ପାନୀୟ ଜଳରେ ଅବ୍ୟବସ୍ଥା ଓ ଏମସିଏଲର ସିଏସଆର କାର୍ଯ୍ୟରେ ଅହେତୁକ ବିଳମ୍ବ ଆନ୍ଦୋଳନକୁ ଓହ୍ଲାଇବେ ଘଣ୍ଟପଡା ପଂଚାୟତବାସୀ
ତାଳଚେର,୧୮/୭: ତାଳଚେର ବ୍ଲକ ଘଣ୍ଟପଡା ଗ୍ରାମ ପଂଚାୟତରେ ପାନୀୟ ଜଳ ସୁପରିଚାଳନା ବ୍ୟବସ୍ଥା ଓ ଏମସିଏଲର ସିଏସଆର କାର୍ଯ୍ୟ ଅହେତୁକ ବିଳମ୍ବ ନେଇ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଉଦ୍ଦେଶ୍ୟରେ ପଂଚାୟତବାସୀଙ୍କ ତରଫରୁ ଆଜି ଏକ ଦାବୀପତ୍ର ତାଳଚେର ଉପଜିଲ୍ଲାପାଳଙ୍କ ଜରିଆରେ ପ୍ରଦାନ କରାଯାଇ ଦାବୀଗୁଡ଼ିକ ପୂରଣ ନହେଲେ ଆନ୍ଦୋଳନ କରାଯିବ ବୋଲି ଜଣାଇ ଦିଆଯାଇଛି । ବର୍ତମାନ ଘଣ୍ଟପଡା ପଂଚାୟତରେ ପାନୀୟ ଜଳର ଉତ୍କଟ ସମସ୍ୟା ଦେଖାଦେଇଛି । ସେହିପରି ପଂଚାୟତରେ ବିଭିନ୍ନ ଉନ୍ନତିମୂଳକ କାର୍ଯ୍ୟ ମଧ୍ୟ ହୋଇପାରୁନାହିଁ । ଏହି ସମସ୍ତ ପ୍ରସଙ୍ଗକୁ ନେଇ ପଂଚାୟତବାସୀଙ୍କ ପକ୍ଷରୁ ଆନ୍ଦୋଳନ କରାଯିବା ପାଇଁ ଗତ ତା୧୭.୦୯.୨୦୨୪ରିଖରେ ପତ୍ର ମାଧ୍ୟମରେ ପ୍ରଶାସନକୁ ଜଣାଯାଇଥିଲା । ସମସ୍ୟାର ସମାଧାନ ପାଇଁ ଉପଜିଲ୍ଲାପାଳଙ୍କ ଅଧ୍ୟକ୍ଷତାରେ ଏମ୍.ସି.ଏଲ କର୍ତୃପକ୍ଷ, ଆରଡବ୍ଲ୍ୟୁଏସଏସ ବିଭାଗ ଏବଂ ପଂଚାୟତବାସୀଙ୍କୁ ନେଇ ଏକ ତ୍ରିପାକ୍ଷିକ ବୈଠକ ଦ୍ୱାରା ସମାଧାନ “ଚୁକ୍ତିପତ୍ର” ସ୍ୱାକ୍ଷର ହୋଇ ୬ ରୁ ୭ ମାସ ଭିତରେ ପାନୀୟ ଜଳର ସମସ୍ୟା ସହିତ ଅନ୍ୟାନ୍ୟ କାର୍ଯ୍ୟଗୁଡିକ ସଂପୂର୍ଣ୍ଣ କରିବା ପାଇଁ ଲିଖିତ ପ୍ରତିଶୃତି ଦିଆଯାଇଥିଲା । ତେବେ ଉକ୍ତ ଦାବୀଗୁଡ଼ିକ ଉପରେ ଆଜି ପର୍ଯ୍ୟନ୍ତ କୌଣସି କାର୍ଯ୍ୟର ଅଗ୍ରଗତି ହୋଇପାରିନାହିଁ । ଏଠାରେ ଲୋକମାନେ ଏମସିଏଲ ଦ୍ୱାରା ପ୍ରଦୁଷଣରେ ପ୍ରଭାବିତ ହୋଇ ବିଭିନ୍ନ ମାରାତ୍ମକ ରୋଗରେ ଆକ୍ରାନ୍ତ ହୋଇ ଅକାଳରେ ଜୀବନ ହାରୁଛନ୍ତି । କିନ୍ତୁ ତାହାର ପ୍ରତିକାର ପାଇଁ କମ୍ପାନୀ କର୍ତୃପକ୍ଷ ତରଫରୁ କୌଣସି ଆଖିଦୃଶିଆ ପଦକ୍ଷେପ ନିଆଯାଇନାହିଁ ବୋଲି ଦାବୀ ପତ୍ରରେ ଉଲ୍ଲେଖ କରାଯାଇଛି । ସେହିପରି ପଂଚାୟତବାସୀଙ୍କୁ ଆବଶ୍ୟକୀୟ ପାନୀୟ ଜଳ ଯୋଗାଣ,ଡ୍ରେନ ନିର୍ମାଣ,କଲ୍ୟାଣ ମଣ୍ଡପ ପ୍ରତିଷ୍ଠା, ଜଳସେଚନ ବ୍ୟବସ୍ଥା,ରାସ୍ତା ଆଲୋକୀକରଣ,ମାର୍କେଟ କମ୍ପେ୍ଲକ୍ସ ଓ ରାସ୍ତାଘାଟ ନିର୍ମାଣ ଏବଂ ପଂଚାୟତର ବେକାର ଯୁବକ ଯୁବତୀମାନଙ୍କୁ ନିଯୁକ୍ତି ସମ୍ପୃକ୍ତ କର୍ତୃପକ୍ଷ ସମ୍ମତି ପ୍ରକାଶ କରିଥିଲେ । କିନ୍ତୁ ଅଦ୍ୟାବଧି କିଛି ଦାବୀ ମଧ୍ୟ ପୂରଣ କରାଯାଇନାହିଁ । ଏଣୁ ଏହି ଦାବୀପତ୍ର ଦେବାର ୭ ଦିନ ମଧ୍ୟରେ କୌଣସି ସମାଧାନ ନହେଲେ ପଂଚାୟତବାସୀଙ୍କ ତରଫରୁ ରେଳରୋକ ସହିତ ଜଗନ୍ନାଥ କ୍ଷେତ୍ର କାର୍ଯ୍ୟାଳୟକୁ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ବନ୍ଦ କରାଯିବାକୁ ଜଣାଇ ଦିଆଯାଇଛି । ଏଥିସହ ଏହାର ଏକାକିତ ନକଲ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ଢେଙ୍କାନାଳ ସାଂସଦ,ଅନୁଗୋଳ ଜିଲ୍ଲାପାଳ,ଏମ.ସି.ଏଲ. ର ସିଏମଡି, ଏମ.ସି.ଏଲ. ର ପରିଚାଳନା ନିର୍ଦ୍ଦେଶକ, ଜଗନ୍ନାଥ କ୍ଷେତ୍ରର ଜିଏମ୍ ଅଶୋକ କୁମାର ଧଳ,ଲିଙ୍ଗରାଜ ଜିଏମ୍ ସୁବ୍ରତ ବିଶ୍ୱାଳ, ତାଳଚେର ଉପଖଣ୍ଡ ଆରକ୍ଷୀ ଅଧୀକ୍ଷକ ଓ କୋଲିୟରୀ ଥାନା ଅଧିକାରୀଙ୍କୁ ପ୍ରଦାନ କରାଯାଇଛି । ଘଣ୍ଟପଡ଼ା ଗ୍ରମା ପଂଚାୟତର ସରପଂଚ ଶସ୍ମିତା ବିଶ୍ୱାଳ,ନାଏବ ସରପଂଚ ରାଜୀବ ଦାସ,ଅମୀୟ ରତ୍ନ ସାହୁ, ହରେଶ ଦାସ,ପୂର୍ବତନ ସରପଂଚ ସୁନିଲ ବିଶ୍ୱାଳ, ଅବିନାଶ ସାହୁ,ଅଶୋକ କୁମାର ଦାସ,ଲିପୁ ଦେହୁରୀ,ଅନିଲ ପ୍ରଧାନ,ଆରବ ସାହୁ ଏବଂ ମଣ୍ଟୁ ସାହୁଙ୍କ ତରଫରୁ ଏହି ଦାବୀପତ୍ର ପ୍ରଦାନ କରାଯାଇ ବିହିତ ପଦକ୍ଷେପ ନେବା ପାଇଁ କୁହାଯାଇଛି ।
