ହାତୀ ଆକ୍ରମଣରେ ଯୁବକର ମୃତ୍ୟୁ
ହିନ୍ଦୋଳ -ହାତୀ ଆକ୍ରମଣରେ ଦିନକୁ ଦିନ ମୃତ୍ୟୁ ସଂଖ୍ୟା ବଢ଼ି ଚାଲିଥିବା ବେଳେ ନିରୁପାୟ ସାଜିଛି ବନ ବିଭାଗ। ଓଡ଼ିଶାର ହିନ୍ଦୋଳ ବ୍ଲକରେ ସର୍ବାଧିକ ୨୦୦ ରୁ ଅଧିକ ହାତୀ ଚଳପ୍ରଚଳ କରୁଥିବା ବେଳେ ପରିସ୍ଥିତି ଏମିତି ହେଲାନି ଘରୁ ବାହାରକୁ ବାହାରିବାକୁ ଲୋକେ ନିରାପଦ ମଣୁ ନାହାନ୍ତି। ଗାଈଗୋରୁ ରାସ୍ତାରେ ବୁଲିବା ଭଳି ଜଂଗଲୀ ହାତୀ ବର୍ତ୍ତମାନ ଦିନ ଦ୍ୱିପ୍ରହର ଗାଁ ଗାଁ ବୁଲିଲେଣି ଯାହା ଫଳରେ ଅଭିଭାବକ ମାନେ ପିଲା ମାନଙ୍କୁ ବିଦ୍ୟାଳୟକୁ ଛାଡ଼ିବାକୁ ଭୟ କଲେଣି। ସେହିପରି ସାଧାରଣ ଲୋକଟିଏ ର ଦେହ ଅସୁସ୍ଥ ହେଲେ ନିକଟସ୍ଥ ଡାକ୍ତରଖାନା କୁ ଯିବାକୁ ସାହସ ଜୁଟାଇ ପାରୁନାହାଁନ୍ତି। ଏପରିକି ସନ୍ଧ୍ୟାହେଲେ ଆମ୍ବୁଲାନ୍ସ କୁ ଫୋନ କଲେ ମଧ୍ୟ ହାତୀ ଭୟ ଯୋଗୁଁ ଆମ୍ବୁଲାନ୍ସ ସାଧାରଣ ଲୋକଙ୍କ ପାଖରେ ପହଞ୍ଚି ପାରୁନାହିଁ। ଏପରି ସ୍ଥଳେ ହିନ୍ଦୋଳ ଵାସୀ ଙ୍କ ମଧ୍ୟରେ କୋକୁଆ ଭୟ ସୃଷ୍ଟି ହେଲାଣି। ଯଦି ଅନୁମାନ କରାଯାଏ ହିନ୍ଦୋଳ ବାନାଞ୍ଚଳ ରେ ପ୍ରତ୍ୟେକ ଦିନ ହାତୀ ଆକ୍ରମଣ ଜନିତ ଦୁର୍ଘଟଣା ମାନ ଦେଖିବାକୁ ମିଳୁଛି। ଜଙ୍ଗଲି ହାତୀଙ୍କ ଯୋଗୁଁ ଚାଷ କାର୍ଯ୍ୟ ମଧ୍ଯ ସମ୍ପୂର୍ଣ୍ଣ ଠପ ହେବାକୁ ବସିଲାଣି। ଚଳିତ ବର୍ଷ ବିଳମ୍ବରେ ବର୍ଷା ହୋଇଥିଲେ ମଧ୍ଯ ଚାଷୀ ମନରେ ଅହେତୁକ ଆଗ୍ରହ ସୃଷ୍ଟି ହେଇ ଧାର ଉଧାର କରି ଧାନ ଚାଷ କରିଥିବା ବେଳେ ପ୍ରତ୍ୟେକ ଦିନ ଏକର ଏକର ଜମିକୁ ହାତୀ ଦଳି ନଷ୍ଟ କରିବା ସହିତ ଧାନ ଫସଲକୁ ଖାଇ ନଷ୍ଟ କରୁଛି। କେତେକ ଯୁବକ ପେଟ ପାଟଣା ପାଇଁ ନିକଟରେ ଥିବା ରୁଙ୍ଗଟା କମ୍ପାନୀ, ଟାଟା ଷ୍ଟିଲ, ଏନଜିଏମ, ସାଲିମାର ଭଳି କମ୍ପାନୀ କୁ କାମ କରିବାକୁ ଯାଉଥିବା ବେଳେ ହାତୀ ଭୟ ଯୋଗୁଁ ସେମାନେ ବାହାର ରାଜ୍ୟକୁ ଯିବାକୁ ପ୍ରସ୍ତୁତ ହେଲେଣି। ପରିସ୍ଥିତି ଏମିତି ହେଲାଣି ପରିବାର ପ୍ରତିପୋଷଣ କରିବା ଗୋଟିଏ ସାଧାରଣ ଲୋକ ପକ୍ଷରେ କଷ୍ଟକର ହୋଇ ପଡ଼ିଲାଣି। ଦୁଇ ମାସ ତଳେ ହିନ୍ଦୋଳ ବନାଞ୍ଚଳ ବାଘଧରିଆ ଗ୍ରାମରେ ଭୋର୍ ସମୟରେ ହାତୀ ଆକ୍ରମଣର ତିନି ଜଣଙ୍କ ମୃତ୍ୟୁ ହୋଇଥିବା ନେଇ ସାରା ରାଜ୍ୟରେ ଚାଞ୍ଚଲ୍ୟ ସୃଷ୍ଟି କରିଥିଲା। ସେହି ଘଟଣାର ସପ୍ତାହ ନ ପୁରୁଣୁ ଟାଙ୍ଗିଶାଳ ଗ୍ରାମରେ ଜଣକର ମୃତ୍ୟୁ ହୋଇଥିବା ବେଳେ ସରପା ଗ୍ରାମରେ ଜଣକର, ବେଡାପଡ଼ା ଗ୍ରାମରେ ଜଣକର ମୃତ୍ୟୁ ହୋଇଥିଲା। ସାନହିନ୍ଦୋଳ ଗ୍ରାମର ଜଣେ ବୃଦ୍ଧଙ୍କୁ ହାତୀ ଆକ୍ରମଣ କରିବାରୁ ଗତ ସପ୍ତାହେ ହେଲା କଟକ ବଡ଼ ଡ଼ାକ୍ତରଖାନାରେ ଚିକିତ୍ସିତ ହେଉଛନ୍ତି। ଏ ସମସ୍ତ ଘଟଣା ଲୋକଙ୍କ ମନରୁ ନଲିଭୁଣୁ ଗତକାଲି ଗାଲପଡ଼ା ଠାରେ ଜଣେ ଯୁବକଙ୍କର ହାତୀ ଆକ୍ରମଣରେ ମୃତ୍ୟୁ ଘଟିଛି। ଆଜି ସକାଳେ ବାଲିମି ଥାନା ଅନ୍ତର୍ଗତ ବାଲିମି ଗ୍ରାମର ନରୋତ୍ତମ ବେହେରା ୫୪ ଙ୍କୁ ତାଙ୍କ ଘର ପାଖରେ ହାତୀ ଗୋଡେଇ ଆକ୍ରମଣ କରିବାରୁ ଘଟଣା ସ୍ଥଳରେ ହିଁ ତାଙ୍କର ମୃତ୍ୟୁ ଘଟିଥିଲା। ଘଟଣା ଘଟାଇ ଦନ୍ତା ହାତୀଟି ଦୀର୍ଘ ସମୟ ଧରି ଘଟଣା ସ୍ଥଳରେ ଛିଡା ହୋଇ ରହିବାରୁ ନରୋତ୍ତମ ଙ୍କୁ ଉଦ୍ଧାର କରିବା ପାଇଁ କେହି ସାହସ ଯୁଟାଇ ପାରି ନଥିଲେ । ଘଟଣା ସ୍ଥଳରେ ବନ ବିଭାଗ କର୍ମଚାରୀ ପହଞ୍ଚିବାରୁ ଉଭୟ କର୍ମଚାରୀ ଓ ଗ୍ରାମବାସୀ ଙ୍କ ମିଳିତ ଉଦ୍ୟମରେ ହାତୀ ଘଉଡା ଯାଇଥିଲା। ସେଠାରେ ଉତ୍ତେଜନା ମୂଳକ ପରିସ୍ଥିତି ସୃଷ୍ଟି ହେବା ସହ ପରିବାର ଲୋକ ମୃତ ଦେହ ବାଲିମି ଛକରେ ରଖି ରାସ୍ତାରୋକ କରିଥିଲେ। ଫଳରେ ସହ ସହ ଗାଡ଼ି ମଟର ରାସ୍ତାରେ ଅଟକି ରହିଥିଲା। ଖବର ପାଇ ବାଲିମି ଥାନାଧିକାରୀ, ହିନ୍ଦୋଳ ଭାରପ୍ରାପ୍ତ ରେଞ୍ଜର ଅଧିକାରୀ ଘଟଣା ସ୍ଥଳରେ ପହଞ୍ଚି ଲୋକଙ୍କୁ ବୁଝା ସୁଝା କରିବା ସହ ସରକାରଙ୍କ ପକ୍ଷରୁ ମୃତକଙ୍କ ପରିବାରକୁ ତୁରନ୍ତ ସହାୟତା ରାଶି ଯୋଗାଇ ଦେବା ସହ ହାତୀ ଦାଉରୁ ଗ୍ରାମକୁ ସୁରକ୍ଷା ଦେବା ନିମନ୍ତେ ସମସ୍ତ ପଦକ୍ଷେପ ଗ୍ରହଣ କରାଯିବ ବୋଲି ଲିଖିତ ପ୍ରତିଶ୍ରୁତି ଦେବାପରେ ଧାରଣାରୁ ଲୋକ ଉହରିବା ସହିତ ପରିସ୍ଥିତି ଶାନ୍ତ ପଡିଥିଲା।ତତ୍ ସହିତ ହିନ୍ଦୋଳ ବନାଞ୍ଚଳରେ ଧନ ଜୀବନ ସୁରକ୍ଷା ନେଇ ତ୍ୱରିତ ପଦକ୍ଷେପ ଗ୍ରହଣ କରିବା ନିମନ୍ତେ ନିବେଦନ ରଖିଛନ୍ତି।
