ଭାରତ-ସଂଯୁକ୍ତ ଆରବ ଏମିରେଟ୍ସ ମଧ୍ୟରେ ବୈଜ୍ଞାନିକ, ବୈଷୟିକ ସହଯୋଗ ସଂକ୍ରାନ୍ତ ବୁଝାମଣାପତ୍ରକୁ କ୍ୟାବିନେଟର ଅନୁମୋଦନ
ଜେ ବି ଏନ, ୧୩/୦୧ /୨୦୨୧, (ରିପୋର୍ଟ, ସୁଶୀଲ କୁମାର ଆଇଚ), ନୂଆଦିଲ୍ଲୀ : ପ୍ରଧାନମନ୍ତ୍ରୀଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଆଜି ଅନୁଷ୍ଠିତ କ୍ୟାବିନେଟ ବୈଠକରେ ଭାରତ-ସଂଯୁକ୍ତ ଆରବ ଏମିରେଟ୍ସ ବୈଜ୍ଞାନିକ ଓ ବୈଷୟିକ ବୁଝାମଣାପତ୍ରକୁ ଅନୁମୋଦନ କରାଯାଇଛି । ଏହି ବୁଝାମଣା ଅନୁସାରେ ୟୁଏଇର ଜାତୀୟ ପାଣିପାଗ କେନ୍ଦ୍ର ଏବଂ ଭାରତର ଭୂବିଜ୍ଞାନ ମନ୍ତ୍ରଣାଳୟ ମଧ୍ୟରେ ବୈଷୟିକ ସହଯୋଗ ପ୍ରତିଷ୍ଠାହେବ । ଉଭୟ ଦେଶ ପରସ୍ପରକୁ ପାଣିପାଗ, ଭୂକମ୍ପନ, ସାମୁଦ୍ରିକସେବା, ରେଡାର, ଉପଗ୍ରହ, ସାମୁଦ୍ରିକ ଜୁଆର ମାପିବା ଆଦି କ୍ଷେତ୍ରରେ ତଥ୍ୟ ପ୍ରଦାନ କରିବେ ଏବଂ ଆବଶ୍ୟକ ବେଳେ ସାହାଯ୍ୟ ସହଯୋଗ ଯୋଗାଇଦେବେ ।
ଏଥିରେ ଏକାଧିକ ବିଷୟବସ୍ତୁ ରହିଛି । ସେଗୁଡିକହେଲାଉଭୟ ଦେଶର ବୈଜ୍ଞାନିକ, ଗବେଷକ, ବିଶେଷଜ୍ଞ, ବିଦ୍ୱାନ, ଉଭୟ ଦେଶ ପରିଭ୍ରମଣ କରି ତାଲିମ, ଶିକ୍ଷଣ, ପରାମର୍ଶ ଆଦି କାର୍ଯ୍ୟ କରିବେ । ବିଶେଷକରି ପାଣିପାଗସଂକ୍ରାନ୍ତ ତଥ୍ୟାବଳୀ, ଉପଗ୍ରହ ତଥ୍ୟ ବ୍ୟବହାର ଏବଂ ଝଡବାତ୍ୟାର ପୂର୍ବାନୁମାନ କ୍ଷେତ୍ରରେ ଉଭୟ ମିଶି କାମକରିବେ । ସେହିଭଳି ଉଭୟ ପକ୍ଷ ପରସ୍ପର ମଧ୍ୟରେ ବୈଜ୍ଞାନିକ ଓ ବୈଷୟିକ ତଥ୍ୟ ଆଦାନ ପ୍ରଦାନ କରିବେ । ଏହାଛଡା ଦୁଇପକ୍ଷ ବୈଜ୍ଞାନିକ ଓ ବୈଷୟିକ ସେମିନାର, ୱାର୍କସପ୍ ଓ ସମ୍ମିଳନୀ ଆଦି ଆୟୋଜନ କରି ପରସ୍ପରକୁ ସାହାଯ୍ୟ ଯୋଗାଇଦେବେ । ସାମୁଦ୍ରିକ ଜଳରାଶିରେ ପାଣିପାଗ ପର୍ଯ୍ୟବେକ୍ଷଣ ପାଇଁ ଉପକରଣ ଓ ଯନ୍ତ୍ରପାତି ସ୍ଥାପନ ନିମନ୍ତେ କାର୍ଯ୍ୟ କରିବେ । ଉଭୟ ପକ୍ଷ ସୁନାମିର ଅନୁଧ୍ୟାନ ଏବଂଏହାରଗତିବିଧି ନିର୍ଦ୍ଧାରଣ ପାଇଁ ଓମାନ ଓ ଆରବ ସାଗର ଏବଂ ଭାରତ ମହାସାଗର ଅଞ୍ଚଳରେ ମିଳିତଭାବେ କାର୍ଯ୍ୟ କରିବାକୁ ଚୁକ୍ତିବଦ୍ଧ । ଭୂମିକମ୍ପ ସଂପର୍କୀୟ ତଥ୍ୟ ଆଦାନପ୍ରଦାନ ମଧ୍ୟ ଦୁଇପକ୍ଷ ମଧ୍ୟରେ କରାଯିବ । ଏହାଛଡା ଅନ୍ୟାନ୍ୟ ଦ୍ୱିପାକ୍ଷିକ ବୈଷୟିକ ସହଯୋଗ କ୍ଷେତ୍ରରେ ଦୁଇଦେଶ ଏହି ବୁଝାମଣା ଅନୁସାରେ କାର୍ଯ୍ୟ କରିବେ ।
ପୃଷ୍ଠଭୂମି
ଭାରତ ମହାସାଗରର ଉତ୍ତରାଞ୍ଚଳରେ ଥିବା ଦେଶଗୁଡିକରେ ପାଣିପାଗର ପର୍ଯ୍ୟବେକ୍ଷଣ ଏବଂ ଭୂମିକମ୍ପ, ସୁନାମି, ଝଡବାତ୍ୟା ଆଦିର ପୂର୍ବାନୁମାନ ପାଇଁ ଦେଶ ଦେଶ ମଧ୍ୟରେ ସହଯୋଗର ଆବଶ୍ୟକତା ଥିବାରୁ ଏ କ୍ଷେତ୍ରରେ ମିଳିମିଶି କାମ କରିବା ପାଇଁ ଉଭୟ ଭାରତ ଓ ସଂଯୁକ୍ତ ଆରବ ଏମିରେଟ୍ସ 2019ରେ କାର୍ଯ୍ୟ ଆରମ୍ଭ କରିଥିଲେ । ଏଥିପାଇଁ ଉଭୟ ଦେଶର ପ୍ରତିନିଧିମଣ୍ଡଳ ଦୁଇଦେଶ ଗସ୍ତ କରି ବିଭିନ୍ନ ସାଧାରଣ କ୍ଷେତ୍ରରେ କାମ କରିବା ପାଇଁ ରାଜି ହୋଇଥିଲେ । ତଦନୁସାରେ ଏହି ବୁଝାମଣାପତ୍ର ସ୍ୱାକ୍ଷରିତ ହୋଇଛି ।
