ମଣିଷ-ହାତୀ ସଂଘର୍ଷ ରୋକିବାକୁ ବନ ବିଭାଗ ଓ ବିଦ୍ୟୁତ୍ ବିଭାଗର ସମନ୍ୱୟ ବୈଠକ
ଅନୁଗୋଳ, ୪ ଅଗଷ୍ଟ: ମଣିଷ-ହାତୀ ସଂଘର୍ଷକୁ ପ୍ରଭାବଶାଳୀ ଭାବେ ପରିଚାଳନା କରିବା ଏବଂ ଜନଜୀବନ ସହ ବନ୍ୟହାତୀଙ୍କ ସୁରକ୍ଷା ସୁନିଶ୍ଚିତ କରିବା ଉଦ୍ଦେଶ୍ୟରେ ଅନୁଗୋଳ ବନଖଣ୍ଡ ଅନ୍ତର୍ଗତ ବନ୍ତଳା ବିଦ୍ୟୁତ୍ କାର୍ଯ୍ୟାଳୟ ପରିସରରେ ବନ୍ତଳା ବନାଞ୍ଚଳ ଓ ବିଦ୍ୟୁତ୍ ବିଭାଗର ଅଧିକାରୀ ଏବଂ କ୍ଷେତ୍ର କର୍ମଚାରୀଙ୍କ ମଧ୍ୟରେ ଏକ ସମନ୍ୱୟ ବୈଠକ ଅନୁଷ୍ଠିତ ହୋଇଥିଲା।
ବୈଠକରେ ହାତୀଙ୍କ ଗତିବିଧି ସମ୍ପର୍କରେ ସଠିକ୍ ସମୟରେ ସୂଚନା ଆଦାନପ୍ରଦାନ, କ୍ଷେତ୍ରସ୍ତରରେ ତ୍ୱରିତ ମିଳିତ ପଦକ୍ଷେପ ଗ୍ରହଣ ଏବଂ ମଣିଷ ଓ ହାତୀ ଉଭୟଙ୍କ ପାଇଁ ବିପଦକୁ କମାଇବା ଉପରେ ବିସ୍ତୃତ ଆଲୋଚନା ହୋଇଥିଲା।
ଉଭୟ ବିଭାଗର ଅଧିକାରୀମାନେ କହିଥିଲେ ଯେ, ସ୍ଥାନୀୟ ଲୋକଙ୍କ ସୁରକ୍ଷା ସହ ବନ୍ୟହାତୀଙ୍କ ସଂରକ୍ଷଣ ପାଇଁ ପାରସ୍ପରିକ ସମନ୍ୱୟ, ନିୟମିତ ସୂଚନା ବିନିମୟ ଓ ଦ୍ରୁତ କାର୍ଯ୍ୟାନୁଷ୍ଠାନ ଅତ୍ୟନ୍ତ ଆବଶ୍ୟକ। ଏଥିପାଇଁ ଭବିଷ୍ୟତରେ ମଧ୍ୟ ଉଭୟ ବିଭାଗ ମିଳିତ ଭାବେ କାର୍ଯ୍ୟ କରିବାକୁ ପ୍ରତିବଦ୍ଧତା ବ୍ୟକ୍ତ କରିଥିଲେ।
ବନ ବିଭାଗର ମତାନୁସାରେ, ଏଭଳି ସମନ୍ୱିତ ପଦକ୍ଷେପ ମଣିଷ-ହାତୀ ସଂଘର୍ଷ ହ୍ରାସ କରିବା ସହ ଉଭୟଙ୍କ ମଧ୍ୟରେ ସୁରକ୍ଷିତ ଓ ସନ୍ତୁଳିତ ସହାବସ୍ଥାନ ସୁନିଶ୍ଚିତ କରିବାରେ ସହାୟକ ହେବ।
