ବର୍ଷାଋତୁରେ ଲୋକଙ୍କୁ ଚିନ୍ତାରେ ପକାଉଛି ହୋଟେଲ ଗୁଡ଼ିକର ବାସିଖାଦ୍ୟ
ତାଳଚେର, ୧୪/୦୭ – ଦୂଷିତ ପାଇପ୍ ପାଣି, ହୋଟେଲ୍ ଫାଷ୍ଟଫୁଡ଼୍ ଓ ଅଧିକାଂଶ ମିଠା ଦୋକାନ ଗୁଡ଼ିକରେ ବାସୀଖାଦ୍ୟ ଲୋକଙ୍କୁ ଚିନ୍ତାରେ ପକାଉଥିବା ବେଳେ ଏହି ବାସୀଖାଦ୍ୟ ଖାଇ ବହୁ ଲୋକ ପେଟରୋଗ ଓ ଚର୍ମରୋଗରେ ଆକ୍ରାନ୍ତ ହେବାର ଆଶଙ୍କା ବୋଲି ସାଧାରଣ ଲୋକମାନେ ଚିନ୍ତା ପ୍ରକଟ କରୁଛନ୍ତି । ସାଧାରବଣତଃ ମଶା, ମାଛି, ଡ଼ାଉଁଶ ବର୍ଷା ଦିନ ଆସିଲେ ଏମାନଙ୍କ ଦ୍ୱାରା ଝାଡ଼ାବାନ୍ତିର ରୋଗ ବ୍ୟାପୀଥାଏ । ତେବେ ଲୋକଙ୍କ ପାଖରେ ଯେପରି ବିଶୁଦ୍ଧ ପାଇପ୍ ପାଣି ପଂହଚି ପାରିବ ସେ ଦିଗରେ ପ୍ରଶାସନ ପକ୍ଷରୁ ତତ୍ପରତା ପାଇବା ଆବଶ୍ୟକ । ସେହିପରି ପ୍ରଶାସନିକ ସ୍ତରରେ ଏହାକୁ ନେଇ ଏକ ବୈଠକ କରାଯିବା ଆବଶ୍ୟକ ବୋଲି ବିଭିନ୍ନ ମହଲରେ ମତପ୍ରକାଶ ପାଇଛି । ଦୋକାନ ବଜାରରେ ଗ୍ରାହକ ମାନଙ୍କୁ ପରସା ଯାଉଥିବା ବାସି ଖାଦ୍ୟ ଉପରେ କଡ଼ାକଡ଼ି ପଦକ୍ଷେପ ଗ୍ରହଣ କରାଯାଉ ନଚେତ୍ ହଇଜା ଆଶଙ୍କାକୁ ଏଡ଼ାଇ ଦିଆଯାଇନପାରେ । ଖାଦ୍ୟ ସୁରକ୍ଷା ବିଭାଗ ପକ୍ଷରୁ ଘନଘନ ଚଢ଼ାଉ କରାଯାଇ ବାସୀ ଓ ପଚାଷଢ଼ା ଖାଦ୍ୟ, ପାନୀୟଜଳ, ପରିଷ୍କାର ପରିଚ୍ଛନ୍ନତା ଏପରିକି, ମାଛି ବସୁଥିବା ଖାଦ୍ୟ ଉପରେ ରୋକ ଲଗାଇବାର ଆବଶ୍ୟକତା ରହିଥିବା ବେଳେ ତାଉପରେ ସମ୍ପୃକ୍ତ କର୍ତୁପକ୍ଷ ସେହିଭଳି ଆଖିଦୃଶିଣିଆ ପଦକ୍ଷେପ ନେଉନଥିବା ଅଭିଯୋଗ ହେଉଛି । କେତେକ ସ୍ଥାନରେ ରାସ୍ତା ପାଶ୍ୱର୍ରେ ଫାଷ୍ଟଫୁଡ଼୍ ଦୋକାନ ଖୋଲି ଅସ୍ୱାସ୍ଥ୍ୟକର ପରିବେଶରେ ଖାଦ୍ୟ ପ୍ରସ୍ତୁତ କରାଯାଇ ଖାଦ୍ୟକୁ ଆକର୍ଷିତ କରିବାକୁ ବିଭିନ୍ନ ରଙ୍ଗ ମିଶ୍ରଣ କରାଯାଉଥିବା ବେଳେ ବହୁ ଫାଷ୍ଟଫୁଡ଼୍ ଦୋକାନରେ ମଧ୍ୟ ବାସିଖାଦ୍ୟ ଦିଆଯାଉଛି ବୋଲି କୁହାଯାଉଛି । ସେହିପରି କେତେକ ମିଠା ଦୋକାନରେ ଏହି ଘଟଣାମାନ ଦେଖିବାକୁ ମିଳୁଛି । ଫଳରେ ଲୋକମାନେ ଏହି ଖାଦ୍ୟଖାଇ ରୋଗାକ୍ରାନ୍ତ ହେବାର ଆଶଙ୍କା ଦୃଢ଼ୀଭୂତ କରୁଛି । ସରକାରୀ ନିୟମ ଅନୁଯାୟୀ ମିଠା ପ୍ରସ୍ତୁତକାରୀ ସଂସ୍ଥା ମିଠା ପ୍ରସ୍ତୁତ କରି ଉକ୍ତ ମିଠା ଗୁଡ଼ିକୁ ଯେଉଁ ପ୍ୟାକେଟରେ ରଖାଯାଉଛି ତା ଉପରେ ତାରିଖ ଏବଂ ବ୍ୟବହାର ର ଶେଷଦିନ ଲେଖିବାର ନିମୟ ଥିଲେ ମଧ୍ୟ କେହି ହେଲେ ଏହି ନିୟମକୁ ପାଳନ କରୁନାହାନ୍ତି । ସେହିପରି ରାସ୍ତା ପାଶ୍ୱର୍ରେ ଥିବା କିଛି ଜଳଖିଆ ବ୍ୟବସାୟୀ ସକାଳର ଜଳଖିଆ ସନ୍ଧ୍ୟାରେ ଏବଂ ରାତିର ବଳକା ଜଳଖିଆ ସକାଳେ ବିକ୍ରୟ କରୁଥିବା ମଧ୍ୟ ଅଂଚଳବାସୀଙ୍କ ନିକଟରୁ ଶୁଣିବାକୁ ମିଳେ । ଠେଲାଗାଡ଼ି ଯୋଗେ ଚାର୍ଟ, ଗୁପ୍ଚୁପ୍, ଦହିବରା, ତେଲଭାଜି ବିଭିନ୍ନ ମନୋଲୋଭଣିଆ ବାସିଖାଦ୍ୟ ବିକ୍ରି କରାଯାଉଥିବା ମଧ୍ୟ କେତେକ ସମୟରେ ଅଭିଯୋଗ ହେଉଛି । ଖାଦ୍ୟ ସୁରକ୍ଷା ବିଭାଗ ବର୍ଷାଋତୁକୁ ଦୃଷ୍ଟି ଦେଇ ଦୃଢ଼କାର୍ଯ୍ୟାନୁଷ୍ଠାନ ଗ୍ରହଣ କରି ବାସିଖାଦ୍ୟ ବିକ୍ରୟ କରୁଥିବା ଦୋକାନୀଙ୍କ ଠାରୁ ଜୋରିମନା ଆଦାୟ କରାଗଲେ ହୁଏତ ଏହାର ବିକ୍ରି କମିଯିବା ସହ ଜନସାଧାରଣ ସତର୍କତା ଅବଲମ୍ବନ ପାରିବେ ବୋଲି ସାଧାରଣରେ ଚର୍ଚ୍ଚା ହେଉଛି ।
