର ନଦୀକୁ ମାଛ ଧରିବା ପାଇଁ ଯାଇଥିଲେ। ସେ ନଦୀରେ ମାଛ ଧରୁଥିବା ସମୟରେ ହଠାତ୍ ଏକ କୁମ୍ଭୀର ତାଙ୍କ ଉପରେ ଆକ୍ରମଣ କରିଥିଲା। ମହିଳାଙ୍କୁ କୁମ୍ଭୀରଟି ପାଣି ଭିତରକୁ ଟାଣିନେଇଥିବା ଦେଖି ନିକଟରେ ଥିବା ଲୋକମାନେ ଭୟଭୀତ ହୋଇପଡ଼ିଥିଲେ।
ଘଟଣା ପରେ ସ୍ଥାନୀୟ ଲୋକେ ସାହସିକତାର ସହ ତୁରନ୍ତ ନଦୀରେ ଖୋଜାଖୋଜି ଆରମ୍ଭ କରିଥିଲେ। ଦୀର୍ଘ ଉଦ୍ୟମ ପରେ ମହିଳାଙ୍କୁ ନଦୀରୁ ଉଦ୍ଧାର କରାଯାଇଥିବା ଜଣାପଡ଼ିଛି।
ଏହି ଘଟଣା ପରେ ଖରିନାସି ସମେତ ଆଖପାଖ ଅଞ୍ଚଳରେ ଭୟର ବାତାବରଣ ସୃଷ୍ଟି ହୋଇଛି। ନଦୀକୁ ମାଛ ଧରିବା କିମ୍ବା ଅନ୍ୟ କାମ ପାଇଁ ଯାଉଥିବା ଲୋକଙ୍କ ସୁରକ୍ଷା ନେଇ ଚିନ୍ତା ବଢ଼ିଛି।
