ଦୁବାଇରୁ ଓଡ଼ିଶା ପାଇଁ ବଡ଼ ନିବେଶ ଆହ୍ୱାନ
LNGରୁ ଗ୍ରୀନ୍ ଏନର୍ଜି, AI ଡାଟା ସେଣ୍ଟରରୁ ରିସାଇକ୍ଲିଂ—ବିଭିନ୍ନ କ୍ଷେତ୍ରରେ UAE ନିବେଶକଙ୍କୁ ମୁଖ୍ୟମନ୍ତ୍ରୀଙ୍କ ଆମନ୍ତ୍ରଣ
ଭୁବନେଶ୍ୱର, ୧୨/୯: ଓଡ଼ିଶାରେ ନିବେଶର ନୂଆ ସମ୍ଭାବନା ଖୋଲିବାକୁ ଦୁବାଇରୁ ଜୋରଦାର ଆହ୍ୱାନ ଦେଇଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ। ୟୁଏଇ ଗସ୍ତର ଚତୁର୍ଥ ଦିନରେ ଦୁବାଇଠାରେ ଆୟୋଜିତ ଓଡ଼ିଶା ଇନଭେଷ୍ଟର୍ସ ମିଟ୍-୨୦୨୬ ଓ ରୋଡ୍ ଶୋ’ରେ ଯୋଗଦେଇ ସେ ୟୁଏଇର ଶିଳ୍ପପତି ଓ ନିବେଶକମାନଙ୍କୁ ଓଡ଼ିଶାର ବିକାଶ ଯାତ୍ରାରେ ସହଭାଗୀ ହେବାକୁ ଆମନ୍ତ୍ରଣ କରିଛନ୍ତି।
କାର୍ଯ୍ୟକ୍ରମରେ ପ୍ରାୟ ୪୦୦ ବ୍ୟବସାୟୀ, ନିବେଶକ ଓ ୟୁଏଇ ବ୍ୟବସାୟିକ ସମୁଦାୟର ପ୍ରତିନିଧି ଯୋଗଦେଇଥିଲେ। ଓଡ଼ିଶାରେ ନିବେଶ ପାଇଁ ଆବଶ୍ୟକ ଭିତ୍ତିଭୂମି, ଖଣିଜ ସମ୍ପଦ, ବନ୍ଦର, ଶିଳ୍ପ ଭିତ୍ତିଭୂମି, ଦକ୍ଷ ମାନବ ସମ୍ବଳ ଓ ନିବେଶ ଅନୁକୂଳ ପରିବେଶ ରହିଥିବା ମୁଖ୍ୟମନ୍ତ୍ରୀ ଉଲ୍ଲେଖ କରିଥିଲେ।
ଏହି କ୍ଷେତ୍ରରେ ନିବେଶର ବଡ଼ ସୁଯୋଗ
ଏଲ୍ଏନ୍ଜି ଷ୍ଟୋରେଜ, ଗ୍ରୀନ୍ ଏନର୍ଜି, କୃତ୍ରିମ ବୁଦ୍ଧିମତ୍ତା (AI) ଡାଟା ସେଣ୍ଟର, ବିରଳ ମୃତ୍ତିକା, ଜାହାଜ ମରାମତି, ପ୍ରୋପେଲାଣ୍ଟ ଉତ୍ପାଦନ, ସାର ଓ ରସାୟନ, ହାଉସିଂ, ଷ୍ଟିଲ୍ ଏବଂ ଡାଉନଷ୍ଟ୍ରିମ୍ ଶିଳ୍ପ ଭଳି କ୍ଷେତ୍ରରେ ନିବେଶକଙ୍କ ପାଇଁ ବ୍ୟାପକ ସୁଯୋଗ ଥିବା ସେ କହିଥିଲେ।
ଶିଳ୍ପମନ୍ତ୍ରୀ ସମ୍ପଦ ଚନ୍ଦ୍ର ସ୍ବାଇଁ ସରକାରଙ୍କ ‘ସ୍ପିଡ୍, ସର୍ଟନିଟି ଆଣ୍ଡ ଏକ୍ଜିକ୍ୟୁଶନ’ ନୀତି ଉପରେ ଗୁରୁତ୍ୱ ଦେଇ ନିବେଶକଙ୍କୁ ପ୍ରକଳ୍ପର ପ୍ରତ୍ୟେକ ପର୍ଯ୍ୟାୟରେ ସରକାରୀ ସହଯୋଗର ଆଶ୍ୱାସନ ଦେଇଥିଲେ।
ରିସାଇକ୍ଲିଂ ଓ ସର୍କୁଲାର ଇକୋନୋମିରେ ନଜର
ଦୁବାଇରେ ମୁଖ୍ୟମନ୍ତ୍ରୀ ବ୍ୟୁରୋ ଅଫ୍ ମିଡିଲ ଇଷ୍ଟ ରିସାଇକ୍ଲିଂ ଆସୋସିଏସନ୍ (BMR) ଓ JSW ଗ୍ରୁପ୍ ସହ ଶିଳ୍ପ ପ୍ରତିନିଧିଙ୍କୁ ନେଇ ରାଉଣ୍ଡଟେବୁଲ୍ ଆଲୋଚନା କରିଥିଲେ। ରିସାଇକ୍ଲିଂ, ସର୍କୁଲାର ଇକୋନୋମି, ସମ୍ପଦର ସର୍ବୋତ୍ତମ ବ୍ୟବହାର ଏବଂ ଭାଲ୍ୟୁ ଆଡେଡ୍ ମାନୁଫ୍ୟାକ୍ଚରିଂ ଉପରେ ଏଥିରେ ଗୁରୁତ୍ୱ ଦିଆଯାଇଥିଲା।
ଓଡ଼ିଶାର ବିକଶିତ ଧାତୁ ଓ ମାନୁଫ୍ୟାକ୍ଚରିଂ ଇକୋସିଷ୍ଟମ୍କୁ ଆଧାର କରି ରିସାଇକ୍ଲିଂ, ସେକେଣ୍ଡାରି ମେଟାଲ ଓ ସର୍କୁଲାର ଇଣ୍ଡଷ୍ଟ୍ରିରେ ନିବେଶ ପାଇଁ ମୁଖ୍ୟମନ୍ତ୍ରୀ ଶିଳ୍ପପତିମାନଙ୍କୁ ଆହ୍ୱାନ କରିଥିଲେ।
NALCO-EGA ଟେକ୍ନୋଲୋଜି ସହଯୋଗ ଉପରେ ଗୁରୁତ୍ୱ
ଜେବେଲ ଅଲୀସ୍ଥିତ Emirates Global Aluminium (EGA) ପରିଦର୍ଶନ କରି ମୁଖ୍ୟମନ୍ତ୍ରୀ ଏହାର ଆଧୁନିକ ଉତ୍ପାଦନ ପ୍ରଯୁକ୍ତି ଓ ଶିଳ୍ପ ପ୍ରଚଳନ ସମ୍ପର୍କରେ ଅବଗତ ହୋଇଥିଲେ। ଏହି ଅବସରରେ NALCO-EGA ଟେକ୍ନୋଲୋଜି ଲାଇସେନ୍ସ ଭାଗୀଦାରିତାକୁ ଆଗକୁ ବଢ଼ାଇବା ଉପରେ ଗୁରୁତ୍ୱ ଦିଆଯାଇଥିଲା।
ଏହି ସହଭାଗିତା ମାଧ୍ୟମରେ ଆଲୁମିନିୟମ୍ ଶିଳ୍ପର ଆଧୁନିକୀକରଣ, ଉତ୍ପାଦନ କ୍ଷମତା ବୃଦ୍ଧି, କମ୍ କାର୍ବନ୍ ନିର୍ଗମନ ସହ ଉତ୍ପାଦନ ଏବଂ ଅଧିକ ମୂଲ୍ୟଯୁକ୍ତ ଆଲୁମିନିୟମ୍ ଉତ୍ପାଦନ ପାଇଁ ନୂଆ ସୁଯୋଗ ସୃଷ୍ଟି ହେବାର ଆଶା ରହିଛି।
ଦୁବାଇରେ ‘ଓ୍ୱାନ୍ ଡିଷ୍ଟ୍ରିକ୍ଟ, ଓ୍ୱାନ୍ ପ୍ରଡକ୍ଟ’ ଗ୍ୟାଲେରି
ଓଡ଼ିଶାର ପାରମ୍ପରିକ ହସ୍ତତନ୍ତ ଓ ହସ୍ତଶିଳ୍ପକୁ ବିଶ୍ୱ ବଜାର ସହ ଯୋଡ଼ିବା ଲକ୍ଷ୍ୟରେ ଦୁବାଇରେ ‘ଓ୍ୱାନ୍ ଡିଷ୍ଟ୍ରିକ୍ଟ, ଓ୍ୱାନ୍ ପ୍ରଡକ୍ଟ’ ଗ୍ୟାଲେରିର ଉଦ୍ଘାଟନ କରାଯାଇଛି। ଏଠାରେ ସମ୍ବଲପୁରୀ ଶାଢ଼ି, ମାଣିଆବନ୍ଧ ହସ୍ତତନ୍ତ, କଟକର ରୁପା ତାରକସି, ରାୟଗଡ଼ାର ଡଙ୍ଗରିଆ ଶାଲ, କେନ୍ଦୁଝରର ଟେରାକୋଟା, ବାଲେଶ୍ୱରର ବ୍ଲାକ୍ ଗ୍ରାନାଇଟ୍ ମୂର୍ତ୍ତି, ପୁରୀର ପଟ୍ଟଚିତ୍ର ଓ ତାଳପତ୍ର ଖୋଦେଇ ଭଳି ଉତ୍ପାଦ ପ୍ରଦର୍ଶିତ ହୋଇଛି।
ଏହି ପଦକ୍ଷେପ ମାଧ୍ୟମରେ ଓଡ଼ିଶାର କାରିଗର, ମହିଳା ଉଦ୍ୟୋଗୀ ଓ ସ୍ଥାନୀୟ ଉତ୍ପାଦକଙ୍କ ପାଇଁ ବିଶ୍ୱ ବଜାରର ନୂଆ ଦ୍ୱାର ଖୋଲିବା ସହ ‘ଲୋକାଲ ଟୁ ଗ୍ଲୋବାଲ’ ଅଭିଯାନକୁ ଗତି ମିଳିବ ବୋଲି ଆଶା କରାଯାଉଛି।
ୟୁଏଇ ଗସ୍ତର ଶେଷ ପର୍ଯ୍ୟାୟରେ ମୁଖ୍ୟମନ୍ତ୍ରୀ ପ୍ରବାସୀ ଓଡ଼ିଆଙ୍କୁ ମଧ୍ୟ ସମ୍ବୋଧିତ କରି ଓଡ଼ିଶାରେ ନିବେଶ ପାଇଁ ଆହ୍ୱାନ ଦେଇଛନ୍ତି। ଶନିବାର ତାଙ୍କ ୫ ଦିନିଆ ୟୁଏଇ ଗସ୍ତ ଶେଷ ହେବା ସହ ସେ ଓଡ଼ିଶା ଫେରିବେ ବୋଲି ଜଣାପଡ଼ିଛି।
