ନୂଆଦିଲ୍ଲୀ: ପହଲଗାମ ଆତଙ୍କବାଦୀ ଆକ୍ରମଣର ପ୍ରିତଶୋଧ କାର୍ଯ୍ୟାନୁଷ୍ଠାନ କରି ଅପରେସନ ସିନ୍ଦୂର ମାଧ୍ୟମରେ ପାକିସ୍ତାନରେ ଥିବା ନଅଟି ଆତଙ୍କବାଦୀ କ୍ୟାମ୍ପକୁ ଧ୍ୱଂସ କରିଛି ଭାରତ । ଏହାପରେ ପାକିସ୍ତାନ ବିକଳ ହୋଇ ଭାରତର ଚାରୋଟି ରାଜ୍ୟର ଅନେକ ସ୍ଥାନରେ ଡ୍ରୋନ ଆକ୍ରମଣ କରିବା ସହ ସୀମାରେ ଅସ୍ତ୍ରବିରତୀ ଉଲ୍ଲଙ୍ଘନ କରିଚାଲିଛି ଆଉ ଏହାର ପ୍ରଚଣ୍ଡ ଜବାବ ଦଉଛି ଭାରତ ।
ଏହି ସମୟ ଭିତରେ ଦେଶବାସୀଙ୍କୁ ବିଚଳିତ ଓ ଭୟଭୀତ ନହେବାକୁ କେନ୍ଦ୍ର ଓ ରାଜ୍ୟ ସରକାରଙ୍କ ପକ୍ଷରୁ ବାରମ୍ବାର କୁହାଯାଉଛି ।ଏହି ପ୍ରରିପେକ୍ଷୀରେ ସାରା ଦେଶରେ ପର୍ଯ୍ୟାପ୍ତ ପରିମାଣର ଖାଦ୍ୟ ସାମଗ୍ରୀ ଉପଲବ୍ଧ ଥିବା କହିଛନ୍ତି କେନ୍ଦ୍ର ଖାଦ୍ୟ ଏବଂ ଖାଉଟି ବ୍ୟାପାର ମନ୍ତ୍ରୀ । ତେଣୁ ବ୍ୟସ୍ତ ହେବାର କୌଣସି କାରଣ ନାହିଁ ବୋଲି କେନ୍ଦ୍ର ଖାଉଟି ବ୍ୟାପାର, ଖାଦ୍ୟ ଏବଂ ସାଧାରଣ ବଣ୍ଟନ ମନ୍ତ୍ରୀ ପ୍ରହଲ୍ଲାଦ ଜୋଶୀ କହିଛନ୍ତି ।ମନ୍ତ୍ରୀ ପ୍ରହଲ୍ଲାଦ ଜୋଶୀ ଆହୁରି କହିଛନ୍ତି ଯେ, ‘ମୁଁ ସମସ୍ତଙ୍କୁ ଆଶ୍ୱସ୍ତ କରିବାକୁ ଚାହୁଁଛି ଯେ ବର୍ତ୍ତମାନ ଆମ ପାଖରେ ସାଧାରଣ ଆବଶ୍ୟକତାଠାରୁ ବହୁ ଗୁଣ ଅଧିକ ଖାଦ୍ୟ ଷ୍ଟକ୍ ରହିଛି । ଚାଉଳ, ଗହମ, କିମ୍ବା ବୁଟ, ହରଡ଼, ମସୁର, ମୁଗ ପରି ଡାଲି ପର୍ଯ୍ୟାପ୍ତ ପରିମାଣରେ ରହିଛି । ଏହାର କୌଣସି ଅଭାବ ନାହିଁ, ଏବଂ ନାଗରିକମାନଙ୍କୁ ଭୟଭୀତ ନ ହେବାକୁ କିମ୍ବା ଖାଦ୍ୟ ଶସ୍ୟ କିଣିବା ପାଇଁ ବଜାରକୁ ଧାଇଁ ନ ଯିବାକୁ ପରାମର୍ଶ ଦିଆଯାଉଛି,’ ବୋଲି ସେ କହିଛନ୍ତି ।କେନ୍ଦ୍ର ମନ୍ତ୍ରୀ ଭ୍ରମାତ୍ମକ ରିପୋର୍ଟର ଶିକାର ନ ହେବାକୁ ଦୃଢ଼ ଭାବରେ ସତର୍କ କରାଇ ଦେଇଛନ୍ତି । ତାଙ୍କ ଟ୍ୱିଟରେ ସେ କହିଛନ୍ତି, ‘ଦେଶରେ ଖାଦ୍ୟ ଷ୍ଟକ୍ ସମ୍ପର୍କରେ ଭ୍ରମାତ୍ମକ ପ୍ରଚାର ବାର୍ତ୍ତାରେ ବିଶ୍ୱାସ କରନ୍ତୁ ନାହିଁ । ଆମ ପାଖରେ ଆବଶ୍ୟକୀୟ ମାନଦଣ୍ଡ ଠାରୁ ବହୁତ ଅଧିକ ଖାଦ୍ୟ ମହଜୁଦ ଅ ଛି। ଅତ୍ୟାବଶ୍ୟକ ସାମଗ୍ରୀର ବ୍ୟବସାୟ କରୁଥିବା ବ୍ୟବସାୟୀ, ପାଇକରୀ, ଖୁଚୁରା ବ୍ୟବସାୟୀ କିମ୍ବା ବ୍ୟବସାୟିକ ସଂସ୍ଥାଗୁଡ଼ିକୁ ଆଇନ ପ୍ରବର୍ତ୍ତନ ସଂସ୍ଥା ସହିତ ସହଯୋଗ କରିବାକୁ ନିର୍ଦ୍ଦେଶ ଦିଆଯାଇଛି । ଅତ୍ୟାବଶ୍ୟକ ସାମଗ୍ରୀ ଆଇନର ପ୍ରାସଙ୍ଗିକ ଧାରା ଅନୁଯାୟୀ ଗଚ୍ଛିତ କିମ୍ବା ହୋର୍ଡ଼ିଂ କରୁଥିବା ଯେକୌଣସି ବ୍ୟକ୍ତିଙ୍କୁ ଅତ୍ୟାବଶ୍ୟକ ସାମଗ୍ରୀ ଆଇନର ପ୍ରାସଙ୍ଗିକ ଧାରା ଅନୁଯାୟୀ ଦଣ୍ଡିତ କରାଯିବ।’ବର୍ତ୍ତମାନ ଚାଉଳ ଷ୍ଟକ୍ ୧୩୫ ଏଲଏମଟି ବଫର ମାନଦଣ୍ଡ ବିପକ୍ଷରେ ୩୫୬.୪୨ ଲକ୍ଷ ମେଟ୍ରିକ୍ ଟନ୍ (ଏଲଏମଟି) ରହିଛି । ସେହିପରି, ଗହମ ୨୭୬ ଏଲଏମଟି ବଫର ମାନଦଣ୍ଡ ବିପକ୍ଷରେ ୩୮୩.୩୨ ଏଲଏମଟି ରହିଛି । ଆବଶ୍ୟକୀୟ ବଫର ମାନଦଣ୍ଡ ତୁଳନାରେ ପର୍ଯ୍ୟାପ୍ତ ବଳକା ଖାଦ୍ୟ ରହିଥିବା ହେତୁ, ଦେଶବ୍ୟାପୀ ଖାଦ୍ୟ ସୁରକ୍ଷା ସୁନିଶ୍ଚିତ କରାଯାଇଛି ।ଏହା ବ୍ୟତୀତ, ଭାରତରେ ବର୍ତ୍ତମାନ ପ୍ରାୟ ୧୭ ଏଲଏମଟି ଖାଇବା ତେଲ ଷ୍ଟକ୍ ରହିଛି । ଘରୋଇ ଭାବରେ, ଚଳିତ ଉତ୍ପାଦନ ଋତୁରେ ସୋରିଷ ତେଲର ଉପଲବ୍ଧତା ପ୍ରଚୁର ପରିମାଣରେ ରହିଛି, ଯାହା ଖାଦ୍ୟ ତେଲ ଯୋଗାଣକୁ ଆହୁରି ବୃଦ୍ଧି କରୁଛି । ଚଳିତ ଚିନି ଋତୁ ୭୯ ଏଲଏମଟି କ୍ୟାରି-ଓଭର ଷ୍ଟକ୍ ସହିତ ଆରମ୍ଭ ହୋଇଥିଲା । ଇଥାନଲ୍ ଉତ୍ପାଦନ ପାଇଁ ୩୪ ଏଲଏମଟି ର ପରିବର୍ତ୍ତନ ପରେ ଉତ୍ପାଦନ ୨୬୨ ଏଲଏମଟି ହେବ ବୋଲି ଆକଳନ କରାଯାଇଛି ।ବର୍ତ୍ତମାନ ସୁଦ୍ଧା, ପ୍ରାୟ ୨୫୭ ଏଲଏମଟି ଚିନି ଉତ୍ପାଦନ ହୋଇସାରିଛି । ୨୮୦ ଏଲଏମଟି ର ଘରୋଇ ବ୍ୟବହାର ଏବଂ ୧୦ ଏଲଏମଟି ର ରପ୍ତାନିକୁ ବିଚାରକୁ ନେଇ, ଶେଷ ଷ୍ଟକ୍ ପ୍ରାୟ ୫୦ ଏଲଏମଟି ହେବ ବୋଲି ଆଶା କରାଯାଉଛି ଯାହା ଦୁଇ ମାସର ବ୍ୟବହାର ଅପେକ୍ଷା ଅଧିକ । ଅନୁକୂଳ ଜଳବାୟୁ ପରିସ୍ଥିତି ଯୋଗୁଁ ୨୦୨୫-୨୬ ଚିନି ଋତୁ ପାଇଁ ଉତ୍ପାଦନ ସମ୍ଭାବନା ମଧ୍ୟ ଆଶାଜନକ ରହିଛି ବୋଲି ମନ୍ତ୍ରୀ କହିଛନ୍ତି ।
