ଓଜୋନ୍ ସୁରକ୍ଷା ଓ ଜଳବାୟୁ ପରିବର୍ତ୍ତନ ମୁକାବିଲା ପାଇଁ ଭାରତର ପ୍ରତିବଦ୍ଧତା ଦୋହରାଇଲା
ମୁମ୍ବାଇ: ଓଜୋନ୍ ପରତର ସୁରକ୍ଷା ସହିତ ଜଳବାୟୁ ପରିବର୍ତ୍ତନର ପ୍ରଭାବ ହ୍ରାସ ଦିଗରେ ଭାରତ ନିଜ ପ୍ରତିବଦ୍ଧତାକୁ ପୁଣିଥରେ ଦୋହରାଇଛି। ମୁମ୍ବାଇରେ କେନ୍ଦ୍ର ପରିବେଶ, ବନ ଓ ଜଳବାୟୁ ପରିବର୍ତ୍ତନ ମନ୍ତ୍ରଣାଳୟ ପକ୍ଷରୁ ୩୨ତମ ବିଶ୍ୱ ଓଜୋନ୍ ଦିବସ ସମାରୋହ ଆୟୋଜିତ ହୋଇଥିଲା। ଚଳିତ ବର୍ଷର ବିଷୟ ଥିଲା ‘ଶୀତଳ ଗ୍ରହ ପାଇଁ ବିଶ୍ୱସ୍ତରୀୟ କାର୍ଯ୍ୟାନୁଷ୍ଠାନ’।
କେନ୍ଦ୍ର ପରିବେଶ, ବନ ଓ ଜଳବାୟୁ ପରିବର୍ତ୍ତନ ରାଜ୍ୟମନ୍ତ୍ରୀ କୀର୍ତ୍ତି ବର୍ଦ୍ଧନ ସିଂହ ଓ ମହାରାଷ୍ଟ୍ରର ପରିବେଶ ଏବଂ ଜଳବାୟୁ ପରିବର୍ତ୍ତନ ମନ୍ତ୍ରୀ ପଙ୍କଜା ମୁଣ୍ଡେଙ୍କ ଅଧ୍ୟକ୍ଷତାରେ ଏହି କାର୍ଯ୍ୟକ୍ରମ ହୋଇଥିଲା।
ମଣ୍ଟ୍ରିଅଲ୍ ପ୍ରୋଟୋକଲ୍ ପ୍ରତି ଭାରତର ପ୍ରତିବଦ୍ଧତା
କୀର୍ତ୍ତି ବର୍ଦ୍ଧନ ସିଂହ କହିଥିଲେ ଯେ ଅର୍ଥନୈତିକ ବିକାଶ ସହିତ ପରିବେଶ ସୁରକ୍ଷାକୁ ଆଗକୁ ନିଆଯାଇପାରିବ। ବିକାଶରେ ସାଲିସ୍ ନକରି ଓଜୋନ୍ ପରତକୁ କ୍ଷତି ପହଞ୍ଚାଉଥିବା ପଦାର୍ଥର ନିୟନ୍ତ୍ରଣ ସମ୍ପର୍କିତ ମଣ୍ଟ୍ରିଅଲ୍ ପ୍ରୋଟୋକଲ୍ ଅଧୀନରେ ଭାରତ ନିଜ ପ୍ରତିବଦ୍ଧତା ପୂରଣ କରିଛି ବୋଲି ସେ ଉଲ୍ଲେଖ କରିଥିଲେ।
ପରିବେଶୀୟ ଚ୍ୟାଲେଞ୍ଜର ମୁକାବିଲା ପାଇଁ ସରକାର, ବୈଜ୍ଞାନିକ, ଶିଳ୍ପ, ପ୍ରଶାସନ ଓ ସାଧାରଣ ଲୋକଙ୍କ ସମିଳିତ ପ୍ରୟାସ ଆବଶ୍ୟକ ବୋଲି ସେ କହିଥିଲେ।
ଆରମ୍ଭ ହେଲା ନେଟ୍-ଜିରୋ ପୋର୍ଟାଲ୍ ଓ NAPCC ଡ୍ୟାସବୋର୍ଡ
ବିଶ୍ୱ ଓଜୋନ୍ ଦିବସ ଅବସରରେ ଭାରତର ନେଟ୍-ଜିରୋ ପୋର୍ଟାଲ୍ ଏବଂ ଜାତୀୟ ଜଳବାୟୁ ପରିବର୍ତ୍ତନ କାର୍ଯ୍ୟଯୋଜନା (NAPCC) ଡ୍ୟାସବୋର୍ଡ ଆରମ୍ଭ କରାଯାଇଛି।
ନେଟ୍-ଜିରୋ ପୋର୍ଟାଲ୍ ଦେଶର ଜଳବାୟୁ ପ୍ରତିବଦ୍ଧତାର ନିରୀକ୍ଷଣ ଓ ସମନ୍ୱୟ ପାଇଁ ଏକ କେନ୍ଦ୍ରୀୟ ଡିଜିଟାଲ୍ ପ୍ଲାଟଫର୍ମ ଭାବେ କାମ କରିବ। ଶିଳ୍ପ, ସଂସ୍ଥା ଓ ସରକାରୀ ସଂଗଠନଗୁଡ଼ିକ ସ୍ୱେଚ୍ଛାକୃତ ଭାବେ ପଞ୍ଜୀକରଣ କରି ନେଟ୍-ଜିରୋ ନିର୍ଗମନ ଦିଗରେ ନିଜ ପ୍ରଗତି ପ୍ରଦର୍ଶନ କରିପାରିବେ।
ଅନ୍ୟପକ୍ଷରେ, NAPCC ଡ୍ୟାସବୋର୍ଡ ମାଧ୍ୟମରେ ଭାରତର ଜାତୀୟ ଜଳବାୟୁ ପରିବର୍ତ୍ତନ କାର୍ଯ୍ୟଯୋଜନା ଓ ଏହା ଅଧୀନରେ ଥିବା ବିଭିନ୍ନ ଜାତୀୟ ମିଶନ୍ର ପ୍ରଗତି ସମ୍ପର୍କିତ ତଥ୍ୟ ଏକ ସ୍ଥାନରେ ଉପଲବ୍ଧ ହେବ।
ଶୀତଳକରଣ ବ୍ୟବସ୍ଥାରେ ସଚେତନତା ପାଇଁ ଆହ୍ୱାନ
ରାଜ୍ୟମନ୍ତ୍ରୀ ସିଂହ ସାଧାରଣ ଜୀବନରେ ପରିବେଶ ଅନୁକୂଳ ଅଭ୍ୟାସ ଆପଣାଇବା ଉପରେ ଗୁରୁତ୍ୱ ଦେଇଥିଲେ। AC ବ୍ୟବହାର ସମୟରେ ପ୍ରମାଣିତ ଓ ଦକ୍ଷ ଟେକ୍ନିସିଆନ୍ଙ୍କ ଦ୍ୱାରା ସର୍ଭିସିଂ କରାଇବା, ପ୍ରାୟ ୨୪ ଡିଗ୍ରୀ ସେଲସିୟସ୍ ତାପମାତ୍ରାରେ AC ଚଳାଇବା ଏବଂ ପରିବେଶ ଅନୁକୂଳ ରେଫ୍ରିଜେରାଣ୍ଟ ଥିବା ଶକ୍ତି-ଦକ୍ଷ ଉପକରଣ ବାଛିବାକୁ ସେ ଆହ୍ୱାନ କରିଥିଲେ।
୨୪୮ ITIକୁ ଆପଣାଇଲେ ୧୨ ନିର୍ମାତା
ଶୀତଳକରଣ ଓ ବାୟୁ ଶୀତଳକରଣ କ୍ଷେତ୍ରର ୧୨ଟି ନିର୍ମାତା କମ୍ପାନୀ ୨୪୮ଟି ଶିଳ୍ପ ତାଲିମ ପ୍ରତିଷ୍ଠାନ (ITI)କୁ ଆପଣାଇବାକୁ ଘୋଷଣା କରିଛନ୍ତି।
ଏହି ପଦକ୍ଷେପର ଉଦ୍ଦେଶ୍ୟ ଆଗାମୀ ପିଢ଼ିର ଟେକ୍ନିସିଆନ୍ମାନଙ୍କ ତାଲିମ ବ୍ୟବସ୍ଥାକୁ ଶିଳ୍ପ ମାନଦଣ୍ଡ ସହିତ ଯୋଡ଼ିବା। ଏହା ମାଧ୍ୟମରେ କମ୍ ଗ୍ଲୋବାଲ୍ ୱାର୍ମିଂ ପୋଟେନ୍ସିଆଲ୍ ଥିବା ପରିବେଶ ଅନୁକୂଳ ପ୍ରଯୁକ୍ତିରେ ଦକ୍ଷ ମାନବ ସମ୍ବଳ ପ୍ରସ୍ତୁତ କରାଯିବ।
ଜର୍ମାନୀର ଆନ୍ତର୍ଜାତୀୟ ବିକାଶ ସଂସ୍ଥା GIZ ମଧ୍ୟ ଶୀତଳକରଣ କ୍ଷେତ୍ରରେ ତାଲିମ କ୍ଷମତା ବଢ଼ାଇବା ଏବଂ ୨୦୩୦ ସୁଦ୍ଧା ୨୫ ହଜାର ଟେକ୍ନିସିଆନ୍ଙ୍କୁ ତାଲିମ ଦେବା ଲକ୍ଷ୍ୟ ସମ୍ପର୍କରେ ଉଲ୍ଲେଖ କରିଛି।
୨୦୪୭ ଲକ୍ଷ୍ୟ ଦିଗରେ ମହାରାଷ୍ଟ୍ର
ମହାରାଷ୍ଟ୍ରର ପରିବେଶ ଓ ଜଳବାୟୁ ପରିବର୍ତ୍ତନ ମନ୍ତ୍ରୀ ପଙ୍କଜା ମୁଣ୍ଡେ କହିଥିଲେ ଯେ ରାଜ୍ୟ ୨୦୪୭ ସୁଦ୍ଧା ‘ବିକଶିତ ଭାରତ’ ଲକ୍ଷ୍ୟ ଦିଗରେ ସତତ ବିକାଶ, କମ୍ କାର୍ବନ୍ ନିର୍ଗମନ ଓ ପରିବେଶ ଅନୁକୂଳ ବିକାଶ ଉପରେ ଗୁରୁତ୍ୱ ଦେଇ କାମ କରୁଛି।
ତୀବ୍ର ସହରୀକରଣ ଓ ବଢ଼ୁଥିବା ତାପମାତ୍ରାକୁ ଦୃଷ୍ଟିରେ ରଖି ଓଜୋନ୍ ସୁରକ୍ଷା ଓ ଜଳବାୟୁ ପରିବର୍ତ୍ତନ ମୁକାବିଲା ପାଇଁ ରାଜ୍ୟରେ ରୋଡମ୍ୟାପ୍ ଏବଂ କାର୍ଯ୍ୟଯୋଜନା ପ୍ରସ୍ତୁତ କରାଯାଉଥିବା ସେ କହିଥିଲେ।
ମଣ୍ଟ୍ରିଅଲ୍ ପ୍ରୋଟୋକଲ୍ ପାଳନରେ ଭାରତ
ଭାରତ ୧୯୯୨ ମସିହାରୁ ଓଜୋନ୍ ପରତ ସୁରକ୍ଷା ସମ୍ପର୍କିତ ଭିଏନା କନଭେନସନ୍ ଏବଂ ମଣ୍ଟ୍ରିଅଲ୍ ପ୍ରୋଟୋକଲ୍ର ପକ୍ଷଭୁକ୍ତ ରହିଛି। CFC, CTC ଓ Halon ଭଳି ଓଜୋନ୍ କ୍ଷୟକାରୀ ପଦାର୍ଥକୁ ନିୟନ୍ତ୍ରିତ ବ୍ୟବହାରରୁ ପର୍ଯ୍ୟାୟକ୍ରମେ ହଟାଯାଇଛି।
ବର୍ତ୍ତମାନ ଭାରତ ମଣ୍ଟ୍ରିଅଲ୍ ପ୍ରୋଟୋକଲ୍ର ତ୍ୱରିତ ପର୍ଯ୍ୟାୟକ୍ରମିକ ହ୍ରାସ ସୂଚୀ ଅନୁଯାୟୀ HCFCକୁ ମଧ୍ୟ ପର୍ଯ୍ୟାୟକ୍ରମେ ହଟାଇବା ପ୍ରକ୍ରିୟାରେ ରହିଛି। ୨୦୧୫, ୨୦୨୦ ଓ ୨୦୨୫ ପାଇଁ ଧାର୍ଯ୍ୟ HCFC ପର୍ଯ୍ୟାୟକ୍ରମିକ ହ୍ରାସ ଲକ୍ଷ୍ୟ ଭାରତ ପୂରଣ କରିସାରିଥିବା ସୂଚନା ଦିଆଯାଇଛି।
ଭାରତ ୨୦୨୧ ସେପ୍ଟେମ୍ବରରେ ମଣ୍ଟ୍ରିଅଲ୍ ପ୍ରୋଟୋକଲ୍ର କିଗାଲି ସଂଶୋଧନକୁ ଅନୁମୋଦନ କରିଥିଲା। ଏହା ୨୦୨୧ ଡିସେମ୍ବର ୨୬ରୁ ଭାରତରେ ଲାଗୁ ହୋଇଛି। ଏହା ଅନୁଯାୟୀ ୨୦୩୨ରୁ HFC ଉତ୍ପାଦନ ଓ ବ୍ୟବହାରକୁ ପର୍ଯ୍ୟାୟକ୍ରମେ କମାଇବାର ଯୋଜନା ରହିଛି। ଆଧାର ସ୍ତର ତୁଳନାରେ ୨୦୩୨ରେ ୧୦%, ୨୦୩୭ରେ ୨୦%, ୨୦୪୨ରେ ୩୦% ଏବଂ ୨୦୪୭ରେ ୮୫% ହ୍ରାସ ଲକ୍ଷ୍ୟ ରଖାଯାଇଛି।
କାର୍ଯ୍ୟକ୍ରମରେ ଓଜୋନ୍ ସେଲ୍ର ବିଭିନ୍ନ ଅଧ୍ୟୟନ ଆଧାରିତ ପ୍ରକାଶନ ଉନ୍ମୋଚିତ ହେବା ସହ ଜାତୀୟ ପୋଷ୍ଟର, ସ୍ଲୋଗାନ୍ ଲେଖନ ଓ ଅନଲାଇନ୍ କୁଇଜ୍ ପ୍ରତିଯୋଗିତାର ବିଜେତାମାନଙ୍କୁ ଘୋଷଣା କରାଯାଇଥିଲା।
