ହେରାପଞ୍ଚମୀ ରେ ଶ୍ରୀଜୀଉଙ୍କ ରଥ ଭାଙ୍ଗିଲେ ମାତା ଲକ୍ଷ୍ମୀ
ଅନୁଗୋଳ ଜିଲ୍ଲା ବଅଁରପାଳ ପଞ୍ଚ ଶ୍ରୀକ୍ଷେତ୍ର ମନ୍ଦିର ପକ୍ଷରୁ ହେରାପଞ୍ଚମୀ ଉତ୍ସବ ଅନୁଷ୍ଠିତ ହୋଇଯାଇଛି। ଶ୍ରୀ ଜଗନ୍ନାଥ ସଂସ୍କୃତିରେ ଭଗବାନଙ୍କ ମାନବୀୟ ଲୀଳା ଖେଳାର ସ୍ବତନ୍ତ୍ର ଗୁରୁତ୍ୱ ରହିଛି । ହେରା ପଞ୍ଚମୀ ଜଗନ୍ନାଥ ସଂସ୍କୃତିର ଅନ୍ୟତମ ନୀତି। ଏ ପରିପ୍ରେକ୍ଷୀରେ ଗୁଣ୍ଡିଚା ଯାତ୍ରା ଦିନ ଜଗନ୍ନାଥ ବଡ଼ଭାଇ ବଳଭଦ୍ର ଓ ଭଉଣୀ ସୁଭଦ୍ରାଙ୍କୁ ସାଥିରେ ନେଇ ମାଉସୀ ଘର ତଥା ଜନ୍ମ ବେଦୀକୁ ବୁଲି ଯାଇଥିବା ବେଳେ ସାଙ୍ଗରେ ପତ୍ନୀ ଲକ୍ଷ୍ମୀଙ୍କୁ ସାଥିରେ ନେଇ ନଥିବାରୁ ତାଙ୍କର ଅଭିମାନ ହୋଇଥିଲା । ଚାରିଦିନ ଦିନ ଧରି ଦିଅଁ ମାନେ ଶ୍ରୀ ମନ୍ଦିରରେ ଅନୁପସ୍ଥିତ ଦେଖି ସେମାନଙ୍କ ଖବର ବୁଝିବା ପାଇଁ ମାତା ଲକ୍ଷ୍ମୀ ଶ୍ରୀ ମନ୍ଦିର ଛାଡି ବାହାରିଥିଲେ । ସନ୍ଧ୍ୟା ଆଳତୀ ପରେ ଘଣ୍ଟ, ନାମ ସଙ୍କୀର୍ତ୍ତନ ବନାଟି ଖେଳ , ଆତସବାଜି ମଧ୍ୟରେ ସୁସଜ୍ଜିତ ବିମାନରେ ବସି ମା ଲକ୍ଷ୍ମୀ ମନ୍ଦିରରୁ ବାହାରି ବଅଁରପାଳ ଛକ ନିକଟରେ ଥିବା ମାଉସୀ ମା ମନ୍ଦିର ପହଞ୍ଚି ଥିଲେ । ସେଠାରେ ଉଭୟ ପକ୍ଷର ସେବାୟତ ମାନଙ୍କ ମଧ୍ୟରେ ପାରମ୍ପରିକ କଳହ ବୋଲି ହୋଇଥିଲା । ମା ଲକ୍ଷ୍ମୀ ଶ୍ରୀ ଜଗନ୍ନାଥଙ୍କ ଦର୍ଶନ ନ ପାଇ ରାଗରେ ନନ୍ଦିଘୋଷ । ରଥରୁ କାଠ ଖଣ୍ଡେ ଭାଙ୍ଗି ଫେରିଥିଲେ । ହେରା ପଞ୍ଚମୀ ଅବସରରେ ଆଡ଼ପ ମଣ୍ଡପରେ ସାଂସ୍କୁତିକ କାର୍ଯ୍ୟକ୍ରମ ସହ ଲୋକ ନୃତ୍ୟ ପରିବେଷଣ କରାଯାଇଥିଲା । ଏହି ସାଂସ୍କୃତିକ କାର୍ଯ୍ୟକ୍ରମ ଦେଖିବାକୁ ସହସ୍ରାଧିକ ଶ୍ରଦ୍ଧାଳୁଙ୍କ ଭିଡ ଦେଖିବାକୁ ମିଳିଥିଲା ।
