ସୋନପୁର: ସୁବର୍ଣ୍ଣପୁର ଜିଲା ସଂସ୍କୃତି ସମ୍ପନ୍ନ। ଏହି ମାଟିରେ ସନ୍ଥକବି ଭୀମ ଭୋଇଙ୍କ ସମାଧି ପୀଠ ରହିଛି। ଯେଉଁ ସନ୍ଥଙ୍କ କାଳଜୟୀ ବାଣୀ ‘ମୋ ଜୀବନ ପଛେ ନର୍କେ ପଡ଼ିଥାଉ ଜଗତ ଉଦ୍ଧାର ହେଉ…’ କେବଳ ରାଜ୍ୟ ଓ ଭାରତ କାହିଁକି; ଜାତିସଂଘର କେନ୍ଦ୍ରୀୟ ଗୃହରେ ଲିପିବଦ୍ଧ ହୋଇ ରହିଛି। ସୁବର୍ଣ୍ଣପୁର ରାମେଶ୍ବର ଷ୍ଟାଡିୟମରେ ଅନୁଷ୍ଠିତ ଜିଲାସ୍ତରୀୟ ସୁଭଦ୍ରା ଶକ୍ତି ମେଳାରେ ମୁଖ୍ୟ ଅତିଥି ଭାବେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଯୋଗଦେଇ ଏହା କହିଛନ୍ତି।
ଜିଲାର ବିକାଶ ପାଇଁ ମୁଖ୍ୟମନ୍ତ୍ରୀ ୨୭୬ କୋଟି ଟଙ୍କାର ପ୍ରକଳ୍ପ ଭେଟି ଦେଇଛନ୍ତି।
ଜିଲାସ୍ତରୀୟ ସୁଭଦ୍ରା ଶକ୍ତି ମେଳାକୁ ମୁଖ୍ୟମନ୍ତ୍ରୀ ଶ୍ରୀ ମାଝୀ ଉଦ୍ଘାଟନ କରିବା ସହ ସୁଭଦ୍ରା ଯୋଜନା ମହିଳାଙ୍କ ଆର୍ଥିକ ବିକାଶରେ ଏକ ମହତ୍ତ୍ୱାକାଂକ୍ଷୀ ଯୋଜନା ବୋଲି କହିଥିଲେ। ଜିଲାରେ ବର୍ତ୍ତମାନ ୬୧ ହଜାର ଲକ୍ଷପତି ଦିଦି ରହିଥିବା ବେଳେ ୨ ଶହ ମହା ଲକ୍ଷପତି ଦିଦି ରହିଛନ୍ତି। ଏହାକୁ ଆଗାମୀ ଦିନରେ ଆହୁରି ବୃଦ୍ଧି କରି ମହିଳାଙ୍କୁ ସ୍ୱାବଲମ୍ବୀ କରିବାକୁ ସେ ଆହ୍ୱାନ ଦେଇଥିଲେ। ଏହି ଅବସରରେ ମୁଖ୍ୟମନ୍ତ୍ରୀ ୨୭୬ କୋଟି ଟଙ୍କାର ୫୮ଟି ବିଭିନ୍ନ ବିକାଶମୂଳକ ପ୍ରକଳ୍ପର ଉଦ୍ଘାଟନ ସହ ଶିଳାନ୍ୟାସ ଦେଇଥିଲେ। ସନ୍ଥ କବିଙ୍କ ସମାଧି ପୀଠର ବିକାଶ ପାଇଁ ୩୫ କୋଟି ଟଙ୍କାର ଆର୍ଥିକ ଅନୁଦାନ ଘୋଷଣା କରି ଏହି ଅର୍ଥରେ ଐତିହ୍ୟ ସଂରକ୍ଷଣ, ଭିତ୍ତିଭୂମିର ବିକାଶ ସହ ପାରିପାର୍ଶ୍ବିକ ବିକାଶ କରାଯିବ ବୋଲି ମୁଖ୍ୟମନ୍ତ୍ରୀ ଶ୍ରୀ ମାଝୀ କହିଥିଲେ। ଏଥିସହିତ ୯.୫୭ କୋଟି ଟଙ୍କା ବ୍ୟୟରେ ଡୁଙ୍ଗୁରିପାଲି ବ୍ଲକରେ ଥିବା ଓଡ଼ିଶା ଆଦର୍ଶ ବିଦ୍ୟାଳୟର ଛାତ୍ରାବାସ ଉଦ୍ଘାଟନ, ୩ କୋଟି ଟଙ୍କା ବ୍ୟୟରେ ଡୁଙ୍ଗୁରିପାଲି ବ୍ଲକ ଅଞ୍ଚଳରେ ଭିତ୍ତିଭୂମିର ବିକାଶ, ୫.୮୯ କୋଟିରେ ସୋନପୁର, ଡୁଙ୍ଗୁରିପାଲି, ମେଣ୍ଡା ଆଦି ଡେ କେୟାର ହେଲ୍ଥ ସେଣ୍ଟରର ଉନ୍ନତିକରଣ, ୬୮.୬୬କୋଟି ଟଙ୍କା ବ୍ୟୟରେ ଜିଲାର ବିଭିନ୍ନ ଅଞ୍ଚଳରେ ୩୫ କିମି ରାଜମାର୍ଗର ଉନ୍ନତିକରଣ, ୧.୬୫ କୋଟିରେ ଉଲୁଣ୍ଡା ଓ ବିନିକା ପ୍ରାଣୀଧନ ଚିକିତ୍ସାଳୟର ବିକାଶ, ୧୦.୨୮ କୋଟି ବ୍ୟୟରେ ଜିଲା ସଦର ମହକୁମା ସମେତ ବିଭିନ୍ନ ସହରାଞ୍ଚଳରେ ଥିବା କଲ୍ୟାଣ ମଣ୍ଡପ ଗୁଡ଼ିକର ଉଦ୍ଘାଟନ ଆଦି ବିଭିନ୍ନ ପ୍ରକଳ୍ପର ଶିଳାନ୍ୟାସ ଓ ଉଦ୍ଘାଟନ କରିଥିଲେ।
ସେହିପରି ସୋନପୁର ସହରରେ ଜଙ୍କ୍ସନ୍ ରାସ୍ତା ପାଇଁ ୪ କୋଟି, ଗାନ୍ଧୀ ଷ୍ଟାଡିୟମର ଆଲୋକୀକରଣ ସହ ଉନ୍ନତିକରଣ ପାଇଁ ୨୫.୨୫ କୋଟି ଓ ୨୩ କୋଟି ଟଙ୍କା ବ୍ୟୟରେ ସ୍ଥାନୀୟ ସଂସ୍କୃତି ଭବନ ପରିସରରେ ଏକ ମୁକ୍ତାକାଶ ରଙ୍ଗମଞ୍ଚ ନିର୍ମାଣ କରାଯିବ ବୋଲି ମୁଖ୍ୟମନ୍ତ୍ରୀ ପ୍ରକାଶ କରିଥିଲେ । ସେହିପରି ଜିଲାରେ ଜଳସେଚନର ବିକାଶ ପାଇଁ ବିଭିନ୍ନ ନଦୀରେ ୪ଟି ଇନ୍ଷ୍ଟ୍ରିମ୍ ଷ୍ଟୋରେଜ୍ ସିଷ୍ଟମ୍ର ଡିପିଆର୍ ପ୍ରସ୍ତୁତ ଶେଷ ହୋଇ ସାରିଥିବା ଓ ମହାଡୁଗୋଛା ତେଲନଦୀରେ ଆଉ ଏକ ଇନ୍ଷ୍ଟ୍ରିମ୍ ଷ୍ଟୋରେଜ୍ ସିଷ୍ଟମ ନିର୍ମାଣ କରାଯିବାକୁ ଯୋଜନା ରହିଥିବା ସୂଚନା ଦେଇଥିଲେ।
ପୂର୍ବ ସରକାର ଅଭିଯୋଗ ଶୁଣାଣି ପ୍ରକୋଷ୍ଠକୁ ଆଦୌ ଗୁରୁତ୍ୱ ଦେଉ ନଥିବା ବେଳେ ଏହି ସରକାର ପ୍ରତ୍ୟେକ ସୋମବାର ପଞ୍ଚାୟତରୁ ଆରମ୍ଭ କରି ରାଜ୍ୟସ୍ତର ପର୍ଯ୍ୟନ୍ତ ଅଭିଯୋଗ ଶୁଣାଣିକୁ ଗୁରୁତ୍ୱ ଦେଉଛନ୍ତି ଏହି ଗୋଟିଏ ଦିନ ଅଧିକାରୀ ମାନେ ଜନସାଧାରଣଙ୍କ ପାଇଁ ଉତ୍ସର୍ଗୀକୃତ ରହିବେ ବୋଲି କହିଥିଲେ। କାର୍ଯ୍ୟକ୍ରମରେ ବୀରମହାରାଜପୁର ବିଧାୟକ ରଘୁନାଥ ଜଗଦଲା ୬୪ କୋଟି ଟଙ୍କା ବ୍ୟୟରେ ପାତାଳି ଶ୍ରୀକ୍ଷେତ୍ରରେ ଭବ୍ୟ ମନ୍ଦିର ନିର୍ମାଣ ହେବା ସହ ଆନୁସଙ୍ଗିକ ବିକାଶ କରାଯିବ ବୋଲି କହିଥିଲେ। ସେହିପରି ସୁବର୍ଣ୍ଣପୁରରେ ମତ୍ସ୍ୟ ମହାବିଦ୍ୟାଳୟ ଓ ବଲାଙ୍ଗିରରେ କୃଷି ମହାବିଦ୍ୟାଳୟ ପ୍ରତିଷ୍ଠା, ବୀରମହାରାଜପୁରରେ ଚିଲିଂ ପ୍ଲାଣ୍ଟ ଓ ଠେଙ୍ଗୋ ଡ୍ୟାମ୍ର ଉନ୍ନତିକରଣ କରାଯିବ ବୋଲି କହିଥିଲେ। ସୋନପୁର କଲେଜକୁ ସରକାରୀ ମାନ୍ୟତା, ରିଂ ରୋଡ୍ ନିର୍ମାଣ ଆଦି ପର୍ଯ୍ୟାୟ କ୍ରମେ କରାଯିବ ବୋଲି ସୂଚନା ଦେଇଥିଲେ।
ପ୍ରାରମ୍ଭରେ ଜିଲାପାଳ ଡ.ନୃପରାଜ ସାହୁ ସ୍ୱାଗତ ଭାଷଣ ପ୍ରଦାନ କରିଥିଲେ। କାର୍ଯ୍ୟକ୍ରମରେ ସମସ୍ତ ଜିଲାସ୍ତରୀୟ ଅଧିକାରୀଙ୍କ ସମେତ ଜିଲାର କୋଣ ଅନୁକୋଣରୁ ଆସିଥିବା ଶତାଧିକ ମହିଳା ସ୍ୱୟଂ ସହାୟକ ଗୋଷ୍ଠୀର ସଦସ୍ୟା ସାମିଲ ହୋଇଥିଲେ। ଏହି ଅବସରରେ ମୁଖ୍ୟମନ୍ତ୍ରୀ ପ୍ରଥମେ ଭୀମ ଭୋଇଙ୍କ ସମାଧି ପୀଠ ଖଲିଆପାଲିକୁ ଯାଇ ସେଠାରେ ମହିମା ମନ୍ଦିର ଦର୍ଶନ କରିବା ସହ ୨ କ୍ୱିଣ୍ଟାଲ ୧୨ କେଜି ୯ ଶହ ଗ୍ରାମ ଓଜନ କଂସା ନିର୍ମିତ ଏକ ଘଣ୍ଟିର ଉଦଖଘାଟନ କରିଥିଲେ। ଏଥିରେ ଟ୍ରଷ୍ଟର ସମସ୍ତ ସଦସ୍ୟଙ୍କ ସହ ଗ୍ରାମବାସୀ ଉପସ୍ଥିତ ଥିଲେ।
