ବାରବାଟୀରେ ଗଡ଼ିଲା ‘ଓଡ଼ିଶା ଟି-୨୦ ଲିଗ୍ ସିଏମ୍ ଟ୍ରଫି’ର ଚକା

🏏 ବାରବାଟୀରେ ଗଡ଼ିଲା ‘ଓଡ଼ିଶା ଟି-୨୦ ଲିଗ୍ ସିଏମ୍ ଟ୍ରଫି’ର ଚକା

୩୦ ଜିଲ୍ଲାର ଗ୍ରାମୀଣ କ୍ରିକେଟ୍ ପ୍ରତିଭାଙ୍କୁ ମିଳିବ ବଡ଼ ମଞ୍ଚ

କଟକ/ଭୁବନେଶ୍ୱର: ଓଡ଼ିଶାର କ୍ରିକେଟ୍ ଜଗତରେ ଯୋଡ଼ି ହୋଇଛି ଆଉ ଏକ ନୂଆ ଅଧ୍ୟାୟ। କଟକର ଐତିହାସିକ ବାରବାଟୀ ଷ୍ଟାଡିଅମରେ ଆରମ୍ଭ ହୋଇଛି ‘ଓଡ଼ିଶା ଟି-୨୦ ଲିଗ୍ ସିଏମ୍ ଟ୍ରଫି-୨୦୨୬’। ଫୁଟବଲ, ଖୋ-ଖୋ, କବାଡ଼ି ଓ ଭଲିବଲ ପରେ ମୁଖ୍ୟମନ୍ତ୍ରୀ ଟ୍ରଫିରେ କ୍ରିକେଟ୍‌କୁ ପଞ୍ଚମ କ୍ରୀଡ଼ା ଭାବେ ସାମିଲ କରାଯାଇଛି।

ଉଦ୍‌ଘାଟନୀ ଅବସରରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କହିଛନ୍ତି ଯେ, ଏହି ଲିଗ୍ ରାଜ୍ୟର ୩୦ଟି ଜିଲ୍ଲାରେ ଲୁଚି ରହିଥିବା ଗ୍ରାମୀଣ କ୍ରିକେଟ୍ ପ୍ରତିଭାଙ୍କୁ ଚିହ୍ନଟ କରିବା ସହ ସେମାନଙ୍କୁ ନିଜ ଦକ୍ଷତା ପ୍ରଦର୍ଶନ ପାଇଁ ଏକ ବଡ଼ ମଞ୍ଚ ଯୋଗାଇବ।

ମୁଖ୍ୟମନ୍ତ୍ରୀଙ୍କ ମତରେ, ବର୍ତ୍ତମାନ କ୍ରୀଡ଼ା କେବଳ ପ୍ରତିଯୋଗିତାରେ ସୀମିତ ନାହିଁ; ଏହା ଯୁବପିଢ଼ି ପାଇଁ ସଫଳ କ୍ୟାରିୟରର ଏକ ମାଧ୍ୟମ ହୋଇଛି। ଟି-୨୦ ଓ ଲିଗ୍ କ୍ରିକେଟ୍‌ର ବିସ୍ତାର ଯୁବ ଖେଳାଳିଙ୍କ ପାଇଁ ନୂଆ ସୁଯୋଗ ସୃଷ୍ଟି କରିଛି।

ଲିଗ୍‌ରେ ପୂର୍ବତନ ଭାରତୀୟ କ୍ରିକେଟର ସୁରେଶ ରାଇନା ଓ ଓଡ଼ିଶାର ପୂର୍ବତନ ଅନ୍ତର୍ଜାତୀୟ କ୍ରିକେଟର ଦେବାଶିଷ ମହାନ୍ତି ଆମ୍ବାସାଡର ଭାବେ ଯୋଡ଼ି ହୋଇଛନ୍ତି। ଏହା ଯୁବ କ୍ରିକେଟରମାନଙ୍କୁ ପ୍ରେରଣା ଦେବ ବୋଲି କୁହାଯାଇଛି।

୩୧୪ ବ୍ଲକରେ ହେବ ଆଧୁନିକ ଷ୍ଟାଡିୟମ

ରାଜ୍ୟର କ୍ରୀଡ଼ା ଭିତ୍ତିଭୂମି ସମ୍ପର୍କରେ ମୁଖ୍ୟମନ୍ତ୍ରୀ କହିଛନ୍ତି, ୩୧୪ଟି ବ୍ଲକରେ ୪,୧୨୪ କୋଟି ଟଙ୍କା ବ୍ୟୟରେ ଅତ୍ୟାଧୁନିକ ଷ୍ଟାଡିୟମ ନିର୍ମାଣ କରାଯାଉଛି। ଭୁବନେଶ୍ୱର ଗୋଠପାଟଣାରେ ହାଇ-ଟେକ୍ ସ୍ପୋର୍ଟ୍ସ କମ୍ପ୍ଲେକ୍ସ ପ୍ରତିଷ୍ଠା କରାଯିବା ସହ ବାରବାଟୀ ଷ୍ଟାଡିୟମର ମଧ୍ୟ ସମ୍ପୂର୍ଣ୍ଣ ନବୀକରଣ କରି ଏହାକୁ ଦେଶର ଏକ ପ୍ରମୁଖ କ୍ରୀଡ଼ା ଭେନ୍ୟୁରେ ପରିଣତ କରିବା ନେଇ ସରକାରଙ୍କ ଯୋଜନା ରହିଛି।

ଏହାସହ ଓଡ଼ିଶା କ୍ରିକେଟ୍ ଆସୋସିଏସନ୍‌ର Under-14 କ୍ରିକେଟ୍ ଏକାଡେମୀ ପ୍ରତିଷ୍ଠା ଉଦ୍ୟମକୁ ମୁଖ୍ୟମନ୍ତ୍ରୀ ପ୍ରଶଂସା କରିଥିଲେ।

ରାଇନା କହିଲେ—ପ୍ରତିଭାଙ୍କୁ ମିଳିବ ନୂଆ ମଞ୍ଚ

ଉଦ୍‌ଘାଟନୀ ସମାରୋହରେ ସୁରେଶ ରାଇନା କହିଥିଲେ ଯେ, ବାରବାଟୀ ଷ୍ଟାଡିୟମ ସହ ତାଙ୍କର ବିଶେଷ ସ୍ମୃତି ରହିଛି। ଶ୍ରୀଲଙ୍କା ବିପକ୍ଷରେ ଭାରତୀୟ ଦଳ ପାଇଁ ଖେଳିବା ସମୟରେ ସେ ଶେଷଥର ପାଇଁ କଟକ ଆସିଥିଲେ। ଓଡ଼ିଶା ସରକାରଙ୍କ ଏଭଳି ପଦକ୍ଷେପ ଯୁବ ଖେଳାଳିଙ୍କୁ କ୍ରିକେଟ୍ ପ୍ରତି ଆଗ୍ରହୀ କରିବା ସହ ନିଜ ପ୍ରତିଭା ଦେଖାଇବାର ସୁଯୋଗ ଦେବ ବୋଲି ସେ କହିଥିଲେ।

ଲିଗ୍‌ରେ ଅଂଶଗ୍ରହଣ କରୁଥିବା ୬ଟି ଦଳ, ସେମାନଙ୍କ ଅଧିନାୟକ, ପ୍ରଶିକ୍ଷକ ଓ ଖେଳାଳିମାନଙ୍କୁ ଏହି ଅବସରରେ ଶୁଭେଚ୍ଛା ଜଣାଯାଇଥିଲା।

ଉଦ୍‌ଘାଟନୀ ସମାରୋହରେ ଶାସକ ଦଳ ମୁଖ୍ୟ ସଚେତକ ସରୋଜ କୁମାର ପ୍ରଧାନ, ବାରବାଟୀ-କଟକ ବିଧାୟିକା ସୋଫିଆ ଫିର୍‌ଦୋସ୍, କଟକ ସଦର ବିଧାୟକ ପ୍ରକାଶ ଚନ୍ଦ୍ର ସେଠୀ, କଟକ-ଚୌଦ୍ୱାର ବିଧାୟକ ସୌଭିକ ବିଶ୍ୱାଳ, ଅନୁଗୁଳ ବିଧାୟକ ତଥା OCA ଆପେକ୍ସ କାଉନସିଲ ସଦସ୍ୟ ପ୍ରତାପ ଚନ୍ଦ୍ର ପ୍ରଧାନ, ତିର୍ତ୍ତୋଲ ବିଧାୟକ ରମାକାନ୍ତ ଭୋଇ, ଡ. ଆଶୀର୍ବାଦ ବେହେରା, ଦେବାଶିଷ ମହାନ୍ତି, OCA ସଭାପତି ପଙ୍କଜ ଲୋଚନ ମହାନ୍ତି, ଉପସଭାପତି ଜଗମୋହନ ପଟ୍ଟନାୟକ ଓ ସମ୍ପାଦକ ସଞ୍ଜୟ ବେହେରାଙ୍କ ସମେତ OCA ସଦସ୍ୟ, ପ୍ରଶିକ୍ଷକ, ଖେଳାଳି ଓ ବହୁ ବିଶିଷ୍ଟ ଅତିଥି ଉପସ୍ଥିତ ଥିଲେ।