ଏସ୍ସି ଛାତ୍ରଛାତ୍ରୀଙ୍କ ଛାତ୍ରବୃତ୍ତିରେ ବଡ଼ ଖର୍ଚ୍ଚ: ୩ ବର୍ଷରେ ୧୯,୨୧୬ କୋଟିରୁ ଅଧିକ ଟଙ୍କା ବଣ୍ଟନ
ନୂଆଦିଲ୍ଲୀ: ଅନୁସୂଚିତ ଜାତି (ଏସ୍ସି) ବର୍ଗର ଛାତ୍ରଛାତ୍ରୀଙ୍କ ଶିକ୍ଷାକୁ ଆର୍ଥିକ ସହାୟତା ଯୋଗାଇବା ଦିଗରେ କେନ୍ଦ୍ର ସରକାରଙ୍କ ପକ୍ଷରୁ ବଡ଼ ପଦକ୍ଷେପ ନିଆଯାଇଛି। ସାମାଜିକ ନ୍ୟାୟ ଓ ସଶକ୍ତିକରଣ ବିଭାଗ ଅଧୀନରେ ପରିଚାଳିତ ବିଭିନ୍ନ ଛାତ୍ରବୃତ୍ତି ଯୋଜନାରେ ଗତ ତିନିଟି ଆର୍ଥିକ ବର୍ଷରେ ୧୯,୨୧୬.୪୬ କୋଟି ଟଙ୍କା ବଣ୍ଟନ କରାଯାଇଛି।
କେନ୍ଦ୍ର ସାମାଜିକ ନ୍ୟାୟ ଓ ସଶକ୍ତିକରଣ ମନ୍ତ୍ରୀ ଡ. ବୀରେନ୍ଦ୍ର କୁମାର ଲୋକସଭାରେ ଏକ ପ୍ରଶ୍ନର ଲିଖିତ ଉତ୍ତରରେ ଏହି ସୂଚନା ଦେଇଛନ୍ତି।
ବର୍ଷକୁ ବର୍ଷ ବଢ଼ିଛି ଅର୍ଥ ବଣ୍ଟନ
ସରକାରୀ ତଥ୍ୟ ଅନୁସାରେ, ୨୦୨୩-୨୪ରେ ୬,୦୯୪.୪୮ କୋଟି, ୨୦୨୪-୨୫ରେ ୬,୨୦୦.୫୯ କୋଟି ଏବଂ ୨୦୨୫-୨୬ରେ ୬,୯୨୧.୩୯ କୋଟି ଟଙ୍କା ଛାତ୍ରବୃତ୍ତି ବାବଦରେ ଜାରି ହୋଇଛି।
ଏହି ଯୋଜନାଗୁଡ଼ିକ ମଧ୍ୟରେ ଏସ୍ସି ଛାତ୍ରଛାତ୍ରୀଙ୍କ ପୋଷ୍ଟ-ମାଟ୍ରିକ୍ ଛାତ୍ରବୃତ୍ତି, ପ୍ରି-ମାଟ୍ରିକ୍ ଛାତ୍ରବୃତ୍ତି, ଉଚ୍ଚସ୍ତରୀୟ ଶିକ୍ଷା ଯୋଜନା ଏବଂ ନ୍ୟାସନାଲ ଓଭରସିଜ୍ ସ୍କଲାରସିପ୍ ସାମିଲ ରହିଛି।
ପୋଷ୍ଟ-ମାଟ୍ରିକ୍ ଯୋଜନାରେ ସର୍ବାଧିକ ଅର୍ଥ
ଗତ ତିନି ବର୍ଷରେ ଏସ୍ସି ଛାତ୍ରଛାତ୍ରୀଙ୍କ ପୋଷ୍ଟ-ମାଟ୍ରିକ୍ ଛାତ୍ରବୃତ୍ତି ବାବଦରେ ୧୭,୨୨୪.୬୩ କୋଟି ଟଙ୍କା ଜାରି ହୋଇଛି। ଏଥିରେ ୨୦୨୩-୨୪ରେ ୫,୪୭୫.୪୨ କୋଟି, ୨୦୨୪-୨୫ରେ ୫,୫୬୨.୨୬ କୋଟି ଏବଂ ୨୦୨୫-୨୬ରେ ୬,୧୮୬.୯୫ କୋଟି ଟଙ୍କା ରହିଛି।
ସେହିପରି ପ୍ରି-ମାଟ୍ରିକ୍ ଛାତ୍ରବୃତ୍ତିରେ ତିନି ବର୍ଷରେ ୧,୪୬୯.୯୨ କୋଟି ଟଙ୍କା, ଉଚ୍ଚସ୍ତରୀୟ ଶିକ୍ଷା ଯୋଜନାରେ ୩୦୪.୨୯ କୋଟି ଏବଂ ନ୍ୟାସନାଲ ଓଭରସିଜ୍ ସ୍କଲାରସିପ୍ରେ ୨୧୭.୬୨ କୋଟି ଟଙ୍କା ଜାରି କରାଯାଇଛି।
ତାମିଲନାଡୁ, ମହାରାଷ୍ଟ୍ର ଓ ୟୁପିକୁ ମିଳିଛି ବଡ଼ ସହାୟତା
ପୋଷ୍ଟ-ମାଟ୍ରିକ୍ ଛାତ୍ରବୃତ୍ତିରେ ତାମିଲନାଡୁକୁ ୨୦୨୩-୨୪ରେ ୭୧୩.୭୦ କୋଟି, ୨୦୨୪-୨୫ରେ ୧,୦୩୨.୦୯ କୋଟି ଏବଂ ୨୦୨୫-୨୬ରେ ୧,୦୩୪.୯୪ କୋଟି ଟଙ୍କା କେନ୍ଦ୍ରୀୟ ସହାୟତା ମିଳିଛି।
ମହାରାଷ୍ଟ୍ରକୁ ଏହି ତିନି ବର୍ଷରେ ଯଥାକ୍ରମେ ୧,୬୫୨.୯୮ କୋଟି, ୯୨୯.୯୨ କୋଟି ଓ ୧,୦୯୫.୮୦ କୋଟି ଟଙ୍କା ମିଳିଥିବା ବେଳେ ଉତ୍ତରପ୍ରଦେଶକୁ ୬୭୪.୮୩ କୋଟି, ୩୬୬.୦୨ କୋଟି ଓ ୬୧୭.୬୪ କୋଟି ଟଙ୍କା ମିଳିଛି।
DBT ମାଧ୍ୟମରେ ଛାତ୍ରଙ୍କ ଖାତାକୁ ଟଙ୍କା
ସରକାର କହିଛି ଯେ ଛାତ୍ରବୃତ୍ତି ବଣ୍ଟନ ପ୍ରକ୍ରିୟାକୁ ଅଧିକ ସ୍ୱଚ୍ଛ ଓ ଦ୍ରୁତ କରିବା ପାଇଁ ଡିଜିଟାଲ ବ୍ୟବସ୍ଥା ଓ Direct Benefit Transfer (DBT) ବ୍ୟବହାର କରାଯାଉଛି। ଆଧାର ସଂଯୁକ୍ତ ବ୍ୟାଙ୍କ ଖାତାକୁ ସିଧାସଳଖ ଅର୍ଥ ପଠାଯାଉଥିବାରୁ ଦେୟ ପ୍ରଦାନରେ ବିଳମ୍ବ କମିଛି।
ଛାତ୍ରବୃତ୍ତି ବଣ୍ଟନରେ ଥିବା ସମସ୍ୟା ଦୂର କରିବା ପାଇଁ ନିୟମିତ ସମୀକ୍ଷା, ଟେକ୍ନିକାଲ୍ ସହାୟତା, କ୍ଷମତା ବିକାଶ କାର୍ଯ୍ୟକ୍ରମ ଓ ଜାତୀୟସ୍ତରୀୟ କର୍ମଶାଳା ଆୟୋଜନ କରାଯାଉଛି।
ସରକାରଙ୍କ ଲକ୍ଷ୍ୟ ହେଉଛି—ଯୋଗ୍ୟ ଏସ୍ସି ଛାତ୍ରଛାତ୍ରୀଙ୍କୁ ସମୟୋଚିତ ଭାବେ ଛାତ୍ରବୃତ୍ତି ପ୍ରଦାନ କରି ଉଚ୍ଚଶିକ୍ଷାର ସୁଯୋଗକୁ ଆହୁରି ସୁଦୃଢ଼ କରିବା।
