ବଅଁରପାଳ ପଞ୍ଚାୟତ ସମିତି ବୈଠକ, ଅଧ୍ୟକ୍ଷଙ୍କ ଆକ୍ଷେପ ନେଇ ସାମ୍ବାଦିକଙ୍କ ବୈଠକ ବର୍ଜନ
ବଅଁରପାଳ,୨୫.୨-ସ୍ଥାନୀୟ ବ୍ଲକ କାର୍ଯ୍ୟାଳୟ ସଭାଗୃହରେ ପଞ୍ଚାୟତ ସମିତି ବୈଠକ ବ୍ଲକ ଅଧ୍ୟକ୍ଷଙ୍କ ସଭାପତିତ୍ୱରେ ଅନୁଷ୍ଠିତ ହୋଇଯାଇଛି l ଏହି ବୈଠକରେ ମୁଖ୍ୟଅତିଥି ଭାବେ ଅନୁଗୋଳ ଢେଙ୍କାନାଳ ସଂସଦ ରୁଦ୍ର ନାରାୟଣ ପାଣି, ସମ୍ମାନୀୟ ଅତିଥି ଭାବେ ଛେଣ୍ଡିପଦା ବିଧାୟକ ଅଗସ୍ତି ବେହେରା, ସମ୍ବଲପୁର ସାଂସଦଙ୍କ ପ୍ରତିନିଧି ଅମୀୟ କୁମାର ତ୍ରିପାଠୀ,ଅନୁଗୋଳ ବିଧାୟକ ପ୍ରତାପ ଚନ୍ଦ୍ର ପ୍ରଧାନଙ୍କ ପ୍ରତିନିଧି ଛବି ମୋହନ ସାହୁ, ବ୍ଲକ ଉପାଧ୍ୟକ୍ଷା ବନିତା ସାହୁ ଓ ଗୋଷ୍ଠୀ ଉନ୍ନୟନ ଅଧିକାରୀ ଲୋଚନ ଦାସ ପ୍ରମୁଖ ମଞ୍ଚାସୀନ ଥିଲେ l ବ୍ଲକର ସମସ୍ତ ବିଭାଗୀୟ ଅଧିକାରୀ, କିଛି ଜିଲ୍ଳାସ୍ତରୀୟ ବିଭାଗୀୟ ଅଧିକାରୀ ଙ୍କ ସମେତ ବ୍ଲକ ଅନ୍ତର୍ଗତ ୩୫ ଟି ପଞ୍ଚାୟତର ସରପଞ୍ଚ, ସମିତିସଭ୍ୟ /ସଭ୍ୟା ଓ ଜିଲ୍ଲା ପରିଷଦ ସଦସ୍ୟ ମାନେ ଉପସ୍ଥିତ ଥିଲେ l ଗତ ୧୮ ତାରିଖରେ ଅନୁଷ୍ଠିତ ହେବାକୁ ଥିବା ଏହି ବୈଠକ ବିଧାନସଭା ଅଧିବେଶନ ପାଇଁ ସ୍ଥଗିତ ରଖା ଯାଇଥିଲା l ଆଜିର ଏହି ବୈଠକରେ ପୂର୍ବ ବୈଠକର ବିବରଣୀ ପଠନ ଓ ଦୃଢ଼ୀକରଣ ସହ ସରକାରଙ୍କ ବିକଶିତ ଗ୍ରାମ ବିକଶିତ ଓଡିଶା କାର୍ଯ୍ୟକ୍ରମର ପଞ୍ଚ ବାର୍ଷିକ କାର୍ଯ୍ୟ ଖସଡ଼ା ପ୍ରସ୍ତୁତି ସମ୍ବଦ୍ଧରେ ଆଲୋଚନା ଓ କାର୍ଯ୍ୟକ୍ରମର ଚୂଡାନ୍ତ ନିଷ୍ପତ୍ତି ହେବାର ଥିଲା l ତେବେ ବୈଠକ ଆରମ୍ଭରେ ବ୍ଲକ ଅଧ୍ୟକ୍ଷଙ୍କ ଉପସ୍ଥିତ ସାମ୍ବାଦିକଙ୍କ ପ୍ରତି କିଛି ଆକ୍ଷେପକୁ ନେଇ ସାମ୍ବାଦିକ ମାନେ ସଭାସ୍ଥଳ ଛାଡି ବୈଠକକୁ ବର୍ଜନ କରିଥିଲେ l ଫଳରେ ବୈଠକରେ କଣ ଆଲୋଚନା କରାଗଲା ଜଣା ପଡିଲା ନାହିଁ l ବୈଠଟି ପୂର୍ବରୁ ବ୍ଲକ ଅଧ୍ୟକ୍ଷ ଉପସ୍ଥିତ ସାମ୍ବାଦିକ ମାନଙ୍କ ଉଦ୍ଦେଶ୍ୟରେ କହିଥିଲେ ଯେ କେବଳ ଫଟୋ ଉଠେଇ ଆପଣମାନେ ବାହାରକୁ ବାହାରି ଯାଆନ୍ତୁ l ଏହାକୁ ନେଇ ସାମ୍ବାଦିକଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖା ଯାଇଥିଲା l ଜିଲ୍ଲା ଲୋକସମ୍ପର୍କ ଅଧିକାରୀଙ୍କ ଠାରୁ ସୂଚନା ପାଇ ସାମ୍ବାଦିକ ମାନେ ଖବର ସଂଗ୍ରହ କରିବାକୁ ଯାଇଥିଲେ l ଅପମାନିତ ହୋଇଥିବା ସାମ୍ବାଦିକ ମାନେ ସଭାମଞ୍ଚ ପାଖକୁ ଯାଇ ଏଭଳି ଅଭଦ୍ରାମି ବ୍ୟବହାର ର ବିରୋଧ କରିବା ସହ ସେମାନଙ୍କୁ ଦିଆ ଯାଇଥିବା ରାଇଟିଙ୍ଗ ପ୍ୟାଡ଼ ଓ କଲମ ଆଦି ମଞ୍ଚାସୀନ ଅତିଥିଙ୍କ ଟେବୁଲ ଉପରେ ରଖିଦେଇ ବୈଠକ ବର୍ଜନ କରିଥିଲେ l ବୈଠକ ପରେ ସାମ୍ବାଦିକ ମାନେ ବ୍ଲକ ଅଧ୍ୟକ୍ଷଙ୍କୁ ଏହାର ସ୍ପଷ୍ଟୀକରଣ ମାଗିଥିଲେ l ଉତ୍ତରରେ ଅଧ୍ୟକ୍ଷ କହିଥିଲେ ଯେ ସାମ୍ବାଦିକ ମାନଙ୍କୁ ଅପମାନିତ କରିବାର ଉଦ୍ଦେଶ୍ୟ ନଥିଲା l ସାମ୍ବାଦିକଙ୍କୁ ସମ୍ମାନୀତ କରେ l କାର୍ଯ୍ୟ ବ୍ୟସ୍ତତା ମଧ୍ୟରେ ପାଟିରୁ ଏପରି ବାହାରି ଯାଇଛି କହିବା ସହ ବକ୍ତବ୍ୟ ପ୍ରତ୍ୟାହାର କରିଥିଲେ l ଅନ୍ୟ ପକ୍ଷରେ ସାଂସଦ ଶ୍ରୀଯୁକ୍ତ ପାଣି ଓ ଛେଣ୍ଡିପଦା ବିଧାୟକ ଶ୍ରୀଯୁକ୍ତ ବେହେରା କହିଥିଲେ ଯେ ସରକାରଙ୍କ ଉନ୍ନୟନ ମୂଳକ କାର୍ଯ୍ୟକଳାପକୁ ଲୋକଲୋଚନକୁ ଆଣିବା ପାଇଁ ସାମ୍ବାଦିକ ମାନେ ହେଲେ ମାଧ୍ୟମ ବୋଲି କହିବା ସହ ଅଧ୍ୟକ୍ଷଙ୍କ ଏଭଳି ମନ୍ତବ୍ୟ ଦେବାର ନଥିଲା ବୋଲି ମତ ଦେଇଥିଲେ l
