ତାଳଚେରକୁ ସ୍ୱତନ୍ତ୍ର ଜିଲ୍ଲା କରିବା ଦାବୀରେ ମୁଖ୍ୟମନ୍ତ୍ରୀଙ୍କୁ ଦାବୀପତ୍ର
ତାଳଚେର, ୨୧/୦୨ ତାଳଚେରକୁ ଏକ ସ୍ୱତନ୍ତ୍ର ଜିଲ୍ଲା କରିବା ଦାବୀରେ ତାଳଚେର ଜିଲ୍ଲା କ୍ରିୟାନୁଷ୍ଠାନ କମିଟିର ଏକ ପ୍ରତିନିଧି ମଣ୍ଡଳୀ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ସ୍ୱତନ୍ତ୍ର ଶାସନ ସଚିବ ସୁକାନ୍ତ କୁମାର ବେହେରାଙ୍କୁ ଦାବୀ ପ୍ରଦାନ କରି ତାଳଚେର ଜିଲ୍ଲାର ଉପକାରିତା ସମ୍ବନ୍ଧରେ ପୁଙ୍ଖାନୁପୁଙ୍ଖ ଆଲୋଚନା କରିଛନ୍ତି । କମିଟି ପକ୍ଷରୁ ଚୈତନ୍ୟ ପ୍ରଧାନ, ବିଭୂତି ପଟ୍ଟନାୟକ, କେଶବ ଭୂତିଆ, ବିଜୟ ପ୍ରଧାନ, ଦିଗାମ୍ବର ଗଡନାୟକ, ଅଭୟ ପାଣି, ପ୍ରହଲ୍ଲାଦ ସାହୁ ପ୍ରଭୃତି ଭୁବନେଶ୍ୱର ସ୍ଥିତ ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠରେ ସ୍ୱତନ୍ତ୍ର ଶାସନ ସଚିବଙ୍କୁ ଭେଟି ଆଲୋଚନା କରିଛନ୍ତି । ଦେଶର ସବୁଠାରୁ ଅଧିକ କୋଇଲା ଓ ବିଜୁଳି ଉତ୍ପାଦନ ତାଳଚେରରୁ ହେଉଥିବାରୁ ଏ ଅଂଚଳରେ ସବୁବେଳେ ଆଇନ୍ ସମସ୍ୟା ସୃଷ୍ଟି ହେଉଅଛି । ବିସ୍ଥାପିତ ସମସ୍ୟା ସବୁବେଳେ ଲାଗି ରହିଛି । ବର୍ତମାନ ପ୍ରଦୂଷଣରେ ପୃଥିବୀର ସବୁଠାରୁ ଅଧିକ ପ୍ରଦୂଷିତ ଅଂଚଳ ଭାବରେ ପରିଗଣିତ ହୋଇଅଛି । ତାଳଚେର ସରକାରଙ୍କୁ ଅଧିକ ରାଜସ୍ୱ ଦେଉଥିବାରୁ ସରକାରଙ୍କ ରାଜସ୍ୱ ହାନୀ ନହେବା ପାଇଁ ତାଳଚେରକୁ ସ୍ୱତନ୍ତ୍ର ଜିଲ୍ଲା କରିବାର ସରକାରଙ୍କ ପାଇଁ ଆବଶ୍ୟକତା ରହିଅଛି । ତାଳଚେର-ପାଲଲହଡା-ପରଜଙ୍ଗ ଜନସାଧାରଣଙ୍କ ଗମନାଗମନ ସୁବିଧା ଦୃଷ୍ଟିରୁ ତାଳଚେର ଜିଲ୍ଲା ହେଲେ ଏ ଅଂଚଳର ଜନସାଧାରଣ ଉପକୃତ ହୋଇ ପାରିବେ । ପାଲଲହଡା ସଦର ମହକୁମା ଠାରୁ ଜିଲ୍ଲାପାଳଙ୍କ କାର୍ଯ୍ୟାଳୟ ୯୦ କି.ମି. ହେଉଥିବାବେଳେ ପରଜଙ୍ଗର ଉପାନ୍ତ ଅଂଚଳରୁ ଢେଙ୍କାନାଳ ଜିଲ୍ଲାପାଳଙ୍କ କାର୍ଯ୍ୟାଳୟ ୯୦ କି.ମି. ଦୂରତା ହେଉଥିବାରୁ ଜନସାଧାରଣ ପ୍ରଶାସନିକ ସେବାରୁ ବଂଚିତ ହେଉଛନ୍ତି । ପାଲଲହଡା ଓ ପରଜଙ୍ଗବାସୀ ଶିକ୍ଷା, ସ୍ୱାସ୍ଥ୍ୟ, ଯୋଗାଯୋଗ, କର୍ମ ନିଯୁକ୍ତି ପ୍ରଭୃତି ସମସ୍ତ ଉନ୍ନୟନ କାର୍ଯ୍ୟରେ ତାଳଚେର ଉପରେ ନିର୍ଭର କରୁଥିବାବେଳେ ତାଳଚେର ଜିଲ୍ଲା ହେଲେ ଏ ଅଂଚଳବାସୀ ସୁବିଧାରେ ପ୍ରଶାସନିକ ସେବା ପାଇ ପାରିବେ । ୧୩ ରୁ ୩୦ ଜିଲ୍ଲା ହେବା ସମୟରେ ତାଳଚେରବାସୀ ତାଳଚେରକୁ ସ୍ୱତନ୍ତ୍ର ଜିଲ୍ଲା କରିବା ପାଇଁ ୧୯୯୨ ମସିହାରେ ଆନ୍ଦୋଳନ କରିଥିଲେ ଓ ତତ୍ କାଳୀନ ମୁଖ୍ୟମନ୍ତ୍ରୀ ଭବିଷ୍ୟତରେ ତାଳଚେରକୁ ସ୍ୱତନ୍ତ୍ର ଜିଲ୍ଲା କରିବା ପାଇଁ ତାଳଚେରବାସୀଙ୍କୁ ପ୍ରତିଶୃତି ଦେଇଥିଲେ । ତାଳଚେରକୁ ସ୍ୱତନ୍ତ୍ର ଜିଲ୍ଲା କରିବା ପାଇଁ ତାଳଚେର ଉପଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ କ୍ରିୟାନୁଷ୍ଠାନ କମିଟି ପକ୍ଷରୁ ୫୦୨ ଦିନ ପର୍ଯ୍ୟନ୍ତ ଗଣଧାରଣା ଦିଆଯାଇଥିବା ବେଳେ ବିଧାନସଭା ସମ୍ମୁଖରେ ୨ଥର ଗଣଧାରଣା ଦିଆଯାଇଅଛି । ଆଗାମୀ ଦିନରେ ମଧ୍ୟ ତାଳଚେରବାସୀ ଜିଲ୍ଲା ଦାବୀରେ ଶାନ୍ତିପୂର୍ଣ୍ଣ ଗଣଧାରଣା ସହିତ ଆନ୍ଦୋଳନ କରିବେ ବୋଲି କ୍ରିୟାନୁଷ୍ଠାନ କମିଟି ପକ୍ଷରୁ ନିଷ୍ପତି ନିଆଯାଇଛି । ତାଳଚେରକୁ ସ୍ୱତନ୍ତ୍ର ଜିଲ୍ଲା କରିବା ପାଇଁ ତାଳଚେରବାସୀ ରାଜ୍ୟ ସରକାରଙ୍କ ପାଖରେ ଦୃଢ଼ ଦାବୀ କରିଛନ୍ତି ।
