ତାଳଚେର ଥର୍ମାଲକୁ ଅତିଶୀଘ୍ର ପୁନଃ ଚାଲୁ ନ କଲେ କଂଗ୍ରେସ ଦଳ ରାଜରାସ୍ତାକୁ ଓହ୍ଲାଇବ- ଜିଲ୍ଲା କଂଗ୍ରେସ
ଜେ ବି ଏନ, ୦୫/୦୪/୨୦୨୧, (ରିପୋର୍ଟ, ସୁଶୀଲ କୁମାର ଆଇଚ), ଅନୁଗୋଳ ଆଜି ରବିବାର ମଧ୍ୟାହ୍ନରେ ଅନୁଗୋଳ ଜିଲ୍ଲା କଂଗ୍ରେସ କମିଟି ସ୍ଥାନୀୟ କଂଗ୍ରେସ ଭବନଠାରେ ଏକ ସାମ୍ବାଦିକ ସମ୍ମିଳନୀ ଜରିଆରେ ତାଳଚେର ଥର୍ମାଲ ପ୍ଲାଂଟକୁ ଯେଭଳି ରାଜନୈତିକ ଖେଳକରି ବନ୍ଦ କରିଛନ୍ତି, ତାର ଘୋର ବିରୋଧ କରିବା ସହ ହଜାର ହଜାର ଶ୍ରମିକଙ୍କ ପେଟକୁ ଯେଉଁ ପ୍ରକାର ଆଘାତ ଦେଇଛନ୍ତି, ତାର ପରିଣାମ ଅତିଶୀଘ୍ର ଅନୁଗୋଳବାସୀ ଶୁଝାଇବେ ବୋଲି ପ୍ରକାଶ କରିଛନ୍ତି । ୧୯୬୪ ମସିହାରେ ତତ୍କାଳୀନ ପ୍ରଧାନମନ୍ତ୍ରୀ ଜବାହରଲାଲ ଲେହେରୁ ଭିତିପ୍ରସ୍ତର ସ୍ଥାପନ କରିଥିବା ବେଳେ ୧୯୬୮ ମସିହାଠାରୁ ଏହି ପ୍ଲାଂଟ ବିଦ୍ୟୁତ ଉତ୍ପାଦନ କରି ଚାଲିଥିଲା । ଉକ୍ତ ପ୍ଲାଂଟ ଓଡିଶା ରାଜ୍ୟ ବିଦ୍ୟୁତ ବୋର୍ଡ ଜରିଆରେ ପରିଚାଳିତ ହେଉଥିବା ବେଳେ ତତ୍କାଳୀନ ଓଡିଶାର ମୁଖ୍ୟମନ୍ତ୍ରୀ ୰ ବିଜୁ ପଟ୍ଟନାୟକ କ୍ଷତିରେ ଚାଲୁଥିବା ଦର୍ଶାଇ ଏନଟିପିସିକୁ ହସ୍ତାନ୍ତର କରିଦେଇଥିଲେ ଏବଂ ସେହି ଦିନଠାରୁ ଉକ୍ତ ପ୍ଲାଂଟ ଲାଭ ଦେଇ ଆସୁଥିବା ବେଳେ ରାଜ୍ୟକୁ ବିଦ୍ୟୁତ ଯୋଗାଇ ଆସୁଥିଲା । ୟାଭିତରେ ଉକ୍ତ ପ୍ଲାଂଟ ଦୁଇଥର ଆଧୁନିକିକରଣ କରାଯାଇ ୪୬୦ ମେଗାୱାଟ ବିଦ୍ୟୁତ ଉତ୍ପାଦନ କରୁଥିଲା ଏବଂ ସେଥିରେ ପ୍ରତ୍ୟକ୍ଷ ଭାବେ ୨୫୦୦ ଶ୍ରମିକ ଉପକୃତ ହେଉଥିବା ବେଳେ ପ୍ରାୟ ୧୫୦୦୦ ପରିବାର ନିର୍ଭର କରି ଚଳି ଆସୁଥିଲେ । କେନ୍ଦ୍ରର ବିଜେପି ସରକାର ଓ ରାଜ୍ୟର ବିଜେଡି ସରକାର ନିଜର ପତିଆରାକୁ ଯାହିର କରୁବାକୁ ଯାଇ ଆଜି ଏଭଳି ଏକ ଲାଭଦାୟକ ପ୍ଲାଂଟକୁ ବନ୍ଦ କରାଯାଇଛି । ଏ ମାଟିର ପୁଅ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଉକ୍ତ ପ୍ଲାଂଟକୁ ପୁନଃ ଚାଲୁ କରିବାକୁ ଯେଭଳିଭାବେ ଗୋଟିଏ ଫୋନରେ ମାତ୍ର ଛଅ ଦିନର ଚକମା ଦେଖାଇଲେ, ଅନୁଗୋଳବାସୀ ମଧ୍ୟ ସେ ନାଟକକୁ ଦେଖିଲେ । ଆଜି ୨୦୦୦ ଶ୍ରମିକ ନିଜର କାମ ହରାଇଛନ୍ତି, ସେମାନଙ୍କର ପରିବାରର ଲୁହ ଓ କୋହ ସମ୍ପୁର୍ଣ୍ଣ ପରିବେଶକୁ ଖରାପ କରିଦେଇଛି । ଆଜିର ସାମ୍ବାଦିକ ସମ୍ମିଳନୀରେ ଜିଲ୍ଲା କଂଗ୍ରେସ ପକ୍ଷରୁ ତିନୋଟି ଦାବି ରଖାଯାଇଛି, ସେ ଦାବି ଗୁଡିକ ହେଲା ପୁରୁଣା ପ୍ଲାଂଟକୁ ଅତିଶୀଘ୍ର ଚାଲୁ କରାଯାଉ ଓ କାମ ହରାଉଥିବା ଶରମିକମାନଙ୍କୁ ସେମାନଙ୍କର ଗୁଜୁରାଣ ପୁଣି ଫେରାଇ ଦିଆଯାଉ । ଅତିଶୀଘ୍ର ୨୦୧୦ରୁ ପ୍ରସ୍ତାବିତ, ୨୦୧୮ରେ ପ୍ରଧାନମନ୍ତ୍ରୀ ଦେଇଥିବା ଶୁଭ ୧୩୨୦ ମେଗାୱାଟ ପ୍ଲାଂଟର କାର୍ଯ୍ୟାରମ୍ଭ କରାଯାଉ । ଛଟେଇ ହୋଇଥିବା ସମସ୍ତ ଶ୍ରମିକଙ୍କ ଛଟେଇ ନୋଟିସ ରଦ୍ଦ କରାଯାଇ ପୁନଃ ନିଯୁକ୍ତି ପ୍ରଦାନ କରାଯାଉ । ଉପରୋକ୍ତ ଦାବି ପ୍ରତି ଅତିଶୀଘ୍ର ଉଭୟ ସରକାର ପକ୍ଷରୁ ଯଦି କୌଣସି ପଦକ୍ଷେପ ନ ନିଅନ୍ତି, ତେବେ ଆଗାମୀ ଦିନରେ ଜିଲ୍ଲା କଂଗ୍ରେସ ରାଜରାସ୍ତାକୁ ଓହ୍ଲାଇବ ଓ ସେଥିପ୍ରତି ଉଭୟ ସରକାର ଦାୟୀ ରହିବେ । ଛାତ୍ର ଓ ଯୁବ କଂଗ୍ରେସ ପକ୍ଷରୁ ଉପରୋକ୍ତ ଦାବି ପୁରଣ ନ ହେଲେ ଅନୁଗୋଳ ଜିଲ୍ଲାରେ କେନ୍ଦ୍ରମନ୍ତ୍ରୀ, ସାସଂଦ, ବିଧାୟକମାନଙ୍କୁ ବିରୋଧ କରାଯିବ । ଉକ୍ତ ସାମ୍ବାଦିକ ସମ୍ମିଳନୀରେ ଜିଲ୍ଲା କଂଗ୍ରେସ ସଭାପତି ତଥା ଶ୍ରମିକ ନେତା ବିପ୍ଳବ ଜେନା, ପୂର୍ବତନ ରାଜ୍ୟ ମହିଳା ସଭାନେତ୍ରୀ ସସ୍ମିତା ବେହେରା, ଅନୁଗୋଳ ଟାଉନ ସଭାପତି ସୁଦୀପ ମିଶ୍ର, ଅନୁଗୋଳ ବ୍ଲକ ସଭାପତି ଅମୁଲ୍ୟ ବେହେରା,ବନରପାଳ ବ୍ଲକ ସଭାପତି ବିନୟ ମାଝି, intuc ନେତା ରାଜକିଶୋର ସାହୁ,ଛାତ୍ର କଂଗ୍ରେସ ନେତା ବାପୁଜୀ ପ୍ରଧାନ ପ୍ରମୁଖ ମଂଚାସୀନ ରହି ସାମ୍ବାଦିକମାନଙ୍କୁ ସମୁଖୀନ ହୋଇଥିଲେ । ଉକ୍ତ ସାମ୍ବାଦିକ ସମ୍ମିଳନୀରେ ଜିଲ୍ଲା ଓବିସି ସେଲ ସଭାପତି ଜିତେନ୍ଦ୍ର ସାହୁ, ଆଇନ ସେଲ ଅଧ୍ୟକ୍ଷ ଦେବେନ୍ଦ୍ର ନାଥ ମିଶ୍ର, ମିଡିଆ ସେଲର ଗୋପାଳ ନାଥ, ସୁବ୍ରତ ତ୍ରିପାଠୀ, ବିଷ୍ଣୁମୋହନ ରଥ ,ଯୁବ କଂଗ୍ରେସ ନେତା ଶିବାନୀ ଶଙ୍କର ଗୌଡ, ଆଲୋକ ଦାଶ, ଛାତ୍ରନେତା ସୌମୟରଂଜନ ସାହୁ ପ୍ରମୁଖ ଉପସ୍ଥିତ ରହି ସହଯୋଗ କରିଥିଲେ ।
