ତୃଟିପୂର୍ଣ୍ଣ ଆଧାରକାର୍ଡ଼ ସଠିକତା ଓ ଅପଡ଼େଟ୍କୁ ନେଇ ସର୍ବସାଧାରଣ ଦହଗଞ୍ଜ
ତାଳଚେର, ୨୭/୦୫ ଆଜିକା ଦିନରେ ଯେକୌଣସି କାର୍ଯ୍ୟ ହେଉ କି, ସରକାରୀ, ବେସରକାରୀ କ୍ଷେତ୍ରରେ ହେଉ ଆଧାର ପ୍ରମାଣପତ୍ର ନିତ୍ୟାନ୍ତ ଜରୁରୀ ହୋଇପଡ଼ିଛି । ଏପରିକି, ବିନା ଆଧାର ପ୍ରମାଣପତ୍ରରେ ଲୋକଙ୍କର କୌଣସି କାର୍ଯ୍ୟ ହେଉନଥିବା ମଧ୍ୟ ଦେଖିବାକୁ ମିଳିଛି । ସବୁକ୍ଷେତ୍ରରେ ଆଧାର…ଆଧାର..ଆଧାର! ସରକାରଙ୍କ ପକ୍ଷରୁ ଯେକୌଣସି ଯୋଜନା ପ୍ରଣୟନ କରାଯାଉଛି ସେହି ଯୋଜନାକୁ ଯୋଗ୍ୟ ହିତାଧିକାରୀ ମାନେ ପାଇବା ଆଶାରେ ପ୍ରଥମେ ନିଜ ଆଧାରକାର୍ଡ଼କୁ ଦେଖୁଛନ୍ତି । ଆଧାର ପ୍ରମାଣପତ୍ରରେ କାହାର ନାମ ସଠିକ ନଥିବା ବେଳେ କାହାର ପିତାଙ୍କ ନାମ, କିମ୍ବା ମୋବାଇଲ ନମ୍ବର ବିହୀନ ଆଧାରକାର୍ଡ଼ । ଏସବୁର ସଠିକତା କରିବାକୁ ହେଲେ ଲୋକମାନଙ୍କୁ ବହୁ ହଇରାଣ ହରକତ ମଧ୍ୟ ହେଉଥିବା ଅନେକ ସମୟରେ ଦେଖାଯାଉଛି । ବର୍ତମାନ ସରକାରଙ୍କ ଦ୍ୱାରା ସୁଭଦ୍ରା ଯୋଜନା ପ୍ରଣୟନ କରାଯାଇଥିବାକୁ ନେଇ ମାଆମାନେ ଜନସେବାକେନ୍ଦ୍ରରେ ଲମ୍ବାଧାଡ଼ି କରି ଅନଲାଇନ୍ ଆବେଦନ କରୁଛନ୍ତି । ଏବଂ କିଛି ମାଆମାନଙ୍କର ଆଧାରକାର୍ଡ଼ ତୃଟି ଯୋଗୁଁ ସେମାନେ ଆଧାରକାର୍ଡ଼ କେନ୍ଦ୍ରରେ ମଧ୍ୟ ଭୋକ ଉପାସରେ ଦୀର୍ଘ ସମୟଧରି ଅପେକ୍ଷା କରି ରହୁଛନ୍ତି । ଏଇ କିଛି ଦିନ ହେବ ବ୍ୟାଙ୍କ, ଜନସେବାକେନ୍ଦ୍ର, ପୋଷ୍ଟଅଫିସ୍ ଓ ଆଧାରକାର୍ଡ଼ କେନ୍ଦ୍ରରେ ବର୍ତମାନ ନାହିଁ ନଥିବା ଅସମ୍ଭାଳ ଭିଡ଼ ଲାଗି ରହୁଛି । ଯାହା ଫଳରେ କିଛି ଲୋକଙ୍କର ଆଧାରକାର୍ଡ଼ ପ୍ରମାଣପତ୍ରରେ ତୃଟିପୂର୍ଣ୍ଣର ସୁଧାର ଆସୁଥିବା ବେଳେ ଆଉ କିଛି ବିରକ୍ତି ମନୋଭାବ କରି ନିରାଶରେ ଘରକୁ ଫେରୁଥିବା ମଧ୍ୟ ଲକ୍ଷ୍ୟ କରାଯାଇଛି । କିଛି ଜନସାଧାରଣଙ୍କୁ ଏସମ୍ପର୍କରେ ପଚାରିବାରୁ ସେ ପ୍ରକାଶ କରିଛନ୍ତି ତୃଟିପୂର୍ଣ୍ଣ ଆଧାରକାର୍ଡ଼କୁ ଠିକ୍ କରିବା ଲାଗି କାମଧନ୍ଦା ବନ୍ଦକରି ଆସିବାକୁ ପଡ଼ୁଛି । କିନ୍ତୁ; ଯଦି ହଠାତ୍ କୌଣସି କାମ ପଡ଼ିଯାଏ ତେବେ ତାହା କରିବା ସମ୍ଭବ ହେଉନାହିଁ ଓ ଏହାକୁ ନେଇ ବହୁ ହଇରାଣ ହରକତ ମଧ୍ୟ ହେବାକୁ ପଡ଼ୁଛି । ଅପରପକ୍ଷେ ଯେଉଁ ମାଆମାନେ ସୁଭଦ୍ରା ଯୋଜନା ଆବେଦନ କରିବା ପାଇଁ ନିଜର ଆଧାର ପ୍ରମାଣପତ୍ରକୁ ସଜାଡ଼ୁଛନ୍ତି, ସେମାନଙ୍କୁ ନୂତନ ଆଧାରକାର୍ଡ଼ ପାଇବାକୁ ହେଲେ ଆଉ ଏକସପ୍ତାହ ସମୟ ଅପେକ୍ଷା କରିବାକୁ ପଡ଼ୁଛି । ତେଣୁ ଏସବୁ ସମସ୍ୟାକୁ ଦୃଷ୍ଟିରେ ରଖି ରାଜ୍ୟ ସରକାର ଲୋକଙ୍କ ସୁବିଧା ନିମନ୍ତେ ତୃଟିପୂର୍ଣ୍ଣ ଆଧାରକାର୍ଡ଼କୁ କିପରି ସରଳ ଉପାୟରେ ଲୋକମାନେ ନିଜର ଆଧାର ପ୍ରମାଣପତ୍ରକୁ ଠିକ୍ କରାଇପାରିବେ ସେ ନେଇ ଉଚିତ୍ ପଦକ୍ଷେପ ଗ୍ରହଣ କଲେ ହଇରାଣ ହରକତ ହେଉଥିବା ସର୍ବସାଧାରଣ ଏଥିରୁ ମୁକ୍ତି ପାଇପାରିବେ ବୋଲି ବୁଦ୍ଧିଜୀବୀ ମହଲରେ ମତପ୍ରକାଶ ପାଇଛି ।
May 27, 2026/
No Comments
