ଗ୍ୟାସ୍ ଲାଇନର ରକ୍ଷଣାବେକ୍ଷଣ କାଳରେ ଗ୍ୟାସ ଲିକ୍ ହୋଇ ୪ ଜଣ ଠିକା ଶ୍ରମିକଙ୍କ ବୁଧବାର ମୃତ୍ୟୁ : ରାଉରକେଲା
ଜେ ବି ଏନ୍, ରିପୋର୍ଟ ସୁସାନ୍ତ ଗଡନାୟକ, (୦୬/୦୧/୨୦୨୧)ରାଉରକେଲା : ରାଉରକେଲା ଇସ୍ପାତ କାରଖାନା ( ଆର୍ଏପି ) ର କୋଲ କେମିକାଲ ବିଭାଗ ( ସିସି ) ର ଗ୍ୟାସ୍ ମିଙ୍କି ବ୍ୟାଙ୍କ ଏରିଆ ( ସାଇଟ୍ – ଏ ) ଗ୍ୟାସ୍ ଲାଇନର ରକ୍ଷଣାବେକ୍ଷଣ କାଳରେ ଗ୍ୟାସ ଲିକ୍ ହୋଇ ୪ ଜଣ ଠିକା ଶ୍ରମିକଙ୍କ ବୁଧବାର ମୃତ୍ୟୁ ଘଟିଛି । ମୃତକ ଠିକା ଶ୍ରମିକଙ୍କ ମଧ୍ୟରେ ବ୍ରହ୍ମାନନ୍ଦ ପଣ୍ଡା ( ୫୧ ) , ରବୀନ୍ଦ୍ର ସାହୁ ( ୫୯ ) , ଅଭିମନ୍ୟୁ ଶାହ ( ୩୩ ) ଓ ଗଣେଶ ଚନ୍ଦ୍ର ପହିଲ ( ୫୫ ) ଥିବା ଜଣାପଡିଛି । ଏହି ଘଟଣାରେ ଆକ୍ରାନ୍ତ ଅନ୍ୟ ଦୁଇଜଣଙ୍କୁ ପ୍ରାଥମିକ ଚିକିତ୍ସା ପରେ ଛାଡ଼ି ଦିଆଯାଇଛି । ଏହି ଘଟଣାପରେ ଦୁଇଜଣ ଉପ ମହାନିର୍ଦ୍ଦେଶକ ( ଡିଜିଏମ୍ ) ଙ୍କୁ କାରଖାନା କର୍ତ୍ତୃପକ୍ଷ ନିଲମ୍ବିତ କରିଛନ୍ତି । ଏହାଛଡ଼ା ବରିଷ୍ଠ ଅଧୁକାରୀଙ୍କୁ ନେଇ ଏକ ୩ ଜଣିଆ କମିଟି ଗଠନ କରାଯାଇ ଘଟଣାର କାରଣ ସଂପର୍କରେ ତଦନ୍ତ ଆରମ୍ଭ ହୋଇଛି । ଶ୍ରମିକ ସଂଗଠନ ଓ କ୍ଷତିଗ୍ରସ୍ତ ପରିବାରଙ୍କ ଦାବିକୁ ଗ୍ରହଣକରି ପ୍ରତ୍ୟେକ ମୃତକଙ୍କ ପରିବାରକୁ ୨.୫ ଲକ୍ଷ ଟଙ୍କା ଲେଖାଏଁ ଅନୁକମ୍ପାମୂଳକ ସହାୟତା , ୧୦ ହଜାର ଲେଖାଏଁ ଟଙ୍କା ଅନ୍ତଃଷ୍ଟି ସାହାଯ୍ୟ ଏବଂ ମୃତକଙ୍କ ପରିବାରର ଜଣେ ସଦସ୍ୟଙ୍କୁ କାରଖାନାରେ ଚାକିରି ଦିଆଯିବ ବୋଲି କର୍ତ୍ତୁପକ୍ଷ ପ୍ରତିଶ୍ରୁତି ଦେଇଛନ୍ତି । ସନ୍ଧ୍ୟାରେ ଜିଲାପାଳଙ୍କ ନିର୍ଦ୍ଦେଶ କ୍ରମେ ଶବ ବ୍ୟବଚ୍ଛେଦ କରାଯାଇଥିଲା । ବିଭିନ୍ନ ଶ୍ରମିକ ସଂଗଠନର ନେତା ହସ୍ପିଟାଲରେ ପହଞ୍ଚି ଠିକା ଶ୍ରମିକଙ୍କ ସାମାଜିକ ସୁରକ୍ଷା , କର୍ମଚାରୀ ଙ୍କ ଗୁପ୍ ଇନଫ୍ୟୁରାନ୍ସ ଭଳି ଠିକାଶ୍ରମିକଙ୍କ ଦୁର୍ଘଟଣା ବୀମା କରାଯିବାକୁ ଶ୍ରମିକ ନେତାଏ ଦାବି କରିଥିଲେ । ମିଳିଥିବା ସୂଚନା ଅନୁଯାୟୀ , ସିସିଡିର ସାଇଟ୍ – ଏରେ
ରକ୍ଷଣାବେକ୍ଷଣ କାମ ଆଜିଠୁ ଆରମ୍ଭ କରାଯିବା ଲାଗି ଗତକାଲି ସ୍ଥିର ହୋଇଥିଲା । ତଦନୁଯାୟୀ , ଶ୍ରମିକ ଓ କର୍ମଚାରୀ ପହଞ୍ଚି ସକାଳେ କାମ ଆରମ୍ଭ କରିଥିଲେ । ବ୍ଲାଷ୍ଟଫଣ୍ଡେସ ଓ କୋକ୍
ଓଭେନ୍ ପଟୁ ଆସିଥିବା ଗ୍ୟାସ ପାଇପ୍ ଏବଂ ସିସିଡିର ଜଙ୍କସନ ( ଗ୍ୟାସ ମିଙ୍ଗି ବ୍ୟାଙ୍କ ) ନିକଟସ୍ଥ ପାଇରେ ଏକ ଫ୍ରାଞ୍ଜ ଭୋଲ୍ ଖୋଲାଯିବାକୁ ଥିଲା । ରକ୍ଷଣାବେକ୍ଷଣ ପ୍ରକ୍ରିୟାରେ ଏହି କାମ ଆରମ୍ଭ ହୋଇଥିଲା । ଏଠାରେ ଥିବା ପାଇପ୍ ଗୁଡ଼ିକ ଯୋଗେ କାର୍ବନ ମନୋକସାଇଡ୍ ପ୍ରବାହ ହୋଇଥାଏ । ତେବେ ପାଇପୁରୁ ଗ୍ୟାସ୍ ଖାଲି କରାଯିବା ପ୍ରକ୍ରିୟାରେ ନାଇଟ୍ରୋଜେନ୍ ଫର୍ଜ କରାଯାଇ କାର୍ବନ ମନୋକ୍ସାଇଡ୍ ଖାଲି କରାଯିବା କଥା । କେବଳ ସେତିକି ନୁହେଁ , କାମ ଆରମ୍ଭ ପୂର୍ବରୁ କେତେ ପିପିଏମ୍ ଗ୍ୟାସ୍ ପ୍ରବାହ କରୁଛି ବା ରହିଛି ତାହା ଅନୁଧ୍ୟାନ କରାଯିବା କଥା ହେଲେ ସମ୍ଭବତଃ ସେସବୁ ବିଧୂବଦ୍ଧ ଭାବେ ତଦାରଖ କରାଯାଇ ନ ଥିବାରୁ ପ୍ରାୟ ୯ଟା ବେଳେ ଫ୍ରାଞ୍ଜି ଭୋଲ୍ ଖୋଲିବା କ୍ଷଣି ଗ୍ୟାସ୍ ଲିକ୍ ହୋଇଥୁଲା । କାମ କରୁଥିବା ଠିକା ଶ୍ରମିକ ସିଧାସଳଖ ଏଥିରେ ପ୍ରଭାବିତ ହୋଇଥିଲେ । କେତେକ ଶ୍ରମିକ ଘଟଣାସ୍ଥଳରେ ବେହୋସ୍ ହୋଇ ତଳେ ପଡ଼ିଯାଇଥିଲା । ଅନ୍ୟଶ୍ରମିକ ଅସୁସ୍ଥ ହୋଇପଡ଼ିଥିଲେ । ଅଗ୍ନିଶମ ବିଭାଗ ଓ ଆମ୍ବୁଲାନ୍ସ ଯୋଗେ ଆକ୍ରାନ୍ତ ଶ୍ରମିକଙ୍କୁ ତୁରନ୍ତ କାରଖାନାରେ ଥିବା ସ୍ବାସ୍ଥ୍ୟକେନ୍ଦ୍ରକୁ ନିଆଯାଇଥିଲା । ସେଠାରୁ ଗୁରୁତର ଶ୍ରମିକଙ୍କୁ ଇସ୍ପାତ ଜେନେରାଲ ହସପିଟାଲର ଆଇସିୟୁରେ ଭର୍ତ୍ତି କରାଯାଇଥିଲା । ମାତ୍ର ଡାକ୍ତରୀ ଦଳଙ୍କ ଚେଷ୍ଟା ସତ୍ତ୍ବ ଶ୍ରମିକ ମାନଙ୍କ ଜୀବନରକ୍ଷା କରାଯାଇ ପାରିନଥିଲା । ଦିନ ପ୍ରାୟ ୧୧ଟା ୪୦ସୁଦ୍ଧା ଏହି ୪ ଜଣଙ୍କୁ ମୃତ ଘୋଷଣା କରାଯାଇଥିଲା । ଏହି ଘଟଣାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଗଭୀର ଶୋକ ପ୍ରକାଶ କରିଛନ୍ତି ।
