୮୩ଟି ସ୍ଥାନରେ ସ୍କୁଲ ଛାତ୍ରଛାତ୍ରୀଙ୍କୁ ସ୍ୱାସ୍ଥ୍ୟ ଗବେଷଣା ସହ ଯୋଡ଼ିଲା ICMR-ଶାଇନ୍ ୨୦୨୬
ନୂଆଦିଲ୍ଲୀ, ୧୧/୮: ବିଜ୍ଞାନ ଓ ସ୍ୱାସ୍ଥ୍ୟ ଗବେଷଣା ପ୍ରତି ସ୍କୁଲ ଛାତ୍ରଛାତ୍ରୀଙ୍କ ଆଗ୍ରହ ବଢ଼ାଇବା ଲକ୍ଷ୍ୟରେ ICMR-ଶାଇନ୍ (SHINE) ୨୦୨୬ର ଦ୍ୱିତୀୟ ସଂସ୍କରଣ ଆରମ୍ଭ ହୋଇଛି। ଭାରତୀୟ ଚିକିତ୍ସା ଗବେଷଣା ପରିଷଦ (ICMR) ଓ ସ୍ୱାସ୍ଥ୍ୟ ଗବେଷଣା ବିଭାଗ (DHR) ପକ୍ଷରୁ ଆୟୋଜିତ ଏହି ଦୁଇଦିନିଆ କାର୍ଯ୍ୟକ୍ରମ ୧୧ ଓ ୧୨ ଅଗଷ୍ଟରେ ଦେଶର ୮୩ଟି ସ୍ଥାନରେ ଚାଲିବ।
ହିମାଚଳ ପ୍ରଦେଶର ପ୍ରାୟ ୧୦ ହଜାର ଫୁଟ୍ ଉଚ୍ଚତାରେ ଥିବା କେଲଙ୍ଗଠାରୁ କେରଳ, ଦିଉଠାରୁ ନାଗାଲାଣ୍ଡ ପର୍ଯ୍ୟନ୍ତ ବିଭିନ୍ନ ଅଞ୍ଚଳର ସ୍କୁଲ ଛାତ୍ରଛାତ୍ରୀ ଏହି ପଦକ୍ଷେପରେ ସାମିଲ ହେଉଛନ୍ତି।
ବିଜ୍ଞାନକୁ କେବଳ ପାଠ୍ୟପୁସ୍ତକରେ ସୀମିତ ନ ରଖିବାକୁ ଆହ୍ୱାନ
DHR ସଚିବ ତଥା ICMR ମହାନିର୍ଦ୍ଦେଶକ ଡ. ରାଜୀବ ବହଲ ଛାତ୍ରଛାତ୍ରୀଙ୍କୁ ଅଧିକ ଉତ୍ସୁକ ହେବା, ପ୍ରଶ୍ନ ପଚାରିବା ଏବଂ ‘କାହିଁକି’ ଓ ‘କିପରି’ ଭଳି ପ୍ରଶ୍ନର ଉତ୍ତର ଖୋଜିବାକୁ ପ୍ରୋତ୍ସାହିତ କରିଛନ୍ତି। ଗୋଟିଏ ପ୍ରଶ୍ନରୁ ହିଁ ଗବେଷଣାର ଆରମ୍ଭ ହୁଏ ବୋଲି ସେ କହିଛନ୍ତି।
ଛାତ୍ରଛାତ୍ରୀଙ୍କ ସହ ଆଲୋଚନା କରି ଡ. ବହଲ ବିଜ୍ଞାନ, ସ୍ୱାସ୍ଥ୍ୟ ଓ ଗବେଷଣା ସମ୍ପର୍କିତ ପ୍ରଶ୍ନର ସରଳ ଉତ୍ତର ଦେଇଥିଲେ। ଏହା ସହିତ ICMRର ଗବେଷଣା ଓ ନୂଆ ଉଦ୍ଭାବନକୁ ନେଇ ଆୟୋଜିତ ପ୍ରଦର୍ଶନୀର ମଧ୍ୟ ଉଦ୍ଘାଟନ କରିଥିଲେ।
ଲ୍ୟାବ୍ରେ ପହଞ୍ଚିଲେ ନବମରୁ ଦ୍ୱାଦଶ ଶ୍ରେଣୀର ଛାତ୍ର
କାର୍ଯ୍ୟକ୍ରମରେ ସରକାରୀ ଓ ଘରୋଇ ସ୍କୁଲର ୯ମରୁ ୧୨ଶ ଶ୍ରେଣୀ ପର୍ଯ୍ୟନ୍ତ ଛାତ୍ରଛାତ୍ରୀ ସାମିଲ ହେଉଛନ୍ତି। ସେମାନେ ସିଧାସଳଖ ଗବେଷଣା ଲାବୋରେଟୋରୀ ପରିଦର୍ଶନ କରିବା ସହ ବୈଜ୍ଞାନିକ ପ୍ରଦର୍ଶନୀ, ପୋଷ୍ଟର ୱାକ୍, ଭିଡିଓ ପ୍ରଦର୍ଶନ ଓ ବିଭିନ୍ନ ଚାଲୁଥିବା ଗବେଷଣା କାର୍ଯ୍ୟ ସମ୍ପର୍କରେ ଜାଣୁଛନ୍ତି।
ICMR ବୈଜ୍ଞାନିକଙ୍କ ସହ ସିଧାସଳଖ ଆଲୋଚନା କରି ଗବେଷଣା କ୍ଷେତ୍ର, ବୈଜ୍ଞାନିକଙ୍କ ଅଭିଜ୍ଞତା ଓ ଜନସ୍ୱାସ୍ଥ୍ୟ ପାଇଁ ହେଉଥିବା ଗବେଷଣା ବିଷୟରେ ଛାତ୍ରମାନେ ଜାଣିବାର ସୁଯୋଗ ପାଉଛନ୍ତି।
‘ଡ. କ୍ୟୁରିଓ’ ହେବେ ଛାତ୍ରଙ୍କ ବିଜ୍ଞାନ ସାଥୀ
ଶାଇନ୍ର ଅଧିକାରିକ ମାସ୍କଟ୍ ‘ଡ. କ୍ୟୁରିଓ’ ମଧ୍ୟ ଛାତ୍ରଛାତ୍ରୀଙ୍କ ମଧ୍ୟରେ ବୈଜ୍ଞାନିକ ଉତ୍ସୁକତା ସୃଷ୍ଟି କରୁଛନ୍ତି। ICMRର ଗବେଷଣା କାର୍ଯ୍ୟ ଉପରେ ଆଧାରିତ ଇଣ୍ଟରଆକ୍ଟିଭ୍ ଭିଡିଓରେ ମଧ୍ୟ ଏହି ମାସ୍କଟ୍କୁ ବ୍ୟବହାର କରାଯାଉଛି।
୩୦ ହଜାର ଛାତ୍ରଙ୍କୁ ନେଇ ହେବ ଜାତୀୟ ପ୍ରତିଯୋଗିତା
ଏହି ଅବସରରେ ICMR ପକ୍ଷରୁ SHINEର ଅଧିକାରିକ ୱେବସାଇଟ୍ ମଧ୍ୟ ଆରମ୍ଭ କରାଯାଇଛି। ସ୍ୱାସ୍ଥ୍ୟ ଗବେଷଣା ପ୍ରତି ଆଗ୍ରହୀ ଛାତ୍ରଛାତ୍ରୀଙ୍କୁ ଏଠାରେ ବିଭିନ୍ନ ସୂଚନା, ସୁଯୋଗ ଓ ସମ୍ବଳ ମିଳିବ।
ଏହା ସହିତ ଦେଶବ୍ୟାପୀ ସ୍କୁଲ ପ୍ରତିଯୋଗିତା ଘୋଷଣା କରାଯାଇଛି। ଏଥିରେ ଛାତ୍ରଛାତ୍ରୀ ନିଜସ୍ୱ ଗବେଷଣା ପ୍ରଶ୍ନ ପ୍ରସ୍ତୁତ କରିବା ସହ ବାସ୍ତବ ଜନସ୍ୱାସ୍ଥ୍ୟ ସମସ୍ୟାର ସମ୍ଭାବ୍ୟ ସମାଧାନ ଦେଇପାରିବେ। ପରବର୍ତ୍ତୀ ପର୍ଯ୍ୟାୟରେ ପ୍ରାୟ ୩୦ ହଜାର ଛାତ୍ରଛାତ୍ରୀ ଏଥିରେ ଅଂଶଗ୍ରହଣ କରିବେ ବୋଲି ଆଶା ରହିଛି।
‘ବିକଶିତ ଭାରତ ୨୦୪୭’ ଲକ୍ଷ୍ୟ ସହ ତାଳମେଳ ରଖି ଯୁବପିଢ଼ି ମଧ୍ୟରେ ବୈଜ୍ଞାନିକ ଚିନ୍ତାଧାରା ବିକଶିତ କରିବା ଏବଂ ଭବିଷ୍ୟତର ଗବେଷକ ସୃଷ୍ଟି କରିବା ଦିଗରେ SHINE ୨୦୨୬ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ।
