ବିଶେଷ ଅଭିଯାନ-୬.୦: ସ୍ୱଚ୍ଛତା ସହ ବକେୟା ମାମଲା ହ୍ରାସ ଉପରେ ଡିଏଆର୍ଇ-ଆଇସିଏଆର୍ର ଗୁରୁତ୍ୱ
ନୂଆଦିଲ୍ଲୀ: ସରକାରୀ କାର୍ଯ୍ୟାଳୟରେ ସ୍ୱଚ୍ଛତା ବୃଦ୍ଧି, ଅମିମାଂସିତ ମାମଲା ହ୍ରାସ ଏବଂ କାର୍ଯ୍ୟାଳୟୀନ ବ୍ୟବସ୍ଥାକୁ ଅଧିକ ସୁଦୃଢ଼ କରିବା ଲକ୍ଷ୍ୟରେ କୃଷି ଗବେଷଣା ଓ ଶିକ୍ଷା ବିଭାଗ (DARE) ଏବଂ ଭାରତୀୟ କୃଷି ଗବେଷଣା ପରିଷଦ (ICAR) ପକ୍ଷରୁ ବିଶେଷ ଅଭିଯାନ-୬.୦ ଆୟୋଜନ କରାଯିବ। ଏହି ଅଭିଯାନ ଅକ୍ଟୋବର ୨ରୁ ୩୧ ତାରିଖ ପର୍ଯ୍ୟନ୍ତ ଚାଲିବ।
ଏହି ଅଭିଯାନରେ କାର୍ଯ୍ୟାଳୟ ପରିସରର ସ୍ୱଚ୍ଛତା ସହିତ ବିଭିନ୍ନ ପ୍ରକାରର ବକେୟା ମାମଲା ଶୀଘ୍ର ନିଷ୍ପତ୍ତି, ଅଭିଲେଖର ସୁବ୍ୟବସ୍ଥିତ ପରିଚାଳନା ଏବଂ କାଗଜବିହୀନ କାର୍ଯ୍ୟପ୍ରଣାଳୀ ଉପରେ ବିଶେଷ ଫୋକସ୍ ରହିବ।
ଗତ ବିଶେଷ ଅଭିଯାନ-୫.୦ ସମୟରେ DARE/ICAR ପକ୍ଷରୁ ଅମିମାଂସିତ ସନ୍ଦର୍ଭଗୁଡ଼ିକର ନିୟମିତ ନିଷ୍ପତ୍ତି ସହ ଜନଅଭିଯୋଗର ସମୟବଦ୍ଧ ସମାଧାନ ଉପରେ ଗୁରୁତ୍ୱ ଦିଆଯାଇଥିଲା। ଅଭିଯାନ ସମୟରେ ବହୁ ସଂଖ୍ୟକ ଜନଅଭିଯୋଗ ଓ ଅପିଲ୍ର ନିଷ୍ପତ୍ତି ନିଆଯାଇଥିବା ବିଭାଗ ପକ୍ଷରୁ କୁହାଯାଇଛି।
ବିଶେଷ ଅଭିଯାନ-୫.୦ ଅଧୀନରେ ଦେଶର ବିଭିନ୍ନ ସ୍ଥାନରେ DARE/ICARର ଶାଖାଗୁଡ଼ିକରେ ସ୍ୱଚ୍ଛତା ସମ୍ପର୍କରେ ସଚେତନତା ସୃଷ୍ଟି ସହ ଅନେକ କାର୍ଯ୍ୟକ୍ରମ ହୋଇଥିଲା। ସ୍ୱାସ୍ଥ୍ୟ, ଖାଦ୍ୟ ସୁରକ୍ଷା, ‘ବର୍ଜ୍ୟରୁ ସମ୍ପଦ’, ପରିମଳ, ବୃକ୍ଷରୋପଣ, କାର୍ଯ୍ୟାଳୟ ପରିସରର ଉନ୍ନତି, ପରିବେଶ ଅନୁକୂଳ କାର୍ଯ୍ୟପଦ୍ଧତି, ସୌନ୍ଦର୍ଯ୍ୟୀକରଣ ଏବଂ ସ୍ଥାନର ସୁବ୍ୟବହାର ଭଳି ବିଭିନ୍ନ ବିଷୟ ଏଥିରେ ସାମିଲ ଥିଲା।
ଏଥିସହ DARE/ICAR ପକ୍ଷରୁ ଇ-ଫାଇଲ୍ ବ୍ୟବସ୍ଥା ମାଧ୍ୟମରେ କାଗଜବିହୀନ କାର୍ଯ୍ୟପ୍ରଣାଳୀକୁ ଆଗକୁ ବଢ଼ାଯାଇଥିଲା। ଭୌତିକ ଫାଇଲ୍ଗୁଡ଼ିକର ନିଷ୍ପତ୍ତି, ଇ-ଫାଇଲ୍ର ସମୀକ୍ଷା ଓ ଆବଶ୍ୟକ ମାମଲାର ସମାଧାନ ଭଳି ଅଭିଲେଖ ପରିଚାଳନା କାର୍ଯ୍ୟରେ ଲକ୍ଷ୍ୟ ପୂରଣ କରାଯାଇଥିଲା। ଏହା ଫଳରେ କାର୍ଯ୍ୟାଳୟରେ ଅତିରିକ୍ତ ସ୍ଥାନ ଖାଲି ହେବା ସହ ଜମା ହୋଇଥିବା ଅବ୍ୟବହୃତ ସାମଗ୍ରୀ ଓ ବର୍ଜ୍ୟର ନିଷ୍ପତ୍ତି କରାଯାଇଥିଲା।
ବିଶେଷ ଅଭିଯାନ-୫.୦ର ଅଭିଜ୍ଞତା ଓ ଫଳାଫଳକୁ ଆଧାର କରି ଏଥର ବିଶେଷ ଅଭିଯାନ-୬.୦ରେ ଏହି ପ୍ରୟାସକୁ ଆହୁରି ମଜବୁତ କରିବାକୁ DARE/ICAR ପ୍ରତିବଦ୍ଧ। ସ୍ୱଚ୍ଛତା, ଦକ୍ଷ ଅଭିଲେଖ ପରିଚାଳନା, ବକେୟା ମାମଲା ହ୍ରାସ, କାଗଜବିହୀନ କାର୍ଯ୍ୟପଦ୍ଧତି ଏବଂ କାର୍ଯ୍ୟାଳୟ ସ୍ଥାନର ସର୍ବୋତ୍ତମ ବ୍ୟବହାର ଏହି ଅଭିଯାନର ମୁଖ୍ୟ ପ୍ରାଥମିକତା ରହିବ।
