ତମାଖୁ ଗାଁ ଅଭିଯାନ ବାଟବଣା ଆଜି ବିଶ୍ୱ ତମାଖୁ ଦିବସ କାମ ଦେଉନି କୋଟପା ନିୟମ
ତାଳଚେର, ୩୧/୦୫ ପ୍ରତିଟି ଜୀବନ ମୂଳ୍ୟବାନ୍! ଏହି ଉକ୍ତିକୁ ଆଧାରକରି ସ୍ୱାସ୍ଥ୍ୟ ବିଭାଗ ପକ୍ଷରୁ ଅନେକ ପଦକ୍ଷେପ ଗ୍ରହଣ କରାଯାଉଛି । ତମାଖୁ ବର୍ଜନ ଓ ସଚେତନ କାର୍ଯ୍ୟକ୍ରମ ଭଳି ଅନେକ କାର୍ଯ୍ୟ ପନ୍ଥା ଆପଣାଉଥିଲେ ହେଁ ଏହା ଫେଲ ମାରୁଥିବା ଘଟଣା ଜଳଜଳ ହୋଇ ଦେଖାଯାଉଛି । ଏହିସବୁ ଯୋଜନା ପାଇଁ ସରକାରଙ୍କ କୋଟି କୋଟି ଟଙ୍କା ଖର୍ଚ୍ଚା କରାଯାଇ ହୋଡ଼ିଙ୍ଗ, ପୋଷ୍ଟର, ବ୍ୟାନର୍ ଜନସଚେତନତା ରାଲି ଇତ୍ୟାଦି କରାଯାଉଥିଲେ ମଧ୍ୟ ଏଥିରେ ଶୂନ୍ୟ ସଫଳତା । ସରକାରୀ ଅନୁଷ୍ଠାନ ଠାରୁ ଆରମ୍ଭକରି ସ୍ୱଚ୍ଛାସେବୀ ସଂସ୍ଥା ସଂଗଠନ ମାନେ ସଚେତନତା ବାର୍ତା ପ୍ରଦାନ କରୁଛନ୍ତି, ହେଲେ ଏବସୁ ବାର୍ତା ସୀମିତ ହୋଇ ସେହି ଦିନରେ ହିଁ ରହି ଯାଉଛି । ତମାଖୁ ସ୍ୱାସ୍ଥ୍ୟ ପାଇଁ କ୍ଷତିକାରକ ଲେଖା ଯାଉଥିବା ସତ୍ୱେ ଏହାର ବହୁଳ ବ୍ୟବହାର ଚାଲିଛି । ସ୍ୱାସ୍ଥ୍ୟ ବିଶେଷଜ୍ଞ ମତରେ ତମାଖୁ ସେବନ କର୍କଟର ମୁଖ୍ୟ କାରଣ ଏବେ ଅଧିକରୁ ଅଧିକ ଯୁବପିଢ଼ୀ ତମାଖୁ ସେବନକରି ବିଭିନ୍ନ ମାରାତ୍ମକ ରୋଗର ଶୀକାର ହେଉଥିବା ଲକ୍ଷ୍ୟ କରାଯାଉଛି । ବିଶେଷ କରି ୭୮%ରୁ ଅଧିକ ଲୋକ ତମାଖୁ ବ୍ୟବହାର କରୁଛନ୍ତି । ଏବେ ବିଭିନ୍ନ ଛକ ବଜାର ଶିକ୍ଷାନୁଷ୍ଠାନ ନିକଟ ତଥା ଷ୍ଟଲ ଗୁଡ଼ିକରେ ଖୋଲାଖୋଲିଭାବେ ନିଶା ଦ୍ରବ୍ୟ ବିକ୍ରି େହେଉଥିଲେ ମଧ୍ୟ ପ୍ରଶାସନିକ ଅଧିକାରୀଙ୍କ ଦୃଷ୍ଟିନାହିଁ । ସର୍ବ ସାଧାରଣ ସ୍ଥାନରେ ଅନେକ ବୃଦ୍ଧ ଠାରୁ ଆରମ୍ଭ କରି ଯୁବକ ପର୍ଯ୍ୟନ୍ତ ଧ୍ରୁମପାନ କରୁଥିବା ଦେଖିବାକୁ ମିଳୁଛି । ଏଥିପାଇଁ କୋଟପା ଆଇନ ଏବେ ଏହା ଶୀତଳ ଭଣ୍ଡାରରେ ପଡ଼ି ରହିଛି । ତମାଖୁ ଅଭିଯାନ ଏବେ ବାଟବଣା ହୋଇଛି । ଗ୍ରାମାଚଂଳ ଠାରୁ ସହରାଚଂଳ ପର୍ଯ୍ୟନ୍ତ ଏବେ ଖୋଲାମେଲାରେ ବିକ୍ରି ବଢ଼ିବାରେ ଲାଗିଛି । ବାହାର ରାଜ୍ୟରୁ ତାଳଚେର ଅଂଚଳକୁ ୱାଗନରେ ଓ ଭାରୀଯାନ ମଧ୍ୟରେ ଟ୍ରିପ୍ ଟ୍ରିପ୍ ତମାଖୁ ଆସୁଥିଲେ ହେଁ ଏହାର ଏହା ଉପରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନଥିବା ଏକ ପରିତାପର ବିଷୟ ହୋଇଛି । ନିଶା ସେବନ ଯୋଗୁଁ ପାକସ୍ଥଳୀ, କର୍କଟ, ଗଳାକର୍କଟ, ଯକୃତକର୍କଟ ଇତ୍ୟାଦି ମାରାତ୍ମକ ରୋଗ ହୋଇ ଜୀବନ ଚାଲି ଯାଉଛି । ହୃଦରୋଗର ମଧ୍ୟ ଏହା ଏକ ପ୍ରମୁଖ କାରଣ । ତଥ୍ୟ ଅନୁସାରେ କେବଳ ତମାଖୁ ସେବନ ଯୋଗୁଁ ବର୍ଷକୁ ୧୦ହଜାର ଅଧିକ ପିଡ଼ିତ ହୋଇଥାନ୍ତି । ସରାକାର ଏହାକୁ ପ୍ରଚାର ପ୍ରସାରେ ଟଙ୍କା ଖର୍ଚ୍ଚ କରୁଥିଲେ ହେଁ ଏହା ଉପରେ ଅଂଙ୍କୁଶ ଲାଗି ପାରୁନି! ଏବେ ତାଳଚେର ସହର ଠାରୁ ଆରମ୍ଭ କରି ବିଭିନ୍ନ ଦୋକାନରେ ପ୍ରଚୁର ଭାବେ ଖୋଲମ ଖୁଲାଭାବେ ଗୁଟଖା, ଖଇନି, ସିଗାରେଟ୍, ଗଞ୍ଜେଇ ମିଶା ସିଗାରେଟ୍, ବିକ୍ରି ହେଉଥିଲେ ମଧ୍ୟ ପ୍ରଶାସନ ନିରବଦ୍ରଷ୍ଟା । ଖାଲି ଦିବସ ପାଳନ କଲେ ହେବ ନାହିଁ ଏହାର ତଦାରଖ କରିବା ସହ ନିୟମିତ ବ୍ୟବଧାନରେ ଯାଂଚ କରି ଉପଯୁକ୍ତ ପଦକ୍ଷେପ ଗ୍ରହଣ କଲେ କିଛି ମାତ୍ରାରେ ରୋକ ଲଗାଯାଇ ପାରିବ ବୋଲି ସ୍ୱାସ୍ଥ୍ୟ ବିଶେଷଜ୍ଞ ମତ ଦେଇଛନ୍ତି ।
