ଚୀନ୍ ରେ ଏଭିସି ବଏଜ୍ ଅଣ୍ଡର-୧୮ ଭଲିବଲ୍ ମ୍ୟାଚ୍
- ଭାରତୀୟ ଦଳରେ ଖେଳିବେ ଢେଙ୍କାନାଳ ଜିଲ୍ଲା ଶିବପୁର ପଞ୍ଚାୟତର ଓଡ଼ିଆ ପୁଅ ସୌମ୍ୟରଞ୍ଜନ
ମେରାମଣ୍ଡଳୀ, ୧୧/୦୭/୨୦୨୬ – ଓଡ଼ିଶାର କ୍ରୀଡ଼ା ଇତିହାସରେ ଆଉ ଏକ ସ୍ୱର୍ଣ୍ଣିମ ଅଧ୍ୟାୟ ଯୋଡ଼ି ହୋଇଛି। ଅସନ୍ତାକାଲି ଠାରୁ ଚୀନରେ ଆରମ୍ଭ ହେବାକୁ ଥିବା ଏସୀୟ ଭଲିବଲ୍ ମହାକୁମ୍ଭ ପାଇଁ ଭାରତୀୟ ଦଳରେ ସ୍ଥାନ ପାଇଛନ୍ତି ଢେଙ୍କାନାଳ ଜିଲ୍ଲା ଶିବପୁର ପଞ୍ଚାୟତର ଓଡିଆ ପୁଅ ସୌମ୍ୟରଞ୍ଜନ ସାମଲ। ଟାଟା ଷ୍ଟିଲ ଫାଉଣ୍ଡେସନ (ଟିଏସଏଫ୍) ଦ୍ବାରା ପରିଚାଳିତ ଭଲିବଲ କୋଚିଂ ସେଣ୍ଟରରୁ ପ୍ରଶିକ୍ଷଣ ଆରମ୍ଭ କରିଥିବା ସୌମ୍ୟରଞ୍ଜନ ୨୦୨୬ ଏଭିସି ବଏଜ୍ ଅଣ୍ଡର-୧୮ ଭଲିବଲ୍ ଚାମ୍ପିଅନସିପ୍ ପାଇଁ ମନୋନୀତ ହେବା, ସାରା ରାଜ୍ୟ ପାଇଁ ଗର୍ବ ଓ ଗୌରବର ବିଷୟ। ଟିଏସଏଫ୍ କୋଚିଂ ସେଣ୍ଟରରେ ଉନ୍ନତ ପ୍ରଶିକ୍ଷଣ ଓ ନିଜର କଠୋର ନିଷ୍ଠା ଓ ପରିଶ୍ରମ ବଳରେ ଗ୍ରାମାଞ୍ଚଳର ଏହି ପ୍ରତିଭା ଆଜି ଅନ୍ତର୍ଜାତୀୟ ମଞ୍ଚରେ ଦେଶର ପ୍ରତିନିଧିତ୍ୱ କରିବାକୁ ଯାଉଛନ୍ତି।
ଏସିଆନ ଭଲିବଲ୍ କନଫେଡେରେସନ୍ (ଏଭିସି) ଏବଂ ଚାଇନା ଭଲିବଲ୍ ଆସୋସିଏସନ୍ (ସିଭିଏ) ର ମିଳିତ ଆନୁକୂଲ୍ୟରେ ଆୟୋଜିତ ଏହି ପ୍ରତିଯୋଗିତା, ଏସିଆର ସବୁଠାରୁ ବଡ଼ ଯୁବ ଭଲିବଲ୍ ଟୁର୍ଣ୍ଣାମେଣ୍ଟ। ଏହାସହ ଏହି ଟୁର୍ଣ୍ଣାମେଣ୍ଟର ଶୀର୍ଷ ୪ଟି ଦଳ ୨୦୨୭ ଏଫ୍ଆଇଭିବି (ଇଣ୍ଟରନ୍ୟାସନାଲ ଭଲିବଲ ଫେଡେରେସନ) ବଏଜ୍ ଅଣ୍ଡର-୧୯ ୱାର୍ଲଡ ଚାମ୍ପିଅନସିପ୍ ପାଇଁ ମନୋନୀତ ହେବେ।
ଏକ ମଫସଲ ଗାଁରୁ ବାହାରି ଜାତୀୟ ଦଳରେ ସାମିଲ ହେବା ପର୍ଯ୍ୟନ୍ତ ସୌମ୍ୟଙ୍କର ଯାତ୍ରା ବେଶ ପ୍ରେରଣାଦାୟୀ। ପୂର୍ବତନ ରାଜ୍ୟସ୍ତରୀୟ ଭଲିବଲ୍ ଖେଳାଳି ତଥା ପିତା ପ୍ରଶାନ୍ତ ସାମଲଙ୍କ ପ୍ରେରଣାରେ ସେ ଭଲିବଲ୍ ଖେଳିବା ଆରମ୍ଭ କରିଥିଲେ। ପରେ ସେ ପାଇକପୁରୁଣାକୋଟ ସ୍ଥିତ ଟାଟା ଷ୍ଟିଲ୍ ଫାଉଣ୍ଡେସନ୍ ର ଭଲିବଲ୍ କୋଚିଂ ସେଣ୍ଟରରେ ଯୋଗ ଦେଇ କୋଚ୍ ଆଶୁତୋଷ ପାତ୍ରଙ୍କ ତତ୍ତ୍ୱାବଧାନରେ ତାଲିମ ନେଇଥିଲେ।
ପ୍ରତିଦିନ ନିଜ ପାଠପଢ଼ା ସହ ଅଭ୍ୟାସ ପାଇଁ ସେ ପାଖାପାଖି ୪୦ କିଲୋମିଟର ସାଇକେଲ ଚଲାଇ କୋଚିଂ ସେଣ୍ଟରକୁ ଆସୁଥିଲେ। ତାଙ୍କର ଏହି ନିଷ୍ଠା ଯୋଗୁଁ ୨୦୨୫ ମସିହାରେ ତାଙ୍କୁ ଥିରୁବନନ୍ତପୁରମ ସ୍ଥିତ ସ୍ପୋର୍ଟସ ଅଥରିଟି ଅଫ୍ ଇଣ୍ଡିଆ (ଏସ୍ଏଆଇ) ନ୍ୟାସନାଲ୍ ସେଣ୍ଟର ଅଫ୍ ଏକ୍ସଲେନ୍ସରେ ପ୍ରବେଶ ମିଳିଥିଲା। ସେ ଓଡ଼ିଶା ଦଳର ପ୍ରତିନିଧିତ୍ୱ କରିବା ସହ ରାଜସ୍ଥାନରେ ଅନୁଷ୍ଠିତ ଜୁନିଅର ଜାତୀୟ ଭଲିବଲ୍ ଚାମ୍ପିଅନସିପରେ ଏସ୍ଏଆଇ ଦଳର ଅଧିନାୟକତ୍ୱ କରିଥିଲେ। ଭଲିବଲ୍ ଫେଡେରେସନ୍ ଅଫ୍ ଇଣ୍ଡିଆର ଜାତୀୟ କୋଚିଂ କ୍ୟାମ୍ପରେ ଶ୍ରେଷ୍ଠ ପ୍ରଦର୍ଶନ ଯୋଗୁ ତାଙ୍କୁ ଭାରତୀୟ ଦଳରେ ସ୍ଥାନ ମିଳିଛି।
ଭାରତୀୟ ଦଳରେ ମନୋନୀତ ହେବା ପରେ ସୌମ୍ୟ କହିଛନ୍ତି, “ଇଣ୍ଡିଆ ଜର୍ସି ପିନ୍ଧିବା ମୋ ପାଇଁ ଏବଂ ମୋ ପରିବାର ପାଇଁ ଏକ ଗର୍ବର ମୁହୂର୍ତ୍ତ। ଚୀନରେ ଅନୁଷ୍ଠିତ ହେବାକୁ ଥିବା ଏହି ଚାମ୍ପିଅନସିପରେ ମୁଁ ମୋର ଶ୍ରେଷ୍ଠ ପ୍ରଦର୍ଶନ କରିବାକୁ ଚେଷ୍ଟା କରିବି।”
ସୌମ୍ୟଙ୍କ ପିତା ପ୍ରଶାନ୍ତ ସାମଲ, ଟାଟା ଷ୍ଟିଲ୍ ଫାଉଣ୍ଡେସନ୍ ଏବଂ କୋଚ୍ ଆଶୁତୋଷ ପାତ୍ରଙ୍କୁ ଧନ୍ୟବାଦ ଜଣାଇବା ସହ କହିଛନ୍ତି, ସୌମ୍ୟର ଏହି ସଫଳତା ଆଞ୍ଚଳିକସ୍ତରର ଅନ୍ୟ ଯୁବ ପ୍ରତିଭାମାନଙ୍କ ମନରେ ଆଶା ଓ ବିଶ୍ୱାସ ଜନ୍ମାଇବ।
ସୌମ୍ୟଙ୍କୁ ଶୁଭେଚ୍ଛା ଜଣାଇ ଟାଟା ଷ୍ଟିଲ୍ ଫାଉଣ୍ଡେସନର ଭଲିବଲ୍ କୋଚ୍ ଆଶୁତୋଷ ପାତ୍ର କହିଛନ୍ତି, “ନିରନ୍ତର ପ୍ରୟାସ, ଶୃଙ୍ଖଳିତ ଆଚରଣ ଏବଂ ନୂଆ କିଛି ଶିଖିବାର ଉତ୍କଣ୍ଠା ଯୋଗୁ ଆଜି ସୌମ୍ୟ ଭାରତୀୟ ଦଳରେ ସ୍ଥାନ ପାଇପାରିଛନ୍ତି। ଏହି ସଫଳତା, ତାଙ୍କର ଦୀର୍ଘ ବର୍ଷର କଠିନ ପରିଶ୍ରମର ଫଳ। ତାଙ୍କର ଏହି କୃତିତ୍ୱରେ ଆମେ ଗର୍ବିତ ଏବଂ ଆମର ଦୃଢ଼ ବିଶ୍ୱାସ ଯେ, ସେ ଦୃଢ଼ ନିଷ୍ଠା ଓ ଶ୍ରେଷ୍ଠତାର ସହ ଭାରତର ପ୍ରତିନିଧିତ୍ୱ କରିବେ।”
ଓଡ଼ିଶା ଭଲିବଲ୍ ଆସୋସିଏସନ୍ (ଓଭିଏ)ର ସଭାପତି ପ୍ରଫେସର (ଡକ୍ଟର) ଅଚ୍ୟୁତ ସାମନ୍ତ, ସୌମ୍ୟ ଏବଂ ସମଗ୍ର ଭାରତୀୟ ଦଳକୁ ଶୁଭେଚ୍ଛା ଜଣାଇବା ସହ ଭୁବନେଶ୍ୱର ସ୍ଥିତ କିଟ୍ ର ଇଣ୍ଟରନ୍ୟାସନାଲ୍ ସେଣ୍ଟର ଅଫ୍ ଏକ୍ସଲେନ୍ସ (ଆଇସିଓଇ) ଠାରେ ଜାତୀୟ କୋଚିଂ କ୍ୟାମ୍ପ ସଫଳତାର ସହ ଶେଷ କରିଥିବା ଟିମ୍ କୁ ଚୀନ ଗସ୍ତ ପାଇଁ ଶୁଭ କାମନା ଜଣାଇଛନ୍ତି।
ସୂଚନାଯୋଗ୍ୟ ଯେ, ୨୦୧୯ ମସିହାରେ ମାତ୍ର ୧୧ ଜଣ ଖେଳାଳିଙ୍କୁ ନେଇ ଆରମ୍ଭ ହୋଇଥିବା ଟାଟା ଷ୍ଟିଲ୍ ଫାଉଣ୍ଡେସନର ଏହି ଭଲିବଲ୍ କୋଚିଂରେ ଆଜି ୧୨୦ ରୁ ଅଧିକ କିଶୋରୀଙ୍କ ସମେତ ମୋଟ ୬୬୮ ଜଣ ପ୍ରଶିକ୍ଷଣ ନେଉଛନ୍ତି। ଏହି କେନ୍ଦ୍ରର ୨୧୫ ଜଣ ଜିଲ୍ଲାସ୍ତରୀୟ, ୧୭୯ ଜଣ ରାଜ୍ୟସ୍ତରୀୟ ଏବଂ ୩୫ ଜଣ ଜାତୀୟସ୍ତରୀୟ ଭଲିବଲ୍ ଟୁର୍ଣ୍ଣାମେଣ୍ଟ ଖେଳି ସାରିଛନ୍ତି। ଆଜି ସୌମ୍ୟଙ୍କର ଏହି ସଫଳତା ତୃଣମୂଳସ୍ତରରୁ ପ୍ରତିଭା ଚିହ୍ନଟ କରି ସେମାନଙ୍କୁ ଜାତୀୟ, ଅନ୍ତର୍ଜାତୀୟସ୍ତରରେ ପ୍ରତିଯୋଗିତା ପାଇଁ ପ୍ରସ୍ତୁତ କରିବା ପାଇଁ ଟିଏସଏଫ୍ ର ପ୍ରୟାସକୁ ଆହୁରି ସୁଦୃଢ କରିବ।
![{"remix_data":[],"remix_entry_point":"challenges","source_tags":["local"],"origin":"unknown","total_draw_time":0,"total_draw_actions":0,"layers_used":0,"brushes_used":0,"photos_added":0,"total_editor_actions":{},"tools_used":{"transform":1},"is_sticker":false,"edited_since_last_sticker_save":true,"containsFTESticker":false}](https://www.jagratbharatnews.in/wp-content/uploads/2026/08/Picsart_26-05-14_06-19-38-643-25-scaled.jpg)
