ଜିନ୍ଦଲ ଫାଉଣ୍ଡେସନ ପକ୍ଷରୁ ଜାତୀୟ କନ୍ୟା ସନ୍ତାନ ସପ୍ତାହ ପାଳିତ
ଅନୁଗୁଳ, ୦୬ ଫେବୃୟାରୀ : ଜିନ୍ଦଲ ଫାଉଣ୍ଡେସନ ପକ୍ଷରୁ ଜାତୀୟ କନ୍ୟା ସନ୍ତାନ ଦିବସ ପାଳନ ଅବସରରେ ଗୋଟିଏ ସପ୍ତାହ ଧରି ବିଭିନ୍ନ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଛି । ଜିଲ୍ଲା ସ୍ୱାସ୍ଥ୍ୟ ସମିତି, ଜିଲ୍ଲା ଶିଶୁ ସୁରକ୍ଷା ୟୁନିଟ୍ ଏବଂ ଆଇସିଡିଏସର ମିଳିତ ସହଯୋଗରେ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଛି । ଲିଙ୍ଗଗତ ସମାନତା ବିଷୟରେ ସଚେତନତା ସୃଷ୍ଟି କରିବା, ସମାଜରେ ଝିଅମାନଙ୍କ ଅବଦାନକୁ ସ୍ୱୀକୃତି ଦେବା ଏବଂ ଝିଅମାନଙ୍କୁ ସଶକ୍ତ କରିବା ଲକ୍ଷ୍ୟରେ ଏହି କାର୍ଯ୍ୟକ୍ରମ ଆୟୋଜିତ ହୋଇଥିଲା ।ଏହି ଅବସରରେ କନ୍ୟାରତ୍ନଙ୍କ ଗୁରୁତ୍ୱ ବିଷୟରେ ସଚେତନ କରିବା ପାଇଁ ଏକ ସଚେତନତା ରଥ ବାହାରିଥିଲା ।
ଅନୁଗୁଳ ଏଡିଏମ (ସାଧାରଣ) ଶ୍ରୀ ପତାପ ପ୍ରୀତିମୟ ଏବଂ ଏଡିଏମ (ରାଜସ୍ୱ) ଶ୍ରୀ ଉଦୟ ମହାପାତ୍ର, ସବୁଜ ପତାକା ଦେଖାଇ ଏହି ସଚେତନତା ରଥର ଶୁଭାରମ୍ଭ କରିଥିଲେ । ଅଡିଓ ଭିଜୁଆଲ ଉପକରଣ, ବ୍ୟାନର ଏବଂ ସୂଚନା ଜରିଆରେ ଲିଙ୍ଗଗତ ତାରତମ୍ୟ ଥିବା ଅଂଚଳଗୁଡ଼ିକୁ ଭ୍ରମଣ କରି ଏହି ରଥ ଲିଙ୍ଗଗତ ସମାନତା ଏବଂ ଝିଅମାନଙ୍କ ଗୁରୁତ୍ୱ ଉପରେ ଜାଗରଣ ସୃଷ୍ଟି କରିବ ।ମୁଖ୍ୟ ଅତିଥି ଶ୍ରୀ ଉଦୟ ମହାପାତ୍ର ତାଙ୍କ ଅଭିଭାଷଣରେ ଏଭଳି ଉଦ୍ୟମକୁ ପ୍ରଶଂସା କରିବା ସହ କହିଥିଲେ, କନ୍ୟା ସନ୍ତାନଙ୍କ ଉପରେ ନିବେଶ କରିବା ଆମ ଦେଶର ଭବିଷ୍ୟତରେ ନିବେଶ କରିବା ସହିତ ସମାନ ।ଜନ ଜାଗରଣ ସୃଷ୍ଟି କରିବା ଲକ୍ଷ୍ୟରେ ଏହି ଅବସରରେ ସ୍କୁଲ ଏବଂ କଲେଜର ଛାତ୍ରଛାତ୍ରୀମାନଙ୍କ ଦ୍ୱାରା ଏକ ରାଲି ବାହାରିଥିଲା ।
ହୋଡିଂ, ଲିଫଲେଟ, ଏବଂ ବ୍ୟାନର ବଂଟା ଯିବା ସହ ଝିଅମାନଙ୍କ ଅଧିକାରର ସୁରକ୍ଷା ଏବଂ ତତ୍ ସମ୍ବଳିତ ଆଇନ ସମ୍ପର୍କିତ ନାଟକ ଏବଂ ପାଲା ପ୍ରଦର୍ଶନ କରାଯାଇଥିଲା ।ଏହି ଅବସରରେ ଆୟୋଜିତ ହୋଇଥିବା ମାନସମନ୍ଥନ ବୈଠକରେ ସିଡିଏମ ଓ ପିଏଚଓ ଡାକ୍ତର ଶିବାନନ୍ଦ ମହାନ୍ତି ଅଧ୍ୟକ୍ଷତା କରିଥିଲେ । ଅନ୍ୟମାନଙ୍କ ମଧ୍ୟରେ ସିଡିପିଓ ଶ୍ରୀ ଗୌରିଶଙ୍କର ବେହେରା, ଏଡିପିଏଚଓ (ପରିବାର କଲ୍ୟାଣ) ଡାକ୍ତର ଅନ୍ତର୍ଯ୍ୟାମୀ ମିଶ୍ର, ଏଡିପିଏଚଓ (ଭେକ୍ଟର ବର୍ଣ୍ଣ) ଡାକ୍ତର ପୂର୍ଣ୍ଣିମା ଉଦଗାତା, ଡିଏସଡବ୍ଲୁଓ ଶ୍ରୀମତି ନିରୁପମା ପାଣି ଏବଂ ପ୍ରସୂତି ବିଶେଷଜ୍ଞ ଡାକ୍ତର ସୂଜାତା ଦାସ ପ୍ରମୁଖ ଉପସ୍ଥିତ ଥିଲେ । ପ୍ରତ୍ୟେକ ବକ୍ତା ଶିକ୍ଷା, ସ୍ୱାସ୍ଥ୍ୟସେବା ଏବଂ ସାମୂହିକ କାର୍ଯ୍ୟ ମାଧ୍ୟମରେ ଝିଅମାନଙ୍କୁ ସଶକ୍ତ କରିବା ଉପରେ ଗୁରୁତ୍ୱ ଦେଇଥିଲେ ।ଏହି ଅବସରରେ ଜିନ୍ଦଲ ଫାଉଣ୍ଡେସନର ଅଧ୍ୟକ୍ଷା ତଥା ଓ.ପି ଜିନ୍ଦଲ ବିଶ୍ୱବିଦ୍ୟାଳୟର କୁଳପତି ଶ୍ରୀମତି ଶାଲୁ ଜିନ୍ଦଲ କହିଛନ୍ତି, କନ୍ୟା ସନ୍ତାନମାନଙ୍କୁ ସଶକ୍ତ କରିବା ହେଉଛି ଗୋଟିଏ ରାଷ୍ଟ୍ର ନିଜକୁ ସଶକ୍ତ କରିବାର ସର୍ବୋତ୍ତମ ଏବଂ ବୁଦ୍ଧିମାନ ବାଟ ।
ମହିଳା ସଶକ୍ତକରଣ ପାଇଁ ଆମର ବହୁମୁଖୀ ବିକାଶ କାର୍ଯ୍ୟକ୍ରମ ମାଧ୍ୟମରେ ଆମେ ଝିଅମାନଙ୍କ ଶିକ୍ଷା, ସ୍ଥାୟୀ ଜୀବିକା ବିକଳ୍ପ ଏବଂ ସ୍ୱାସ୍ଥ୍ୟସେବା ପ୍ରୋତ୍ସାହନ ପାଇଁ ସହଭାଗୀ ହେବା ସହ ଭାରତର ବିକାଶ ପଥକୁ ଆହୁରୀ ବ୍ୟାପକ କରିବା ଦିଗରେ ଯୋଗଦାନ ଦେଇଆସିଛୁ ।ଜିନ୍ଦଲ ଫାଉଣ୍ଡେସନ, ସଚେତନତା ସୃଷ୍ଟି କରିବା ସହ ସଠିକ୍ ବୟସରେ ଝିଅମାନଙ୍କ ବିବାହକୁ ସମର୍ଥନ ଏବଂ ବାଲ୍ୟ ବିବାହ ରୋକିବା ଦିଗରେ କାର୍ଯ୍ୟ କରି ଆସୁଛି । ୨୦୧୧ ମସିହାରେ ଆରମ୍ଭ ହୋଇଥିବା ଜିନ୍ଦଲ ଫାଉଣ୍ଡେସନର କିଶୋରୀ ଏକ୍ସପ୍ରେସ କାର୍ଯ୍ୟକ୍ରମ ଜରିଆରେ ରକ୍ତହୀନତା ପୀଡ଼ିତ ୨.୭ ଲକ୍ଷ ଝିଅଙ୍କୁ ସହାୟତା ଯୋଗାଇ ଦିଆଯାଇଛି । ‘ଯଶସ୍ୱୀ’ ଛାତ୍ରବୃତ୍ତି କାର୍ଯ୍ୟକ୍ରମ ଜରିଆରେ ୧୧,୦୦୦ ହଜାରରୁ ଅଧିକ ଝିଅମାନଙ୍କୁ ଶିକ୍ଷା ଗ୍ରହଣ କରିବା କ୍ଷେତ୍ରରେ ସହଯୋଗର ହାତ ବଢ଼ାଇଛି । ଏହି ଫାଉଣ୍ଡେସନ, ପ୍ରଜନନ ଅଧିକାର ଏବଂ ଆବଶ୍ୟକୀୟ ସ୍ୱାସ୍ଥ୍ୟସେବା ସୁନିଶ୍ଚିତ କରିବା ସହ ମାତୃସ୍ୱାସ୍ଥ୍ୟକୁ ମଧ୍ୟ ପ୍ରୋତ୍ସାହିତ କରି ଆସୁଛି ।
