ନୂଆଦିଲ୍ଲୀ: ଦୃଢ଼ ମନୋବଳ, ସାହସ ଓ ଅଦମ୍ୟ ଉତ୍ସାହର ପରିଚୟ ଦେଇ ଏନ୍ସିସିର ୨୦ ଜଣ ମହିଳା କ୍ୟାଡେଟ୍ ‘ଅପରାଜିତା–ପରାଙ୍ଗ ଲା ୨୦୨୬’ ଉଚ୍ଚ ଉଚ୍ଚତା ବିଶିଷ୍ଟ ଦୀର୍ଘ ଟ୍ରେକ୍ ସଫଳତାର ସହ ସମାପ୍ତ କରିଛନ୍ତି।
ସେପ୍ଟେମ୍ବର ୧୬ରେ ଲଦାଖର କରଜୋକ୍ଠାରେ ଏନ୍ସିସି ମହାନିର୍ଦ୍ଦେଶକ ଲେଫ୍ଟନାଣ୍ଟ ଜେନେରାଲ ବୀରେନ୍ଦ୍ର ୱାତ୍ସ ଏବଂ ପ୍ରତିରକ୍ଷା ମନ୍ତ୍ରଣାଳୟର ଅତିରିକ୍ତ ସଚିବ ଦୀପ୍ତି ମୋହିଲ ଚାୱଲା ଟ୍ରେକିଂ ଦଳକୁ ସ୍ୱାଗତ କରିଥିଲେ।
ଦେଶର ବିଭିନ୍ନ ପ୍ରାନ୍ତରୁ ଚୟନ ହୋଇଥିବା ୨୦ ଜଣ ମହିଳା କ୍ୟାଡେଟ୍ ୫,୫୭୮ ମିଟର ଉଚ୍ଚ ପରାଙ୍ଗ ଲା ପାସ୍ ଅତିକ୍ରମ କରିଥିଲେ। ଏହି ପଥ ହିମାଚଳ ପ୍ରଦେଶର ସ୍ପିତି ଉପତ୍ୟକାକୁ ଲଦାଖର ଚାଙ୍ଗଥାଙ୍ଗ ଅଞ୍ଚଳ ସହ ଯୋଡ଼ିଥାଏ।
୩୦ ଦିନରେ ୨୫୦ କିଲୋମିଟର ଦୁର୍ଗମ ଯାତ୍ରା
କ୍ୟାଡେଟ୍ମାନେ ୩୦ ଦିନ ମଧ୍ୟରେ ପ୍ରାୟ ୨୫୦ କିଲୋମିଟର ଦୂରତା ଅତିକ୍ରମ କରିଥିଲେ। ଯାତ୍ରା ସମୟରେ ଗ୍ଲେସିୟର, ବରଫାଚ୍ଛାଦିତ ଅଞ୍ଚଳ ଓ ନଦୀ ଉପତ୍ୟକା ସମେତ ଅତ୍ୟନ୍ତ ଦୁର୍ଗମ ଉଚ୍ଚଭୂମି ଅଞ୍ଚଳ ଦେଇ ଦଳ ଆଗକୁ ବଢ଼ିଥିଲା। ଅଧିକାରୀ, ପ୍ରଶିକ୍ଷକ, ଚିକିତ୍ସା କର୍ମଚାରୀ ଓ ସହାୟକ ଦଳଙ୍କ ସହଯୋଗରେ ହିମାଚଳ ପ୍ରଦେଶର କିବ୍ବରରୁ ଲଦାଖର କରଜୋକ୍ ପର୍ଯ୍ୟନ୍ତ ଯାତ୍ରା ସଫଳତାର ସହ ସମାପ୍ତ ହୋଇଥିଲା।
ଅଗଷ୍ଟ ୧୮ରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ନୂଆଦିଲ୍ଲୀରୁ ଏହି ଅଭିଯାନକୁ ସବୁଜ ପତାକା ଦେଖାଇ ଶୁଭାରମ୍ଭ କରିଥିଲେ।
ଅଭିଯାନର ସଫଳ ସମାପ୍ତି ପାଇଁ ଏନ୍ସିସି ମହାନିର୍ଦ୍ଦେଶକ ଲେଫ୍ଟନାଣ୍ଟ ଜେନେରାଲ ବୀରେନ୍ଦ୍ର ୱାତ୍ସ କ୍ୟାଡେଟ୍ ଓ ସମସ୍ତ କର୍ମଚାରୀଙ୍କୁ ଅଭିନନ୍ଦନ ଜଣାଇଥିଲେ। ଏଭଳି ସାହସିକ କାର୍ଯ୍ୟକ୍ରମ ଯୁବପିଢ଼ିଙ୍କ ମଧ୍ୟରେ ନେତୃତ୍ୱ ଦକ୍ଷତା, ଆତ୍ମବିଶ୍ୱାସ, ଦଳଗତ କାର୍ଯ୍ୟ ଓ ସହନଶୀଳତା ବିକାଶରେ ସହାୟକ ହୁଏ ବୋଲି ସେ କହିଥିଲେ।
ଯୁବତୀମାନଙ୍କୁ ସାହସିକ କାର୍ଯ୍ୟକଳାପରେ ଅଧିକ ଅଂଶଗ୍ରହଣ ପାଇଁ ପ୍ରୋତ୍ସାହିତ କରିବା ସହ ଉଚ୍ଚ ଉଚ୍ଚତାର କଠିନ ପରିସ୍ଥିତି ସହ ପରିଚିତ କରାଇବା ଏହି ଅଭିଯାନର ମୁଖ୍ୟ ଲକ୍ଷ୍ୟ ଥିଲା। ଏଥିସହ ଦେଶର ବିଭିନ୍ନ ଅଞ୍ଚଳର କ୍ୟାଡେଟ୍ମାନଙ୍କୁ ଏକାଠି କରି ଜାତୀୟ ଏକତାର ଭାବନାକୁ ଆହୁରି ସୁଦୃଢ଼ କରିବା ମଧ୍ୟ ଏହି ଅଭିଯାନର ଅନ୍ୟତମ ଉଦ୍ଦେଶ୍ୟ ଥିଲା।
