ଆଇଏଏସ୍ ସ୍ତରରେ ଅଦଳବଦଳ: ବଦଳିଲେ ଦୁଇ ବରିଷ୍ଠ ଅଧିକାରୀ
SSEPDର ଶାସନ ସଚିବ ହେଲେ ଡା. ବୃନ୍ଦା ଡି., OMCର ଏମ୍ଡି ହେଲେ ସୁଧାଂଶୁ ମୋହନ ସାମଲ
ଭୁବନେଶ୍ୱର: ରାଜ୍ୟ ପ୍ରଶାସନିକ ସ୍ତରରେ ଛୋଟ ଧରଣର ଅଦଳବଦଳ କରିଛନ୍ତି ଓଡ଼ିଶା ସରକାର। ସୋମବାର ସାଧାରଣ ପ୍ରଶାସନ ବିଭାଗ ପକ୍ଷରୁ ଏନେଇ ବିଜ୍ଞପ୍ତି ପ୍ରକାଶ ପାଇଛି। ଏହି ଅଦଳବଦଳରେ ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତିକରଣ ବିଭାଗ (SSEPD) ଏବଂ ଓଡ଼ିଶା ଖଣି ନିଗମ (OMC)ରେ ନୂଆ ଦାୟିତ୍ୱ ବଣ୍ଟନ କରାଯାଇଛି।
ଡା. ବୃନ୍ଦା ଡି.ଙ୍କୁ ନୂଆ ଦାୟିତ୍ୱ
ମିଶନ ଶକ୍ତି ନିର୍ଦ୍ଦେଶିକା ତଥା ଅତିରିକ୍ତ ଦାୟିତ୍ୱରେ ଜାତୀୟ ସ୍ୱାସ୍ଥ୍ୟ ମିଶନର CEO ଭାବେ କାର୍ଯ୍ୟରତ ଡା. ବୃନ୍ଦା ଡି.ଙ୍କୁ ଏବେ SSEPDର କମିଶନର-ତଥା-ଶାସନ ସଚିବ ଭାବେ ନୂଆ ଦାୟିତ୍ୱ ଦିଆଯାଇଛି।
ସୁରେଶ କୁମାର ବଶିଷ୍ଠଙ୍କ ଦାୟିତ୍ୱ ପରିବର୍ତ୍ତନ
SSEPDର ପ୍ରମୁଖ ଶାସନ ସଚିବ ସୁରେଶ କୁମାର ବଶିଷ୍ଠଙ୍କ ବଦଳି ହୋଇଛି। ସେ ଏଣିକି ସାଧାରଣ ପ୍ରଶାସନ ଓ ସାଧାରଣ ଅଭିଯୋଗ ବିଭାଗର ପ୍ରମୁଖ ଶାସନ ସଚିବ ଭାବେ ସ୍ଥାୟୀ ଭାବେ ଦାୟିତ୍ୱ ତୁଲାଇବେ। ପୂର୍ବରୁ ଏହି ଦାୟିତ୍ୱ ସେ ଅତିରିକ୍ତ ଭାବେ ସମ୍ଭାଳୁଥିଲେ।
ଏଥିସହ ସଂସଦୀୟ ବ୍ୟାପାର ବିଭାଗର ପ୍ରମୁଖ ଶାସନ ସଚିବ ଭାବେ ମଧ୍ୟ ଶ୍ରୀ ବଶିଷ୍ଠ ଅତିରିକ୍ତ ଦାୟିତ୍ୱ ତୁଲାଇବେ।
OMCର ଏମ୍ଡି ହେଲେ ସୁଧାଂଶୁ ମୋହନ ସାମଲ
ବରିଷ୍ଠ ଆଇଏଏସ୍ ଅଧିକାରୀ ସୁଧାଂଶୁ ମୋହନ ସାମଲଙ୍କୁ ଓଡ଼ିଶା ଖଣି ନିଗମ ଲିମିଟେଡ୍ (OMC)ର ପରିଚାଳନା ନିର୍ଦ୍ଦେଶକ (MD) ଭାବେ ନିଯୁକ୍ତ କରାଯାଇଛି।
ଏଥିସହ ତାଙ୍କୁ ରାଜସ୍ୱ ମଣ୍ଡଳ ଆୟୁକ୍ତ (କେନ୍ଦ୍ରାଞ୍ଚଳ), କଟକ ଭାବେ ଅତିରିକ୍ତ ଦାୟିତ୍ୱ ମଧ୍ୟ ଦିଆଯାଇଛି।
ଅନ୍ୟପକ୍ଷରେ, OMCର ଅଧ୍ୟକ୍ଷ ଭାବେ ଗିରିଶ ଏସ୍.ଏନ୍.ଙ୍କ ପାଖରେ ଥିବା ଅତିରିକ୍ତ ଦାୟିତ୍ୱ ସମାପ୍ତ କରାଯାଇଛି।
ସାଧାରଣ ପ୍ରଶାସନ ବିଭାଗର ଏହି ନୂଆ ଆଦେଶ ପରେ ବିଭିନ୍ନ ବିଭାଗର ପ୍ରଶାସନିକ କାର୍ଯ୍ୟ ବଣ୍ଟନରେ ପରିବର୍ତ୍ତନ ଆସିଛି।
